2 TUNUNG RU BANSA' ISRAIL 5 - Tanou Moonsoi Timugon

¹ Kopongo ru Raja' Salomo nambaal ra Baloi ru Tuhan, binulian no ngaangai' pirok, mas am kuliamos ra bokon ondo' patimpokon koson ra Tuhan ru ama' nali, Raja' Daut, giu' ra ralalom intok-intok pambulian ra Baloi ru Tuhan.

Kaban Nabantuan inibit ra Baloi ru Tuhan

² Kopongo raginio nanusub Raja' Salomo ra ngaangai' tingganai ru bansa'-bansa' ru Israil tumimung giu' ra Jirusalim, koson mapabanding ra Kaban Nabantuan ru Tuhan intor ra Sion, Bandar Daut, poongoyon ra Baloi ru Tuhan.

³ Ngaangai' ilo timinimung paat ra Pangiantakan Mangkalukub ra Raun.

⁴ Pakatimung ngaangai' tingganai no, ulun ru Liwi nangkayang ra Kaban Nabantuan

⁵ am inibit ginio giu' ra ralalom Baloi ru Tuhan. Imam-imam am ulun-ulun ru Liwi napabanding ra Kim ru Tuhan am ngaangai' kuliamos nano giu' ra ralalom Baloi ru Tuhan.

⁶ Raja' Salomo am ngaangai' ulun ru Israil natimung giu' ra saang ru Kaban Nabantuan, am nampataak ra taak simbalui koson ra domba am sapi' ondo' masuang kaga', saboi kalo mauntob suang no.

⁷ Kopongo raginio imam-imam nagibit ra Kaban Nabantuan giu' ra Baloi ru Tuhan, am pinabanta' ginio giu' ra Lamin Matulai Kaga', ragana' ru sinungkalalaing kirub.

⁸ Kawo ru kirub-kirub no nabilar am nakataub ra Kaban no am niayuk tataun pinamandas no.

⁹ Tataun pinamandas no maawar kaga', saboi pompor no makito intor ra saang ru Lamin Matulai Kaga', kaa' kalo makito intor ra intok ra bokon. (Tataun-tataun pinamandas no lakat poyo soroi ra giu' no saboi raino.)

¹⁰ Kaban Nabantuan sinuangan ayuk ra ruo batu ondo' pinabanta' ra giu' no ri Musa giu' ra Gunung Sinai ragili, paat ra Tuhan nambaal ra nabantuan Nano ra ulun ru Israil, nalupus ilo miningkual intor ra Misir.

Katulayan ru Tuhan

^11-14 Ngaangai' imam intor ra moonong pulalai ru siminaang ra giu' no namasau ra inan. Ngaangai' maririmbai ru ulun ru Liwi, iono i Asap, i Giman am i Jidutun, am niayuk ulun-ulun ru bansa' nilo, nambayang ra konoon linon. Ulun ru Liwi minigor tampilon ra sirangon ru altar am nampaguut ra simbal am jitor. Nababaya' risilo mokoondo' 120 ngaulun imam ondo' nanamput ra bujung. Rimbai ru ulun-ulun maririmbai nagagampan ra iniis ru bujung, simbal am kuliamos miujik ra bokon. Gitio noyo sinulabit ru rimbai ondo' rinimbai nilo koson mongompor ra Tuhan: “Omporo' noyo Tuhan, sabap Io moonsoi, togom Nano mantilayun.” Paat ra imam-imam mingkual intor ra Baloi ru Tuhan, pulali' ru Baloi ru Tuhan nototop ra gaun ondo' makasinda ra sinda ru ratangan ru Tuhan, saboi kalo boo makarayus nilo upacara sambayang.