2 KORINTUS 1 - Tanou Moonsoi Timugon

^1-2 Pabukat kau ngaangai' ra pasimpungan ulun Kristian ra bandar Korintus am poyo ngaangai' ulun ri Aki Kapuuno' ra pagun Akaya. Surat ti intor raki', i Paulus, rasul ri Jisus Kristus ondo' piniau ri Aki Kapuuno', am intor ra pabukat takau i Timotius. Gama' ru i Aki Kapuuno', Ama' takau am i Tuhan Jisus Kristus manaak ramuyun ra barakat am pabansayan.

Paringkuanangan i Paulus ri Aki Kapuuno'

³ Koompor noyo i Aki Kapuuno', Ama' ru Tuhan takau i Jisus Kristus; ioginio i Ama' ondo' makaasi' kaga' am puun ru ngaangai' kaindanganan ru guang.

⁴ Mangindangan Io ramon ralalom ru ngaangai' kapaganan mai, maa' raginio ralalom ru kaindangan ondo' maapu mai intor ri Aki Kapuuno', akai pana makapangindangan ra ngaangai' ulun ondo' makakapaganan.

⁵ Masuang kaimbalaan nailian mai sabap ra maya' akai ri Kristus, kaa' masuang poyo kaindangan naapu mai sabap Riso.

⁶ Mapaat ra akai maimbolo', ginio mangindangan am mampakaayag ramuyun. Amon ru indanganon akai, akau pana indanganon am aniin ra kuasa' mongorot ra kaimbalaan koson ramon.

⁷ Kalo igondo' akai kaimamang malansan ramuyun; sabap ra nakapandai akai ra kabalu' pana akau maimbolo' pakaaya' ramon, makaapu kau niayuk ra kaindanganan koson ramon.

⁸ Pabukat kau ngaangai', masaga' akai ra makaintutun kau ra kapaganan ondo' nailian mai giu' ra pagun Asia, najanjayan am maagat toojo, saboi kolondo' boo kalansanan mai maayag.

⁹ Nalimanan mai koson ayuk ra inukum akai noyo ra potoyon. Kaa' sotopot no ginio nasauk, maa' raginio kalo malansan akai ak ra ikang mai galama', kaa' ri Aki Kapuuno' ayuk ondo' mampakaayag ra ulun matoi.

¹⁰ Io no niayuk namayag ramon intor ra kapaganan ru kapatayan ondo' makalalaa' no, am masalok mamayag Io poyo ramon; sabap ragitio noyo kalansanan mai toojo Riso.

¹¹ Ra indangan ru pakiasian min mamayag Io poyo ramon. Sabap ra masuang pakiasian mini iowon ri Aki Kapuuno', am mambarakat io ramon, am sabap raginio, masuang ulun boo maringkuanang ri Aki Kapuuno'.

Kinulau ri Paulus inatang nali

¹² Maringkuanang akai toojo sabap ra bolos ru guang mai maminson ramon ra kiralan ru kaayagan mai ra tana' ti, mulu' poyo pabukatan mai ti ramuyun, masalok mabanis am matanda'. Ginio mabaal mai ralalom ru kuasa' ri Aki Kapuuno' am asi' Nano galama', am sala' ka mansail ra kapintaran ru ulun.

¹³ Ondo' tinulisan mai ramuyun matasu' ayuk basaan am maratian. Raino kalo makarati' kau toojo ramon, kaa' malansan akai ra makaintutun kau toojo ramon.

¹⁴ Maa' raginio, paat ra Orou ru Tuhan Jisus matong saguli', maringkuanang kau ramon, koson akai pana maringkuanang ramuyun.

¹⁵ Sabap ra ikang ru kalansanan ku raginio, nangatang aku no mongoi uma' galing ramuyun, maa' raginio mainduaan kau kabarakat.

¹⁶ Nampaguang aku no tumuum ramuyun ralalom pangkiralanan kuno mongoi ra Makidonia, am mapit aku po saguli' ramuyun paat ra aku sumaguli', maa' raginio maindangan min aku manunggul ra pangkiralanan kuno mongoi ra Judia.

¹⁷ Kabalu' pana kinulau ku noyo ratangan kuno ramuyun, pai' ru koson ra mataki' makulau guang kuno. Paat ra aku mampaguang ra ondo' atangon kuno, mangkara' aku ayuk kia ra kaatangan kuno galama', koson ra sangkinolor mindagu ra “Iou”, am sangkinolor poyo am “Kalo”? Maaru' kalo!

¹⁸ Sabap ri Aki Kapuuno' ondo' malansanan toojo, ragu kuno ramuyun kalo makulau ra “Iou” am “Kalo”.

¹⁹ Sabap ri Jisus Kristus, Anak ri Aki Kapuuno', ondo' pinatanou mai ramuyun, ioginio aku, i Silas am i Timotius, kalo noyo makulau ra “Iou” am “Kalo”. Kaa' sotopot no Io no taaman “Iou” intor ri Aki Kapuuno'.

²⁰ Sabap Riso, i Aki Kapuuno' mindagu ra “Iou” ra moonong ondo' binantu' Nali. Ginio ra itakau mindagu ra “Amin”, sabap ri Jisus Kristus, maa' raginio urumaton takau i Aki Kapuuno'.

²¹ I Aki Kapuuno' galama' mampaikang ramon, mababaya' ramuyun, sumimpung ri Kristus; Io niayuk nampili' ritakau ra Io no tatangan.

²² Koson ragitio noyo itakau tinatanduan ri Aki Kapuuno' ra Io tatangan; pinataak No Ambiluo Nano ra guang takau koson mapakalansan ra mangani' Io ritakau ra ngaangai' ondo' binantu' Nali.

²³ I Aki Kapuuno' noyo toojo sasi' kuno am makapandai Io ra ngaangai' suang ru guang kuno! Kalo nasugut ku mongoi ra Korintus, sabap ra makara' ku ginio mampakaruol ra guang min.

²⁴ Kalo mompogogot akai maningganai ramuyun koson mambala' ra atan musiti' intopoton min, sabap ra mangintopot kano toojo ri Kristus. Kaa' masaga' akai ayuk maguguyu ramuyun, maa' raginio maansayan kau toojo.