2 TUNUNG RU BANSA' ISRAIL 7 - Tanou Moonsoi Timugon

Patimpokon Baloi ru Tuhan

¹ Kopongo Raja' Salomo nakiasi', apui riminatu' intor ra limbowon am nonolob ra taak-taak simbalui ondo' pinataak no, am sinda ratangan ru Tuhan nakatikop ra Baloi ru Tuhan.

² Sabap ra Baloi ru Tuhan natikop ra sinda ratangan ru Tuhan, imam-imam pana kalo boo makaumpos ra ralalom no.

³ Paat ra ulun ru Israil nakakito ra apui riminatu' intor ra limbowon am sinda ratangan ru Tuhan nakatikop ra Baloi ru Tuhan, igulatur ilo ra sulig am samba ri Aki Kapuuno'. Nongompor ilo Riso ra kinoonsoi Nano am togom Nano ondo' mantilayun.

⁴ Kopongo raginio Raja' Salomo am ngaangai' ulun nampataak ra taak simbalui ra Tuhan.

⁵ Nampataak Raja' Salomo ra 22,000 ngainan sapi' am 120,000 ngainan domba koson ra taak simbalui koson makibarakat ra Tuhan. Koon raginio noyo Raja' Salomo am ngaangai' ulun nampatimpok ra Baloi ru Tuhan.

⁶ Imam-imam minigor giu' ra intok ondo' inaru' noyo risilo, am ulun ru Liwi minigor tumingkuang risilo. Ulun ru Liwi mongompor ra Tuhan mabaya' ra kuliamos miujik ondo' tinampos noyo ru Raja' Daut, liliwa' marimbai ra rimbai “Togom Nano Mantilayun!” sumugut ra nanusuban ru Raja' Daut. Imam-imam nanamput ra bujung liliwa' ngaangai' ru mamagun minigor.

⁷ Patimpokon ru Raja' Salomo tampilon ra tatanga' ru liliut, iono giu' ra intok tampilon ra saang ru Baloi ru Tuhan. Giu' no nampataak io ra taak simbalui koson mapabansuk ra guang ru Tuhan, taak simbalui kaunaran, am lomok ru bibiag intor ra taak simbalui koson makibarakat ra Tuhan. Nampataak raja' ra ngaangai' no ra giu' no sabap ra altar gangsa' ondo' binaal nano boborok kaga' koson ra ngaangai' ru taak simbalui no.

⁸ Raja' Salomo am ngaangai' ulun ru Israil mangiantak ra Pangiantakan Mangkalukub ra Raun buoi no tulu' ngoorou. Masuang kaga' ulun ondo' minatong koson mangiantak ra pangiantakan no. Minatong ilo intor ra libung kinagalur ru Ginting Gamat giu' ra ralayo am balitan ru pagun ru Misir giu' ra rabugus.

⁹ Natimung ilo buoi tulu' ngoorou koson mangiantak ra napatimpakan ra altar, am nangiantak ilo ra Pangiantakan Mangkalukub ra Raun buoi tulu' ngoorou poyo. Paat ra orou pupus nambaal ilo ra pangiantakan ru kaampusan.

¹⁰ Suabon no boo, orou ra karuo ngoopor am talu sila' katulu', nanusub Raja' Salomo ra ngaangai' ulun no muli'. Ilo ngaangai' naansukan sabap ra barakat-barakat ondo' tinaakan ru Tuhan ra ulun Nano Israil, ri Raja' Daut, am Raja' Salomo.

Minintalang poyo i Aki Kapuuno' ra Raja' Salomo

¹¹ Paat ra Raja' Salomo nopongo nambaal ra Baloi ru Tuhan am istana, am niayuk ngaangai' ondo' inatang nano,

¹² minintalang poyo Tuhan ra Raja' Salomo ra iorondom. Indagu Io ra Raja' Salomo, “Norongog Ku noyo pakiasian muno, am apuon Ku Baloi ti koson ra intok timpokon koson mampataak ra taak simbalui Raki'.

¹³ Paat ra Aku kalo namparasam, kapoam nanusub ra gapu' mangakan pangai' ra tinanom, kapoam mamparatong ra maruol tumapik ra ulun Kuno,

¹⁴ kaa' amon kalo makiasi' ilo Raki' am tumalikur intor ra tula am lumonggo' mambaal ra malaat, am intor ra suruga' mangkirongog Aku risilo, am mangampun ra tula nilo, am niayuk mampasauk ra pagun nilo langkaya' saguli'.

¹⁵ Alungin Ku Baloi Kutu am nakatampos mangkirongog ra ngaangai' pakiasian ondo' raguon ragiti,

¹⁶ sabap ra pinili' Ku noyo ginio am timpokon ginio koson ra intok sambayangan ru ulun Raki' ra sabubuoi no. Magail Aku magalung am manindung raginio.

¹⁷ Amon ru mangandoi kou ayuk Raki' am gumagaya' koson ra ama' muli i Daut, gumagaya' ra ngaangai' ukum Kuno, am niayuk mambaal ra ngaangai' ondo' nanusuban Ku noyo rirun,

¹⁸ suguton Ku bantu' Kuno ra ama' muli i Daut, paat ra Aku minindagu riso ra Israil magail parintaan ru papag nano.

¹⁹ Kaa' amon ru okou am mamagun muno kalo gumagaya' ra ukum am susuban ondo' tinaakan Ku noyo ramuyun, am sumamba ra tuhan-tuhan ra bokon,

²⁰ Aku pana mamatir ramuyun intor ra pagun ondo' tinaakan Kutu ramuyun, am mangiruan ra Baloi ti ondo' timpokon Kutu koson ra intok sambayangan Raki'. Ulun giu' ra ati intok magagasab am mangingiis ra Baloi ti.

²¹ Raino Baloi ti urumaton kaga' ru ulun, kaa' tauli no moonong ulun ondo' mansail mangimuag am mangkuot, ‘Kua kia ra Tuhan nambaal koson raginio ra pagun am Baloi ti?’

²² Kopongo raginio tumaam ulun, ‘Sabap ra nangiruan ilo noyo ra Tuhan, i Aki Kapuuno' nilo, ondo' nagibit ra kinamatuaan nilai miningkual intor ra Misir. Sinamba nilo tuhan-tuhan ra bokon am nangandoi ayuk boo ra tuhan-tuhan ra bokon. Ginio sabap ra Tuhan namparatong ra karaat ti risilo.’ ”