2 TUNUNG RU BANSA' ISRAIL 3 - Tanou Moonsoi Timugon

¹ Raja' Daut, ama' ru Raja' Salomo, nangaru' noyo ra tana' ru Baloi ru Tuhan. Intok no giu' ra Jirusalim, giu' ra rasawat ru Bulur Moria, ondo' pinakai ri Arauna, ulun ru Jibusi no, koson ra intok mangagik ra gandum. Giu' no minintalang Tuhan ra Raja' Daut. Tinalimpuunan ru Raja' Salomo pambaalan

² paat ra sila' karuo bilor kaapat ra pamarintaan nano.

³ Baloi ru Tuhan ondo' binaal ru Raja' Salomo no ra gawar no 27 ngamito am pila' no 9 ngamito.

⁴ Lamin ra saang ra pila' no mogondo' ra pila' ru Baloi ru Tuhan, iono 9 ngamito, am sawat no 54 ngamito. Tampilon ra ralalom ru lamin no inangkupan ra mas kopoyo.

⁵ Lamin maatang no linapisan ra tataun sidar, am inangkupan poyo ra mas kopoyo toojo. Ginio ra lapisan ru mas no mokoondo' ra ukiran ru puun-puun tataun palma am tinayung ra rantai.

⁶ Raja' Salomo namunga' ra Baloi ru Tuhan ra intan-intan ondo' moonsoi am ra mas ondo' binali intor ra tana' Parwaim.

⁷ Namakai io ra mas no koson palapison ra rinding-rinding, tataun-tataun bandayan ra taap, angob-angob ru kulobon, am kulobon-kulobon ra Baloi ru Tuhan. Pamarindingan no inukiran ru ulun-ulun mangukir ra gambar-gambar ru kirub.

⁸ Lamin tampilon ra ralalom, ondo' sabiton ra Lamin Matulai Kaga', gawar no 9 ngamito, am pila' no 9 ngamito niayuk, iono koson ra pila' ru Baloi ru Tuhan. Lamin Matulai Kaga' inangkupan ra mas ondo' bagat no nasailan intor ra 20 ngatan,

⁹ am 570 ngagram mas pinakai koson mambaal ra paku'. Rinding ru lamin-lamin giu' ra tampas rasawat niayuk inangkupan ra mas.

¹⁰ Nanusub niayuk Raja' ra ulun-ulun manukang nano koson mambaal ruo sinungkalalaing kirub intor ra logam, am inangkupan karuruo no ra mas, am pinabanta' ginio giu' ra Lamin Matulai Kaga'.

^11-13 Giu' no sinungkalalaing ru kirub no pinabigor ra maganding am pinatingkuang ra kulobon. Karuruo no makakawo ruo, am moonong kawo ra sawat no 2.2 ngamito. Kawo-kawo no nabingkal saboi pompor no makatiu' ra rondo' am bokon giu' ra tatanga' ru lamin, am pompor tampilon ra bokon no makatiu' ra rinding ra sapapa' am sapapa' ru lamin no. Kawo-kawo no nabingkal ra pila' no 9 ngamito, iono koson ra pila' ru lamin no.

¹⁴ Tabir ru Lamin Matulai Kaga' no binaal intor ra konoon linon am konoon-konoon ra bokon ondo' batik no motomou, matanggilung am malia'; tabir no binungaan ra gambar-gambar ru kirub.

Ruo ngantaun lugu' gangsa' ondo' maayo

¹⁵ Nambaal raja' ra ruo ngantaun lugu' gangsa', moonong rondo' sawat no 15.5 ngamito. Lugu'-lugu' no pinotolorog giu' ra saang ru Baloi ru Tuhan. Moonong lugu' mokoondo' rondo' ulu gangsa' ondo' sawat no 2.2 ngamito.

¹⁶ Tampilon ra rasawat ru lugu'-lugu' no binungaan ra rantai ondo' nangkikiting am maatus kawa' ru dalima' intor ra gangsa'.

¹⁷ Lugu'-lugu' no tinolorog ra tampilon pamiris am kait ra kulobon ru Baloi ru Tuhan: ondo' tampilon ra rabugus ininggalanan ra Jakgin am ondo' tampilon ra ralayo ininggalanan ri Boas.