2 KORINTUS 3 - Tanou Moonsoi Timugon

Ulipon ra Nabantuan Bagu

¹ Morongog min kia koson akai lumimbau poyo? Kapoam musiti' akai kia mampakito ramuyun ra surat pangiawan, kapoam makitaak raginio intor ramuyun, koson kitaakon ru ulun ra bokon?

² Sala', kaa' akau noyo galama' surat mai ti, ioginio surat ondo' nakatulis ralalom ru guang mai. Ginio maalap katutuni' am kabasa' ru moonong ulun.

³ Nakaintalang noyo toojo ra akau koson ra surat ondo' tinulisan ri Kristus galama' ondo' pinakirim pinasumbaya' ramon. Surat raginio pai' ru tinulisan ra dawat, kaa' mansail ra Ambiluo ri Aki Kapuuno' ondo' maayag; am poyo pai' ru pinabatik ra rondo' batu pamatikan, kaa' ralalom guang ru ulun.

⁴ Mindagu akai koson raginio sabap ra maayo toojo kalansanan mai ri Aki Kapuuno' sabap ri Kristus.

⁵ Kolondo' kon atan pana ramon ondo' mangiou ra akai maaya' mambaal ra kandoi ti. Kaa' pangiawan maino intor noyo ri Aki Kapuuno'.

⁶ Io no napasauk ramon maaya' makapangandoi Riso ra Nabantuan Bagu no. Nabantuan no kalo boo inimpuun ra ukum tinulisan i, kaa' Ambiluo ri Aki Kapuuno'. Ukum ondo' tinulisan i mangkinibit ra kapatayan, kaa' Ambiluo ri Aki Kapuuno' manaak ra kaayagan.

⁷ Paat ra ukum ri Musa i tinulisan ra rondo' batu pamatikan, katulayan ri Aki Kapuuno' pana pinaintalang noyo. Kabalu' pana sinda ru katulayan ra bulos ri Musa moboot noyo, kaa' mapaang kaga' saboi ulun ru Israil kalo nokoponontong ra bulos nali. Amon ru Ukum ri Musa ondo' nangkinibit ra kapatayan no, inanian niayuk mabaya' ra katulayan maayo,

⁸ mulu' poyo gayo ru katulayan ondo' paintalangon ru Ambiluo ri Aki Kapuuno'!

⁹ Amon ru nabantuan ondo' nangkinibit ra pangukuman matulai noyo, mulu' poyo kinatulai ru nabantuan ondo' magibit ra ulun mobonsoi ri Aki Kapuuno'.

¹⁰ Sotopot no amon ru pogondoon takau ati kulaan kinatulai ru Nabantuan Bagu ra raino ti, katulayan ru Ukum ri Musa i nalulu' noyo.

¹¹ Sabap ra amon ru atan ondo' nalulu' i makakatulayan noyo, mulu' poyo katulayan ru Nabantuan Bagu ondo' mantilayun no.

¹² Sabap ra makakalansanan akai raginio, makakau' akai boo mampatanou.

¹³ Akai ti sala' ka koson ri Musa ondo' nanili ra bulos nali, maa' raginio ulun ru Israil kalo makakito ra moboot kapoam malulu' sinda ru katulayan i.

¹⁴ Kaa' koson risilo, kinotog nilo guang nilai no. Saboi ra orou raiti' guang nilai no lakat ayuk poyo nasilian paat ra ilo mambasa' ra kitab Nabantuan Lair no. Ginio maalap ayuk kairu' paat ra sasangulun no masimpung ri Kristus.

¹⁵ Raino pana, moonong ayuk ra ilo mambasa' ra Ukum ri Musa, guang nilai no lakat ayuk poyo nasilian.

¹⁶ Kaa' paninili no bungkiasin, sabap ra tinulisan noyo ra Buuk Kitab, “Binungkias ri Musa paninili i, paat io nakauma' ra Tuhan.”

¹⁷ Arati' ru ragu “Tuhan” ragitio am Ambiluo; am ati ayuk kasarayan ru Ambiluo ru Tuhan no, giu' no niayuk mokoondo' kalabusan.

¹⁸ Raino bulos takau ngai' kalo nasilian am mapatampulau takau boo ra sinda ru katulayan ru Tuhan. Sinda ru katulayan raginio niayuk ondo' mangulau ritakau masauk nogondo' Riso, koson buoi-kabuoi gumaai sinda ru katulayan takau. Ngaangai' ti intor noyo ra Ambiluo ru Tuhan.