2 TUNUNG RU BANSA' ISRAIL 6 - Tanou Moonsoi Timugon

Ragu ru Raja' Salomo posoboyon ra mamagun

¹ Raja' Salomo pana pakiasi' boo, “Iou Tuhan, masaga' Kou poyo mayan ralalom ru kalandaman ru gaun.

² Raino binaalan Tokou ra rondo' baloi ondo' maindon, koson intok ayanan Muno ra sabubuoi no.”

³ Ngaangai' ulun ru Israil tatanga' migor ra giu' no. Kopongo raginio tingkuang raja' magilong risilo, am nakitaak ri Aki Kapuuno' mambarakat risilo.

⁴ Indagu raja', “Koompor noyo Tuhan, i Aki Kapuuno' ru Israil! Sinugut No bantu' Nano ra ama' kuli, Raja' Daut, paat ra Io minindagu ra Raja' Daut koon ragitio,

⁵ ‘Intor ra Aku nagibit ra ulun Kuno miningkual intor ra Misir, kalo igondo' aku nampili' ra bandar ra ati pana ra titikop ru Israil koson ra intok pambaalan ra rondo' baloi, intok sambayangan Raki', am kalo igondo' Aku nampili' ra osoi pana koson maningganai ra ulun Kuno Israil.

⁶ Kaa' raino nampili' Aku ra Jirusalim koson ra intok sambayangan Raki', am okou Daut, mamarinta ra ulun Kuno.’ ”

⁷ Kon poyo ru Raja' Salomo, “Ama' kuli, Raja' Daut, nangatang koson mambaal ra rondo' baloi koson ra intok sambayangan ra Tuhan, i Aki Kapuuno' ru Israil.

⁸ Kaa' indagu Tuhan riso, ‘Kuayan muno koson mambaal rondo' baloi Raki' no moonsoi,

⁹ kaa' okou kalo mambaal raginio. Anak muno, anak muno galama', mambaal ra baloi Raki'.’

¹⁰ “Raino sinugut ru Tuhan bantu' Nano. Minalit Aku ra ama' kuli koson ra raja' ru Israil am nambaal aku rondo' baloi koson intok sambayangan ra Tuhan, i Aki Kapuuno' ru Israil.

¹¹ Pinabanta' ku noyo Kaban Nabantuan giu' ra ralalom Baloi ru Tuhan, Kaban ondo' sinuangan ra batu-batu nabantuan ondo' binaal ru Tuhan am ulun ru Israil.”

Pakiasian ru Raja' Salomo

¹² Kopongo raginio giu' ra saang ru mamagun, minigor Raja' Salomo tumingkuang ra altar. Kakato' no karuruo longon nano am pakiasi'. (

¹³ Nambaal noyo Raja' Salomo rondo' pentas intor ra gangsa' am pinabanta' no giu' ra tatanga' ru liliut no. Gayo no 2.2 ngamito persegi, am sawat no 1.3 ngamito. Giu' ra saang ru ngaangai' ulun ondo' minatong, nagaloi io ra rasawat ru pentas no am igulatur. Kopongo raginio kakato' no karuruo longon nano ra limbowon.)

¹⁴ Pakiasi' io, “Iou Tuhan, i Aki Kapuuno' ru Israil, kolondo' ondo' koson Rirun giu' ra limbowon am giti ra tana' ti. Sinugut Mu bantu' Muno ra ulun Muno, am nampakito Kou ra togom Muno risilo paat ra ilo gumagaya' Rirun ra sototopot ru guang.

¹⁵ Sinugut Mu bantu' Muno ra ama' kuli i Daut. Paat ra orou raiti', sinugut Mu atan ondo' binantu' Muli.

¹⁶ Ginio ra iou Tuhan, i Aki Kapuuno' ru Israil, suguto' niayuk bantu' ondo' rondo' poyo ra ama' kuli. Minindagu Kou riso ra intor ra papag nano, magail mokoondo' sangulun koson mamarinta koson ra raja' ru Israil, ondo' ra ilo gumagaya' ra Ukum Muno koson ra Raja' Daut.

¹⁷ Ginio ra iou Tuhan, i Aki Kapuuno' ru Israil, suguto' noyo ngaangai' ondo' binantu' Muno ra ama' kuli Raja' Daut, ulipon Muli.

¹⁸ “Kaa', iou Aki Kapuuno', topot kia masaga' Kou mayan giti ra tana' ti ra gino ngai' ru ulun? Sotopot no titikop ru limbowon pana kalo sama' malangka' Rirun, atan pinai boo ra Baloi ondo' binaal kutu!

¹⁹ Iou Tuhan, i Aki Kapuuno' kuno, aku ti ulipon Muno. Rongogo' noyo pakiasian kutu, am iowo' noyo kitaakon kuno.

²⁰ Sindungi' noyo Baloi ti ra orou am rondom. Binantu' Mu noyo ra gitio noyo intok ru ulun sumambayang Rirun. Rongogo' noyo aku paat ra aku tumingkuang ra Baloi ti am makiasi' Rirun.

²¹ Rongogo' noyo pakiasian kuno am pakiasian ru ulun Muno Israil paat ra ilo tumingkuang ra intok ragitio am makiasi'. Intor ra intok ayanan Muno giu' ra suruga', rongogo' akai no am ampuno' akai no.

²² “Paat ra sasangulun uwin ra makasala ra ulun bokon, am susubon magibot ra saang ru altar ra Baloi ti ra kolondo' sala nano,

²³ rongogo' noyo, iou Tuhan intor ra suruga', am akimi' noyo ulipon-ulipon Muno. Ukumi' noyo ulun ondo' makasala am palabuso' noyo ulun ondo' kolondo' sala.

