2 KORINTUS 4 - Tanou Moonsoi Timugon

Rapu' mokologo intor ra suruga' pinauli ra pagangan tana'

¹ Ginio nai kalo malawo guang mai, sabap ra ralalom ru asi' Nano nangani' i Aki Kapuuno' ramon ra kandoi ragitio.

² Iniruanan mai noyo ngaangai' baal ra nakasibuni ondo' makauyuyu'. Kalo mamparuung akai ra ulun kapoam mampajajou ra bala' ri Aki Kapuuno'. Io noyo sasi' mai ra kalo sinokon mai mampabala' ra Tanou Moonsoi am niayuk miloloso akai urioon ru ngaangai' ulun maya' ra bolos ru guang nilai.

³ Amon ru nakasibuni Tanou Moonsoi ondo' posoboyon maiti, ginio nakasibuni ayuk ra ulun ondo' makalayau.

⁴ Guang ru ulun ondo' kalo mangintopot ti kinolondom ru tingganai malaat ondo' mamarinta ra tana' ti. Io noyo ondo' manginga' risilo makakito ra sinda intor ra Tanou Moonsoi, ioginio katulayan ri Kristus ondo' mogondo' ri Aki Kapuuno'.

⁵ Pai' ru mampasaboi akai ra tanou mai galama', kaa' tanou ra i Jisus Kristus noyo Tuhan, am akai ti ulipon min ayuk sabap ri Jisus.

⁶ Minindagu i Aki Kapuuno', “Kasauk noyo sinda ra kalandaman.” I Aki Kapuuno' niayuk ondo' mampakasinda ra guang mai, koson makaintutun akai toojo ra katulayan Nano ondo' simininda ra bulos ri Kristus.

⁷ Akai ti koson ra pagangan tana', ondo' nambulian ra rapu' mokologo intor ra suruga'. Ginio mampakito ri Aki Kapuuno' noyo maayo kaga' kuasa', am sala' ka akai.

⁸ Magail akai ayuk imboloon, kaa' moorot mai niayuk. Maimamang akai, kaa' kalo masaboi malawo guang maino.

⁹ Masuang makimantula' ramon, kaa' kalo igondo' akai iruani' ri Aki Kapuuno'. Kabalu' pana magail akai ayuk pampasin, kaa' kalo noyo maluus akai.

¹⁰ Masalok akai makauma' ra baal makapatoi mogondo' ri Jisus, maa' raginio kaayagan Nano pana makaintalang toojo ra inan maiti.

¹¹ Buoi ra akai maayag, masalok akai makauma' ra baal makapatoi sabap ri Jisus, maa' raginio kaayagan ri Jisus pana makito ra kaayagan mai ti ondo' tauli no mapuso.

¹² Arati' ragitio, sabap ra akai masalok makauma' ra baal makapatoi, akau makaapu ra kaayagan intor ri Aki Kapuuno'.

¹³ Tinulisan noyo ra Buuk Kitab, “Mindagu aku sabap ra mangintopot aku ri Aki Kapuuno'.” Akai pana makapangintapatan koson raginio, ginio nai ra akai makaindagu.

¹⁴ Nakapandai akai ri Aki Kapuuno', ondo' namayag saguli' ra Tuhan Jisus i, mamayag saguli' ramon mabaya' ri Jisus am niayuk magibit ritakau ngaangai' masisimpung Riso.

¹⁵ Ngaangai' kaimbalaan no masauk koson ra kaatangan min. Sabap raginio rumuang ulun ondo' makaapu ra kataawan ri Aki Kapuuno', ondo' mulu' poyo maringkuanang am mangurumat ilo ri Aki Kapuuno'.

Bayag ra makapangintapatan

¹⁶ Ginio sabap ra akai kalo malawo guang. Kabalu' pana inan maiti mapuso, kaa' guang mai talimbaguin ra moonong orou.

¹⁷ Kapaganan ra kalo maaja' ondo' mailian mai ra sangkinolor ti, magibit ramon ra katulayan mantilayun ondo' maayo poyo toojo intor ra ngaangai' ru kapaganan mai ti.

¹⁸ Sabap ra kalo mampakaatang akai ra atan ondo' makito, kaa' ondo' kalo makito no. Atan ondo' makito no, kalo pantilayunon, kaa' ondo' kalo makito no ayuk mantilayun.