2 KORINTUS 7 - Tanou Moonsoi Timugon

¹ Pabukat kau ngaangai' ra tagamin ku! Binantu' noyo ri Aki Kapuuno' ngaangai' no ritakau. Sabap raginio musiti' takau magipasau intor ra ngaangai' baal am pamaguangan majamol, maa' raginio i Aki Kapuuno' urumaton takau am maayag takau toojo ayuk Riso.

Kaansukan ri Paulus

² Ukabo' noyo guang min ramon. Kalo igondo' akai pakasala ra osoi ayuk pana, kapoam nampalayau ra sangulun pana, am kolondo' sangulun kon rinuung mai.

³ Mindagu aku raginio sala' ka koson mononsol ramuyun. Sabap ra nakaindagu aku no alia ra maayag kapoam matoi motogom akai ramuyun.

⁴ Malansan am maringkuanang aku ramuyun. Ginio boo ra kabalu' pana masuang kapaganan mai, kaa' guang kuno pinaikang min am maansukan aku toojo.

⁵ Paat ra akai nakasaboi ra pagun Makidonia kolondo' tangus mai, sabap ra ati-ati ayuk makakapaganan: mokoondo' mantataam ramon am guang mai galama' pana malaa'.

⁶ Kaa' paringkuanangan ri Aki Kapuuno', ondo' mampaikang ra ulun nasindualan, sabap ra guang mai niayuk pinaikang No ra rinatangan ri Titus i.

⁷ Akai pinaansuk am sala' ka luur ayuk ru rinatangan nali, kaa' ondo' niayuk ra io nambala' ra nampaikang kau ra guang nali. Nambala' io poyo ra moogot kau tumuum raki' sabap ra pansagulian boo guang min am raino masaga' kau manungka' raki'. Ginio noyo ondo' nampakaansuk toojo raki'.

⁸ Kabalu' pana surat kuli nampangiluk ra guang min, kalo pansagulian guang kuno ra tinulisan kuli. Kaa' sotopot no pansagulian niayuk guang kuno paat ra natutunan ku ra mangiluk guang min sabap ra kinibit ru surat kuli, kabalu' pana sangkinolor ayuk.

⁹ Kabalu' raginio, maansukan aku raino, kaa' sala' ka sabap ra ngiluk ru guang min. Sotopot no, kasilukan ru guang min ti noyo nagibit ramuyun nakulau. Sabap ra guang min ra mangiluk i siminugut ra kasagaan ri Aki Kapuuno'. Intor raginio, kalo niayuk sinindualan mai guang min!

¹⁰ Sabap ra ngiluk ru guang koson raginio noyo magibit ra pangkulawan ru guang am pamayagan – am kalo pana pansagulian raginio. Kaa' guang mangiluk ondo' sumugut ayuk ra kasagaan ru ulun, mangkinibit ra kapatayan.

¹¹ Ilai' min noyo ampos ru guang mangiluk min ondo' sumugut ra kasagaan ri Aki Kapuuno': mirot kau mampainono' ra kalo makasala kau. Mumpara' boo sisang min ra tula i am mumpara' boo laa' min ra sonor no. Mumpara' poyo ondom min raki' am kasagaan min mangukum ra baal makasala. Nampakito kano ra ralalom ru ngaangai' baal ti ra kolondo' sala min.

¹² Ginio ra kabalu' pana natulisan ku noyo surat i, sala' ka koson ra kaatangan ru sangulun makatula i ayuk, kapoam ra ulun ondo' sininduol i ayuk, kaa' koson kaatangan min niayuk. Maa' raginio makatutun kau ra saang ri Aki Kapuuno' ati kulaan kinotogom min ramon.

¹³ Ginio noyo nampaikang ra guang mai. Am suai poyo raginio, pinaikang niayuk guang mai sabap ra kinabansuk ri Titus. Guang no pinaikang min ngaangai'.

¹⁴ Nokopongompor aku no alia ramuyun ra saang nali, am maansayan aku ra kalo tupo nampakauyu' kau raki'. Ngaangai' ragu mai ramuyun motopot ayuk, mogondo' niayuk ra ompoporon maili ri Titus i pana motopot.

¹⁵ Am rumuang poyo kinotogom nano ramuyun, paat ra io nakakara' ra ati kulaan kau ngaangai' giminagaya' ra panusuban nali, am niayuk ati kulaan kau nangapu riso ra guang minggana' am urumat.

¹⁶ Maansukan aku toojo sabap ra makakalansanan aku ramuyun ralalom ngaangai' baal.