2 KORINTUS 10 - Tanou Moonsoi Timugon

Magisaung i Paulus

¹ Aku, i Paulus, mangitaak ramuyun, aku ondo' raguon ra molomoi paat ra makatuum ramuyun, kaa' baani paat ra makapaginggalur ramuyun. Sabap ra kinolomoi am kinataau ru guang ri Kristus, kitaakon takamin

² koson kalo mangkinibit raki' malasang ragu ku ramuyun paat ra aku matong ra maagu no. Sabap ra totopot saukon ku niayuk ginio ra ulun ondo' mindagu ra kiralan ru kaayagan mai sumugut ra ulun ru tana' ti.

³ Maaru' motopot noyo ra akai ti maayag ra tana' ti, kaa' sala' ka gumula' akai maya' ra paliso ru ulun.

⁴ Kinandoi mangayou ondo' ibiton mai ra pangayawan, sala' ka intor ra tana' ti, kaa' intor noyo ri Aki Kapuuno' ondo' makakuasa'. Am kinandoi mangayou ti noyo makapamuso ra kinaikang ru pantula'. Mompolonggo' akai ra pantataaman

⁵ am mamuso ra ngaangai' sasaban ondo' manginga' ra ulun kalo makaulig ri Aki Kapuuno'. Kulawon mai guang ru ulun, maa' raginio gumagaya' ilo boo ri Kristus.

⁶ Mopongo kau mampainono' ra pampagagayaan min ri Kristus, bagu no akai tumampos mangukum ra osoi ayuk ondo' kalo gumagaya'.

⁷ Akau mangakim maya' ra ondo' makito min ayuk. Osoi ayuk makaliman ra io galama' i Kristus tatangan, moonsoi ra mangkara' io niayuk ra akai ti pana i Kristus tatangan, mogondo' riso.

⁸ Kalo mauyu' aku, kabalu' pana lumimbau aku toojo ra kuasa' ondo' pinataak ramon ru Tuhan. Sabap ra kuasa' ti tinaakan koson mampaikang ra pangintapatan min, sala' ka mampalawo ramuyun.

⁹ Kalo noyo masaga' aku ra surat-surat kuno ilain ayuk koson mampakalaa' ramuyun.

¹⁰ Mokoondo' mindagu ra, “Surat-surat ri Paulus malarom am moporos, kaa' paat ra io mokosoroi ritakau, malawo ulun no am ragu nano pana kalo sama' iningon.”

¹¹ Moonsoi poyo makatutun ilo ra pamakuan mai ramuyun paat ra akai sumaguli' ra Korintus, mogondo' niayuk ra atan ondo' tinulisan mai ralalom ru surat maili.

¹² Motopot noyo ra kalo makimogondo' akai ra kaayagan mai ra ulun, ondo' mangkara' ra ilo ayuk maatang kaga'. Sasambungon ulun raginilo! Mitutuku' ilo ra tutuku' binaal nilo galama'.

¹³ Kaa' akai ti pai' ru makiompor koson raginio. Kaa' makiompor niayuk morontop ra atan ondo' inaru' ri Aki Kapuuno' ramon, ioginio ondo' kinandoi mai ramuyun.

¹⁴ Sabap ra paat ra akai minongoi ramuyun nagibit akai no ra Tanou Moonsoi ri Kristus, kalo siminiang akai sabap raginio morontop ra atan ondo' inaru' ri Aki Kapuuno' ramon.

¹⁵ Kalo niayuk lumimbau akai ra atan ondo' kinandoi ru ulun bokon, ondo' ak am atan ondo' inaru' noyo ramon ri Aki Kapuuno'. Kaa' malansan akai ra mikang poyo pangintapatan min, saboi makakaluagan akai poyo mangandoi ra gino ngai' min, ra morontop ra ondo' inaru' ri Aki Kapuuno'.

¹⁶ Bagu makapapasaboi akai niayuk ra Tanou Moonsoi no ra pagun ra bokon poyo, maa' raginio kalo lumimbau akai ra atan ondo' kinandoi noyo ra pangandayan ru ulun bokon.

¹⁷ Kaa' koson tinulisan ra Buuk Kitab, “Osoi ayuk masaga' lumimbau, moonsoi mongompor io ayuk ra atan ondo' binaal ru Tuhan.”

¹⁸ Sabap ra pai' ru ulun ondo' lumimbau no iowon ru Tuhan, kaa' ulun ondo' omporon ru Tuhan no.