2 TUNUNG RU BANSA' ISRAIL 9 - Tanou Moonsoi Timugon

Raja' Ruandu' ru pagun Syiba nanambului ra Raja' Salomo

¹ Raja' ruandu' ru pagun Syiba nokorongog intor ra inggalan maayo ru Raja' Salomo. Raja' ruandu' no pana minongoi ra Jirusalim koson mangkinam ra Raja' Salomo ra pangkuatan-pangkuatan ondo' mapagon. Raja' ruandu' no minatong nababaya' ra masuang namaya', am niayuk unta-unta pinagibit ra apa' pampagamis ra akanon, intan am mas ondo' masuang kaga'. Paat ra raja' ruandu' no nakauma' ra Raja' Salomo, raja' ruandu' no nangkuot ra masuang pangkuatan ondo' makara' nano.

² Tinaam ru Raja' Salomo ngaangai' pangkuatan ru raja' ruandu' no. Kolondo' rondo' pana ondo' mapagon kaga' ra Raja' Salomo.

³ Raja' ruandu' ru pagun Syiba nokorongog galama' ra kapintaran ru Raja' Salomo am nakakito ra istana ondo' binaal ru Raja' Salomo.

⁴ Raja' ruandu' ru pagun Syiba nakakito ra ugar ru kandoi ru pagawai-pagawai istana, bayang sarampun, am baloi inayanan nilo. Raja' ruandu' no nakakito ra akanon ondo' pinasulung am bayang ru mangngandoi ondo' mansulung ra Raja' Salomo paat ra bunsag; raja' no nakakito niayuk ra taak-taak simbalui ondo' pinataak ru Raja' Salomo giu' ra Baloi ru Tuhan. Ngaangai' no nambaal ra raja' ruandu' ru pagun Syiba no naansayan am nakasioro'.

⁵ Indagu raja' ruandu' no ra Raja' Salomo, “Topot noyo atan ondo' norongog kuli giu' ra pagun kuli intor rirun am kapintaran muno!

⁶ Kaa' kalo mangintopot aku ra aku kalo poyo minatong am nakakito ra ngaangai' no ra mato kuno galama'. Kaa' atan ondo' norongog kuli kalo noyo naintanga' intor ra atan ondo' nakito ku raino. Kapintaran am kalangkayaan muno maayo poyo intor ra atan ondo' pinatanou noyo raki'.

⁷ Pakaansuk noyo pagawai-pagawai ondo' magail mangandoi rirun, ondo' makakaluagan mangining ra ragu-ragu muno ondo' mapintar!

⁸ Koompor noyo Tuhan, i Aki Kapuuno' muno! Nampakito Io noyo ra maansayan Io rirun am nampasauk rirun ra raja' koson manguasa' ralalom ru inggalan Nano. Ginio sabap ra motogom Io ra ulun Nano Israil am masaga' magalung risilo ra sabubuoi no, sinauk No okou ra raja' nilo, maa' raginio okou mapapiot ra ukum am matimpok.”

⁹ Raja' ruandu' ru pagun Syiba nampataak ra taak-taak ondo' inibit nano ra Raja' Salomo, iono nasailan intor ra 4,000 ngakilogram mas, am apa' pampagamis ra akanon am niayuk intan ondo' masuang kaga'. Kalo igogondo' Raja' Salomo nangapu ra apa' pampagamis ra akanon ondo' moonsoi kaga' no koson ra ondo' tinaak ru raja' ruandu' ru pagun Syiba. (

¹⁰ Ulun-ulun ru Raja' Giram am ulun-ulun ru Raja' Salomo ondo' nagibit ra mas intor ra Opir niayuk nagibit ra tataun cendana am intan.

¹¹ Intor ra tataun no nambaal Raja' Salomo ra tukar ra Baloi ru Tuhan am istana nano, am niayuk koson nambaal ra jitor am niayuk gambus tayar ru ulun-ulun mangkukuli ra miujik. Kalo igondo' kuliamos-kuliamos koson raginio nakito giu' ra pagun ru Jiuda.)

¹² Nangani' Raja' Salomo ra atan ayuk ondo' kinitaak ru raja' ruandu' ru pagun Syiba. Tinaakan raginio iono pinaruang ra atan ondo' pinataak nano koson mambalos ra taak ru raja' ruandu' no. Kopongo raginio raja' ruandu' ru Syiba am namaya'-namaya' riso no minuli' ra pagun Syiba.

