2 JUANIS 1 - Tanou Moonsoi Timugon

¹ Okou ina' ondo' pinili' ri Aki Kapuuno' am niayuk akau anak-anak nano. Aku magagalung ra pasimpungan ulun Kristian ondo' topot-topot motogom ramuyun. Sala' ka aku ayuk sangulun kaa' ngaangai' ulun ondo' makaulig ra katapatan motogom ramuyun.

² Katapatan minayan ralalom ru guang takau am tumilayun io sumimpung ritakau ra sabuoi-buoi no.

³ Gama' ru Ama' takau, i Aki Kapuuno', am Anak Nano i Jisus Kristus manaak ritakau ra barakat, asi' am pabansayan: Gama' ru ngaangai' ragitio maapu takau ra guang motopot am motogom.

Katapatan am togom

⁴ Ina', naansukan aku kaga' naala' ra mokoondo' intor ra anak-anak muno ondo' kaayagan nilo maya' ra ralan motopot, koson ra nanusuban ri Aki Kapuuno' ritakau.

⁵ Ginio ra Ina', kimaitin tokou maa' boo raginio motogom takau ra rondo' am bokon. Ondo' tulisin kutu rirun sala' ka susuban nakabagu; susuban ragitio pinataak ritakau intor poyo ra talimpuun i.

⁶ Motogom arati' no maayag sumugut ra susuban ri Aki Kapuuno'. Am susuban ondo' norongog min intor ra talimpuun i, ioginio, musiti' kau masalok motogom ra rondo' am bokon.

⁷ Masuang noyo mamparuung ra ulun ra tikop-tikop ru tana' ti. Ilo ti ulun ondo' kalo mangintopot ra i Jisus Kristus minatong ra tana' ti siminauk ra ulun. Ulun raginio mamparuung am tumula' ri Jisus Kristus.

⁸ Ginio ra ilalai' min! Maa' raginio kalo matatakan kau ra atan ondo' kinandoi maili ramuyun, kaa' makaalap kau ra atan ondo' taakin ri Aki Kapuuno' ramuyun.

⁹ Osoi ondo' kalo gumagaya' ra pangilaan ri Jisus Kristus am tumalansiang ra nangilaan Nano, ulun raginio kalo nakaulig ri Aki Kapuuno' am i Aki Kapuuno' sala' ka io tatangan. Osoi ondo' lumayun ayuk ra nangilaan ri Jisus Kristus, arati' no, i Aki Kapuuno' am niayuk i Jisus Kristus io tatangan.

¹⁰ Amon ru mokoondo' sasangulun matong ramuyun am kalo mambala' ra pangilaan ri Jisus Kristus, pai' min apuo' ulun no ralalom ru baloi min, am pai' min io tabio'.

¹¹ Osoi ondo' mangapu am tumabi' ra ulun ra raitii' ni, arati' no, maya' io ra ulun raginio mambaal ra kalaatan.

Ragu pupus

¹² Masuang poyo musiti' pabalaan kuno ramuyun. Kaa' guang ku moonsoi sala' ka tulisin ra surat. Malansan mokoongoi aku galama' tuum am makimansunur ramuyun, maa' boo raginio guang takau topot-topot maansukan.

¹³ Posoboyon ku ramuyun kaansayan intor ra anak-anak ru pabukat ruandu' min ondo' niayuk pinili' ri Aki Kapuuno'.