²⁴ “Paat ra ulun ru Israil kinala ru pantula' sabap ra makatula ilo noyo Rirun, am siminaguli' ilo Rirun am minatong ra Baloi ti am niayuk makiasi' Rirun mabaya' ra guang minggana' am makiampun,

²⁵ gama' ru Okou giu' ra suruga' mangkirongog risilo. Ampuno' noyo tula ru ulun Muno, am ibito' ilo sumaguli' ra pagun ondo' tinaakan Mu noyo risilo am kinamatuaan nilai.

²⁶ “Paat ra Okou kalo mamparasam sabap ra ulun Muno makatula noyo Rirun, am tumalikur ilo intor ra tula am tumingkuang ra Baloi ti am niayuk makiasi' Rirun mabaya' ra guang minggana',

²⁷ iou Tuhan giu' ra suruga', iowo' noyo kitaakon nilo am ampuno' noyo tula ru ulipon-ulipon Muno, ulun ru Israil. Pangila' no risilo mambaal ra atan ondo' motopot, am patuuno' noyo rasam ra pagun Mutu, ondo' tinaakan Mu noyo ra ulun Muno koson ra tungkuson nilo ra sabubuoi no.

²⁸ “Paat ra bitilan am maruol tumapik masauk ra pagun ti, kapoam tinanom mapuso sabap ra angin malasu', maruol ru tatanom, kapoam kokoton ru gapu'; kapoam paat ra ulun Muno bulunsaron ru pantula', kapoam maruol,

²⁹ rongogo' noyo pakiasian nilo. Amon mokoondo' ulun ra gino ngai' ru ulun Muno Israil, mabaya' ra guang mangiluk kakaton kalindu' am makiasi' Rirun liliwa' tumingkuang ra Baloi ti,

³⁰ rongogo' noyo pakiasian nilo. Rongogo' ilo intor ra intok ayanan Muno giu' ra suruga' am ampuno' ilo. Okou ayuk ondo' makapandai ra suang ru guang ru ulun. Ginio ra pamakuan ra moonong ulun mogondo' ra binaal nano,

³¹ maa' raginio ulun Muno malaa' am gumagaya' Rirun buoi nilo mayan ra pagun ondo' tinaakan Mu noyo ra kinamatuaan maili.

³² “Paat ra sangulun bansa' ra bokon ondo' mayan ra pagun maalur mokorongog ra katulayan am kaikangan Muno, am ra Okou magail tumampos mangindangan, am matong ilo ra Baloi ti am makiasi' Rirun,

³³ rongogo' noyo pakiasian nano. Rongogo' io intor ra intok ayanan Muno giu' ra suruga', am iowo' kitaakon nano, maa' raginio ngaangai' bansa' ra tana' ti makaulig Rirun am gumagaya' Rirun, koson ra ulun ru Israil. Ilo pana makapandai boo ra Baloi ondo' binaal kutu iono intok koson sumambayang Rirun.

³⁴ “Paat ra Okou mamarinta ra ulun Muno mangayou ra pantula', am makiasi' ilo Rirun ra ati ayuk sinarayan nilo, liliwa' tumingkuang ra bandar ondo' pinili' Kutu am Baloi ondo' binaal ku noyo Rirun,

³⁵ rongogo' noyo pakiasian nilo. Okou giu' ra suruga', rongogo' noyo ilo am anii' noyo ilo ra kamanangan.

³⁶ “Paat ra ulun Muno makatula Rirun – sabap kolondo' osoi pana ondo' kolondo' tula – am sabap ra sangit Muno nompoloso Kou risilo kinala, rinakop ru pantula', am inibit ra pagun ra bokon, kabalu' pana pagun no maalur,

³⁷ rongogo' noyo pakiasian ru ulun Muno. Amon ru tumalikur ilo intor ra tula am makiasi' Rirun giu' ra pagun no, am niayuk mangiou ra makatula ilo noyo am nambaal ra malaat, rongogo' noyo pakiasian nilo, iou Tuhan.

³⁸ Amon giti ra pagun ti tumalikur ilo intor ra tula ra sototopot ru guang am makiasi' Rirun liliwa' tumingkuang tampilon ra pagun ti ondo' tinaakan Mu noyo ra kinamatuaan maili, am tampilon ra bandar ondo' pinili' Mu noyo, am niayuk Baloi ti ondo' binaal ku noyo Rirun,

³⁹ rongogo' noyo pakiasian nilo. Intor ra intok ayanan Muno giu' ra suruga', rongogo' noyo ilo am pakaasi' noyo risilo. Ampuno' noyo ngaangai' tula ru ulun Muno.

⁴⁰ “Raino, iou i Aki Kapuuno' kuno, tantangi' akai am rongogo' pakiasian ondo' pinasaboi Rirun ra intok ragitio.

⁴¹ Ingkakat no raino, iou Tuhan i Aki Kapuuno', am mabaya' ra Kaban Nabantuan tatandu' ru kuasa' Muno, umpos no ra Baloi ti am ayan no ragiti ra sabubuoi no. Barakato' noyo imam-imam Muno ralalom ru ngaangai' kandoi nilo, am gama' ru ngaangai' ulun Muno maansukan ra kinoonsoi Muno risilo.

⁴² Iou Tuhan i Aki Kapuuno', pai' impayi' raja' ondo' pinili' Mu noyo. Karaa' togom Muno ra ulipon Muli i Daut.”