Kalangkayaan ru Raja' Salomo

^13-14 Suai ru cukai ondo' binayaran ru ulun mantatalan, moonong bilor Raja' Salomo mangapu maar 23,000 ngakilogram mas. Raja'-raja' ra pagun ru Arab am gabenor-gabenor giu' ra wilayah ru Israil niayuk mangani' ra mas am pirok riso.

¹⁵ Nambaal Raja' Salomo ra 200 perisai maayo ondo' moonong rondo' no inangkupan ra mas tinuyu' ra bagat no 7 ngakilogram.

¹⁶ Nambaal io niayuk ra 300 perisai boborok ondo' moonong rondo' no inangkupan ra mas tinuyu' ra bagat no 3 ngakilogram. Pinabanta' no ngaangai' perisai no giu' ra Dewan Kataunan Libanon.

¹⁷ Nambaal niayuk Raja' Salomo rondo' panturungan maayo intor ra gading ondo' inangkupan ra mas kopoyo.

¹⁸ Panturungan raginio mokoondo' onom tukar, am giu' ra ragana' nano mokoondo' rondo' tatampakan ra kalayam ondo' inangkupan niayuk ra mas. Panturungan raginio mokoondo' ra longon am giu' ra moonong kiing nano mokoondo' ra sinungkalalaing ru singa'.

¹⁹ Giu' ra tukar ru panturungan no, mokoondo' mopor am ruo sinungkalalaing ru singa'; rondo' sinungkalalaing ru singa' giu' ra pompor ru kait am rondo' poyo giu' ra pompor ru pamiris ra moonong tukar. Kolondo' rondo' pamarintaan pana ondo' nakaili' mokoondo' ra panturungan koson raginio.

²⁰ Ngaangai' sangkir ru Raja' Salomo binaal intor ra mas, am ngaangai' kuliamos giu' ra Dewan Kataunan Libanon no binaal intor ra mas kopoyo. Bulintok ru Raja' Salomo pirok kalo kinara' ra mologo.

²¹ Raja' Salomo mokoondo' ra masuang kapal maayo ondo' masundoi giu' ra raat malangka' mababaya' ra kapal-kapal ru Raja' Giram. Igondo' ralalom ru talu ngambilor, kapal-kapal ru Raja' Salomo minuli' nagibit ra mas, pirok, gading, gabuk am susuit tuou.

²² Raja' Salomo langkaya' poyo am mapintar poyo intor ra raja' ra bokon giti ra tana' ti.

²³ Ngaangai' raja' minatong koson rumongog ra kapintaran ondo' tinaakan ri Aki Kapuuno' ra Raja' Salomo.

²⁴ Moonong ulun ondo' manambului ra Raja' Salomo magibit ra taak riso – kuliamos intor ra pirok am mas, am niayuk bayang, kinandoi, apa' pampagamis ra akanon, kuda am baghal. Baal raginio nasauk ra bilor ka bilor.

²⁵ Raja' Salomo mokoondo' ra 4,000 kandang ru kurita' kuda am kuda nano. Mokoondo' io ra 12,000 ngaulun pulalai mangkuda. Santayaran intor ra pulalai raginio pinosoroi giu' ra Jirusalim, am ondo' bokon no pinosoroi giu' ra ati-ati bandar ra bokon.

²⁶ Raja' Salomo nanguasa' ra raja'-raja' giu' ra wilayah ondo' intok no intor ra Sungoi Iprat saboi ra pagun ru ulun ru Palistin am balitan ru Misir.

²⁷ Paat ra pamarintaan nano, pirok koson ra kuliamos kalo maatang koson ra batu giu' ra Jirusalim, am tataun sidar masuang koson ra tataun ara giu' ra lonson-lonson ru bulur giu' ra Jiuda.

²⁸ Raja' Salomo nambali ra kuda intor ri Musri am intor ra moonong pagun ra bokon.

Tunung mariwa' ra pamarintaan ru Raja' Salomo

²⁹ Ngaangai' binaal ru Raja' Salomo intor ra talimpuun saboi ra pupus mokoondo' tinulisan ralalom ru Kitab Sejarah ru Nabi Natan, Kitab Inala' ri Agia intor ra Silo, am Kitab Pinaintalang ru Nabi Ido, am niayuk mokoondo' ra sejarah ru pamarintaan ru Raja' Jirobiam giu' ra Israil.

³⁰ Raja' Salomo nasauk ra raja' giu' ra Jirusalim am namarinta ra titikop ru Israil buoi no apat ngoopor ngambilor.

³¹ Io minatoi am linobong giu' ra Bandar Daut. Anak nano, i Rigabiam minalit riso koson ra raja'.