2 KORINTUS 8 - Tanou Moonsoi Timugon

Ruit paindanganon intor ra ulun Kristian

¹ Pabukat kau ngaangai', masaga' akai ra akau makapandai ra ati kulaan asi' ri Aki Kapuuno' ra pasimpungan ulun Kristian giu' ra pagun Makidonia.

² Kininaman ilo toojo ru nansalinut kapaganan, kaa' naansukan ilo toojo. Kabalu' pana musikin ilo toojo, kaa' mataau ilo mangani' ra ulun bokon.

³ Makapampainono' aku ra nangani' ilo ra kula' ayuk ondo' mataakan nilo, am mulu' piboo suang pinataak nilo. Maya' ra kinataau ru guang nilai galama',

⁴ nangitaak ilo toojo ramon, koson iowon ilo boo mangindangan ra ulun ri Aki Kapuuno' ra Jirusalim.

⁵ Am mulu' poyo pinataak nilo intor ra linansanan maili. Kasaa', pinatimpok nilo kaayagan nilai galama' ra Tuhan am niayuk ramon, sumugut ra kasagaan ri Aki Kapuuno'.

⁶ Ginio sabap ra akai nanusub ri Titus ondo' nanalimpuun ra pangindanganan ti, koson manunggul am mangindangan io ramuyun momongo ra kandoi moonsoi ti.

⁷ Mokoondo' noyo ngaangai' ramuyun: maikang pangintapatan, matanda' mindagu, makakapandayan, mataau am motogom kau ramon. Ginio nai boo ra piroto' min poyo pangindanganan moonsoi ti.

⁸ Bilin kutu am sala' ka karaan min ra rondo' panusuban. Kaa' mambala' aku ayuk ra kapiratan ru ulun-ulun bokon no mangani' ra pangindanganan no, masaga' aku makapandai ra motogom kau kia toojo ra ulun bokon.

⁹ Makapandai kano toojo ra kataawan ru Tuhan takau i Jisus Kristus. Kabalu' pana langkaya' Io, kaa' koson ra kaatangan min, siminauk Io ra musikin, maa' raginio mansail ra kinamusikin nano lumangkaya' kau ra pagilangan ri Aki Kapuuno'.

¹⁰ Sumugut ra pamaguangan ku, moonsoi pongoonon min raino ondo' natalimpuunan min ra sambilaran i. Akau kasaa' toojo nampaguang am nakatampos nangani' ra ruit pangindanganan ti.

¹¹ Raino, pirot kano momongo ra atan ondo' kinasaga' ru guang min ragili, kaa' maya' ra kula' ayuk ondo' mataakan min.

¹² Amon maayo guang min mangani', apuon ri Aki Kapuuno' taak mino maya' ra atan ondo' mataakan min, sala' ka maya' ra ondo' kalo mataakan min.

^13-14 Sala' ka masaga' aku mampakatasu' ra ulun ra bokon liliwa' mantipagon ramuyun; kaa' paat ra raino ti makakaukapan kano am moonsoi mangindangan kau ra ulun ondo' kolondo' kaukapan. Koson niayuk ra paat akau kolondo' kaukapan am ilo makakaukapan, mangindangan ilo niayuk ramuyun. Am koson ragitio makapangindangan kau ra rondo' am bokon.

¹⁵ Tinulisan noyo ra Buuk Kitab, “Ulun ondo' masuang naanam no, kolondo' niayuk suwo, am ulun ondo' sanganu ayuk naanam no, kalo niayuk makayaan.”

I Titus am rangan nano

¹⁶ Paringkuanangan mai ri Aki Kapuuno' ondo' nangani' ri Titus ra kapiratan masaga' mangindangan ramuyun mogondo' ramon.

¹⁷ Sala' ka masaga' io ayuk mampagagaya' ra kitaakon maili, kaa' mulu' poyo kinapirot nano saboi io galama' topot-topot masaga' mongoi ramuyun.

¹⁸ Sangulun poyo ungkuyon pamarangan mai ri Titus. Io mauligan ru ngaangai' pasimpungan ulun Kristian ragiti sabap ra kinapandai no mampabala' ra Tanou Moonsoi.

¹⁹ Sala' ka ginio ayuk, kaa' pinili' am inaru' io poyo ru pasimpungan ulun Kristian koson mamparangan ramon ra pangkiralanan mai am mangindangan mampaugar ra ruit paindanganon ti. Maa' raginio Tuhan noyo urumaton am kinataau ru guang mai mangindangan ra makito.

²⁰ Pinaaya' mai io, maa' raginio kolondo' sangulun kon pana makapanguu' ramon ra ati kulaan akai mampaugar ra kinasuang ru ruit ti.

²¹ Kinooi mai ragino sabap ra masaga' akai mambaal ra atan ondo' motopot, sala' ka ra pagilangan ru Tuhan ayuk, kaa' ra pagilangan ru ulun niayuk.

²² Mokoondo' sangulun poyo pamarangan mai ri Titus, ondo' ingkukula' mai noyo kinami' ra nansalinut baal am makito toojo kinapirot ru guang nati mangindangan. Mulu' poyo boo raino, sabap ra ikang ru kinalansan nano ramuyun.

²³ I Titus ti noyo rangan kuno mangandoi mangindangan ramuyun. Karuo-ruo ngaulun i poyo ondo' mamarangan riso, sinusub ilo ru pasimpungan ulun Kristian ragiti am mumbaya' risilo i Kristus urumaton.

²⁴ Ginio ra ponogom kano risilo, maa' raginio makapampakito kau ra ngaangai' pasimpungan ulun Kristian ra ompor mai ramuyun am motopot ayuk.