2 KORINTUS 5 - Tanou Moonsoi Timugon

¹ Makapandai akai ra amon ru inayanan takau ra tana' ti pusoon boo, ioginio inan takau, makaayanan takau niayuk ra suruga'. Am ayanan raginio mantilayun ondo' binaal ri Aki Kapuuno' galama' am sala' ka ulun.

² Buoi itakau mayan ra tana' ti, manguang takau sabap ra ondom takau mongoi ra ayanan takau giu' ra suruga'.

³ Sabap ra paat takau soroi ra giu' no, makainan takau boo ra nakabagu.

⁴ Raino manguang takau sabap ra inan inayanan takau ra tana' ti mantipagon ritakau. Sala' ka masaga' takau manatang ra inan takau ra tana' ti, kaa' mompogogot takau toojo ra inan ru suruga' no, maa' raginio ondo' mapuso makulau ra kaayagan mantilayun.

⁵ I Aki Kapuuno' noyo ondo' mampasauk raginio ritakau. Am Io galama' nangani' ra Ambiluo Nano ritakau koson mapakalansan ra mangani' Io ra ngaangai' ondo' binantu' Nali.

⁶ Ginio ra masalok akai kalo malaa'. Nakapandai akai ra buoi mai mayan ra inan ti, maalur akai intor ra ayanan ru Tuhan.

⁷ Nga kiralan ru kaayagan mai ti inimpuun ra pangintapatan, am sala' ka ondo' makito mai ayuk.

⁸ Ginio nai ra kalo malaa' akai am masaga' akai niayuk manatang ra inan ti, maa' raginio makapasimpung akai ra Tuhan.

⁹ Kaa' ondo' kasaa' toojo, masaga' akai ayuk mampakatasu' ra guang Nano, iou pana soroi akai ra inan mai ra tana' ti, kapoam giu' ra ayanan ru Tuhan.

¹⁰ Sabap ra itakau ngaangai' paumaan niayuk ri Kristus am akimin no. Moonong ulun ruliin boo sumugut ra atan ondo' binaal nali giti ra tana' ti, moonsoi kapoam malaat.

Mansail ri Kristus itakau mobonsoi ri Aki Kapuuno'

¹¹ Ginio sabap ra nakapandai akai atan arati' malaa' ra Tuhan, am ginio ra mapaintopot akai ra ulun. Guang mai napandayan toojo ri Aki Kapuuno', am malansan aku ra akau pana makatutun toojo ramon.

¹² Kalo makiompor akai poyo ramuyun, kaa' mangani' akai ayuk ramuyun ra sasaban moonsoi, maa' raginio maansukan kau ramon. Makapandai kau boo tumaam ra ulun ondo' mampakaatang ra bulos ru ulun ayuk am sala' ka bonsoi ru guang.

¹³ Amon akai ti ilain ra mantuyang, ginio boo kinibit mai nambaal ra kasagaan ri Aki Kapuuno'. Am amon ru akai ti ilain ra matanda', ginio pana koson ra kaatangan min niayuk.

¹⁴ Sabap ra togom ri Kristus nanguasa' ramon. Makatutun akai ra amon ru kapatayan ru sangulun koson ra alig ru ngaangai' ulun, arati' ru ginio, koson moonong ulun minatoi nabaya' riso.

¹⁵ I Kristus minatoi noyo koson ra alig ru ngaangai' ulun, maa' raginio ngaangai' ulun ondo' maayag kalo boo mampakaatang ra kaayagan nilo galama' ayuk, kaa' mangkara' ayuk boo Riso, ondo' minatoi am binayag saguli' koson kaatangan ilo.

¹⁶ Sabap raginio, akai kalo boo mangimumui ra osoi ayuk pana sumugut ra pagilangan ru ulun. Kabalu' pana nangimumui akai niayuk ri Kristus koson raginio ragili, kaa' raino kalo boo.

¹⁷ Paat ra sangulun masimpung ri Kristus, masauk io ra ulun baguon; ondo' lairon i napuso, malit boo baguon.

¹⁸ Ngaangai' no pinasauk noyo ri Aki Kapuuno'. Ralalom ri Kristus, nangulau Io ritakau intor ra pantula' no saboi mobonsoi takau boo Riso, am nangani' Io ramon ra kandoi mopobonsoi Riso ra ulun ra bokon pana.

¹⁹ Gitio noyo tanou posoboyon mai; ralalom ri Kristus i Aki Kapuuno' nopobonsoi ra ngaangai' ulun Riso am kalo boo karaan No tula nilai. Am tanou raginio pinakandayan Nano ramon.

²⁰ Koson ra ulun sinusub ri Kristus mampasaboi akai ra tanou ti am i Aki Kapuuno' galama' mindagu ramuyun mansail ramon. Ginio ra makitaak akai toojo ra: Polosoo' noyo akau pobonsoyon ri Aki Kapuuno'.

²¹ Kolondo' noyo tula ri Kristus, kaa' koson ra kaatangan takau, kinara' Io ri Aki Kapuuno' koson makatula. Maa' raginio, sabap ra pasimpungan takau ri Kristus, itakau ondo' makatula mobonsoi saguli' ri Aki Kapuuno'.