2 TUNUNG RU BANSA' ISRAIL 8 - Tanou Moonsoi Timugon

Binaal-binaal moonsoi ru Raja' Salomo

¹ Buoi ru Raja' Salomo no ruo ngoopor ngambilor koson nambaal ra Baloi ru Tuhan am istana nano.

² Nambaal io niayuk saguli' ra bandar-bandar ondo' tinaakan ru Raja' Giram riso am nanusub ra ulun ru Israil minayan ra giu' no.

³ Ginaau ru Raja' Salomo libung Gamat am Joba,

⁴ am nangikang ra bandar Tadmor giu' ra tana' kaagisan. Binaal no saguli' ngaangai' bandar giu' ra Gamat ondo' ragili pusor pambulian ra ulaan.

⁵ Raja' Salomo niayuk nambaal saguli' ra bandar-bandar ragitio: Bit-Oron-Ralayo am Bit-Oron-Rabugus (bandar-bandar mokoondo' ra kubu am kulobon-kulobon garabang ondo' mokoondo' ra alor),

⁶ bandar Baalat, ngaangai' bandar intok nano mambuli ra ulaan, am bandar-bandar papaayanan ra kuda am kurita' kuda nano. Koon raginio noyo io nambaal ra bangunan-bangunan giu' ra Jirusalim, Libanon am titikop intok ondo' kinuasa' nano.

^7-8 Raja' Salomo nanusub ra ulun papag ru ulun ru Kanaan koson mambaal ra kandoi pajajalon; ilo ulun ru Git, Amori, Piris, Giwi am Jibusi, ondo' kalo pinatoi ru ulun ru Israil paat ra ilo nampagaau ra tana' no ragili. Papag ru ngaangai' ulun no lakat poyo nasauk ra inulipon saboi raino.

⁹ Kaa' ulun ru Israil kalo sinusub mambaal ra kandoi pajajalon. Ilo mangandoi koson ra saujor, pagawai, panglima ru pulalai mangkurita' kuda am ulun ru pulalai mangkuda.

¹⁰ 250 ngaulun suang ru pagawai naningganai ra ulun inulipon ondo' nangandoi ralalom nansalinut inatangan ra pambaalan.

¹¹ Pinabanding ru Raja' Salomo andu' nano, anak ruandu' ru raja' ru Misir, intor ra bandar Daut pinoongoi ra intok ayanan ondo' binaal timpokon koson ra andu' nano. Indagu Raja' Salomo, “Kalo paayanon io giu' ra istana ru Raja' Daut, raja' ru Israil, sabap ra ati-ati Kaban Nabantuan nakaili' binulian, intok raginio matulai.”

¹² Nampataak Raja' Salomo ra taak simbalui koson mapabansuk ra guang ru Tuhan giu' ra rasawat ru altar ondo' binaal nano giu' ra saang Baloi ru Tuhan.

¹³ Nampataak io ra taak simbalui koson mapabansuk ra guang ru Tuhan sumugut ra kaulayan ru Ukum ri Musa ra moonong pangiantakan ondo' inaru': orou Sabat, Pangiantakan ra Sila' Bagu, am talu poyo pangiantakan ru kabilaran, iono Pangiantakan ra Ruti' Kalo Linatakan ra Ragi, Pangiantakan Mangkumos am Pangiantakan Mangkalukub ra Raun.

¹⁴ Sumugut ra kaulayan ondo' inaru' ru Raja' Daut, ama' nali, Raja' Salomo nangaru' ra kandoi moonong orou tayar ru imam-imam am ulun-ulun ru Liwi ondo' mangindangan ra imam marimbai ra rimbai-rimbai mazmur, am niayuk mangindangan ralalom kandoi ru imam. Raja' Salomo niayuk nampatampos ra pulalai ru ulun magalung ra Baloi ru Tuhan ra kandoi moonong orou nilo giu' ra moonong kulobon garabang, sumugut ra susuban ru Raja' Daut, ulipon ri Aki Kapuuno' no.

¹⁵ Susuban ru Raja' Daut ra imam-imam am ulun-ulun ru Liwi intor ra intok-intok pambulian am baal-baal ra bokon, ngaangai' no pinaugar noyo ra matanda'.

¹⁶ Raino ngaangai' inatangan ru pambaalan ondo' inatang ru Raja' Salomo nopongo noyo. Intor ra napabantaan ra batu maatang ra Baloi ru Tuhan saboi ra nopongo nambaalan no, ngaangai' no pinaugar ra matanda'.

¹⁷ Kopongo raginio minongoi Raja' Salomo ra Ijion-Gibir am Ilot, bandar-bandar raralan ru kapal giu' ra nagas ru Teluk Akaba, giu' ra pagun ru Idom.

¹⁸ Nangator Raja' Giram ra kapal-kapal ondo' pinaugar ru pagawai-pagawai nano galama' am niayuk ulun-ulun ru kapal ondo' mangapandai, ra Raja' Salomo. Nababaya' ra pagawai-pagawai ru Raja' Salomo, nasundoi ilo ra tana' Opir am nagibit ra nasailan intor ra 15,000 ngakilogram mas pataakon ra Raja' Salomo.