2 KORINTUS 2 - Tanou Moonsoi Timugon

¹ Ginio sabap ra nangkara' aku toojo ra kalo boo mongoi ramuyun koson mampangiluk ra guang min.

² Sabap ra amon ru mampangiluk aku ra guang min, osoi boo kia mapakaansuk raki', amon ru sala' ka ulun ondo' pinangiluk ku ra guang nilai no niayuk?

³ Ginio nai ra tinulisan ku ramuyun koson raginio, sabap ra marara' aku mongoi ramuyun am pangilukon guang kutu ru ulun ondo' sotopot no mapakaansuk raki'. Sabap ra mangintopot aku toojo ra ondo' kaansukan kuno am kaansukan min niayuk.

⁴ Gili nanulis aku ramuyun ra guang magalabo am mangiluk toojo ondo' mabaya' ra tangi'. Sotopot no kon kuli pai' ru mampangiluk ramuyun, kaa' maa' raginio mampaintutun ramuyun ra motogom aku toojo ramuyun.

Ampunon ulun makatula

⁵ Amon ru mokoondo' noyo nangkinibit ra sasangulun mangiluk guang sabap ra tula nano, pai' ru aku ayuk pangilukon no, kaa' sotopot no akau ngaangai', kapoam santayaran, ondo' nakaliman raginio. (Mindagu aku koson raginio sabap ra marara' aku mampagaai ra kapaganan ti.)

⁶ Ondo' pinaukum noyo ru kasuangan min, sama' noyo riso.

⁷ Raino akau musiti' mangampun riso am paikango' min io, maa' raginio kalo mangiluk guang no suku' mairu' kalansanan nano.

⁸ Ginio ra makitaak aku ramuyun; pakitono' min io ra akau topot-topot motogom riso.

⁹ Ginio nai puun ru surat kuli ra masaga' aku mangkinam ramuyun, koson masalok kau kia mampagagaya' ra panusuban kuno.

¹⁰ Amon ru mangampun kau ra osoi ayuk makatula, aku pana mangampun riso. Sabap ra amon ru mokoondo' musiti' ku ampunon, ginio ampunon ku ra saang ri Kristus koson ra kaatangan min.

¹¹ Maa' raginio kolondo' kaluagan ru Tingganai ru riwato manguasa' ritakau; sabap ra nakapandai takau no ra atan ondo' atangon nano.

Pagalabaan ri Paulus ra bandar Troas

¹² Paat ra aku nakasaboi ra bandar Troas koson mampabala' ra Tanou Moonsoi ri Kristus i, ilain ku ra pinongo noyo kalalair ru Tuhan ralan kuno mangandoi ra giu' i.

¹³ Kaa' guang ku nagalabo toojo, sabap ra kalio natuum ku i Titus, pabukat takau ra Kristian. Ginio ra tatango' ku ulun-ulun Troas koson manunggul ra pangkiralanan ku ra pagun Makidonia.

Mamanang mansail ri Kristus

¹⁴ Kaa' maringkuanang aku ri Aki Kapuuno'! Masalok Io maningganai ramon koson mokoowot ra kamanangan, sabap ra pasimpungan mai ri Kristus. Magibit Io ramon mampabala' ra tanou ri Kristus ra ati ayuk pana, am tanou raginio koson ra owou maamis.

^15-16 Nga akai ti koson ra kaminyan ra maamis owou ondo' pataakin ri Kristus ri Aki Kapuuno'. Koson ra ulun-ulun ondo' mangaluus no, akai ti mogondo' ra owou mootong, io no kapatayan; kaa' koson ra ulun ondo' bayagon, akai ti mogondo' ra owou maamis, ondo' magibit ra kaayagan. Kaa' raino, osoi kia maaya' mampaugar ra kandoi raginio?

¹⁷ Sabap ra akai ti pai' ru koson ra ulun bokon ondo' mampasaboi ra bala' ri Aki Kapuuno' sabap ra masaga' lumangkaya'. Sala', kaa' intor ra guang mapasau am sabap ra sinusub akai ri Aki Kapuuno', mampasaboi akai ra tanou ti koson ra ulipon ri Kristus.