2 TUNUNG RU BANSA' ISRAIL 23 - Tanou Moonsoi Timugon

Guor manggal ra Raja' Ruandu' Atalya

¹ Kopongo naginaa buoi onom ngambilor, bagu no Imam Joyada minimbuor. Nambaal io ra paguguuman ra limo ngaulun pagawai ru saujor: I Ajaria anak ri Jigoram, Ismail anak ri Joganan, Ajaria anak ri Obid, Maasiya anak ri Adaya am Ilisapat anak ri Jikri.

² Inongoi nilo ngaangai' bandar giu' ra Jiuda am nanimung ra ulun ru Liwi am ngaangai' tingganai ru bansa', am nagibit risilo minongoi ra Jirusalim.

³ Ilo ngaangai' timinimung giu' ra Baloi ru Tuhan am nambaal ra nabantuan ri Joas anak ungkuyon ru Raja' Agajia. Kon ri Joyada risilo, “Gitio noyo anak ungkuyon ru raja'. Raino io ondo' musiti' masauk ra raja', koson ra ondo' binantu' noyo ru Tuhan intor ra papag ru Raja' Daut.

⁴ Gitio noyo ondo' musiti' takau baalon. Paat ra imam-imam am ulun-ulun ru Liwi matong mangandoi paat ra orou Sabat, sampitalu intor risilo musiti' magalung ra kulobon garabang Baloi ru Tuhan,

⁵ am sampitalu poyo magalung ra istana, am ondo' bokon magalung giu' ra Kulobon Garabang ra Puun. Ngaangai' mamagun musiti' tumimung giu' ra liliut Baloi ru Tuhan.

⁶ Kolondo' osoi pana iowon sumubol ra ralalom Baloi ru Tuhan, ondo' ak am imam-imam am ulun-ulun ru Liwi ondo' tatanga' mangandoi. Iowon ilo sabap ra ilo patimpokon noyo. Kaa' ngaangai' ulun ra bokon musiti' gumagaya' ra susuban ru Tuhan am mayan giu' ra liwar.

⁷ Ulun ru Liwi musiti' magalung giu' ra liput ru raja' am mampaguut ra ilang. Musiti' ilo magalung ra raja' ra ati ayuk angayan nano. Osoi ayuk pana kuminam sumubol ra Baloi ru Tuhan musiti' potoyon.”

⁸ Koon raginio noyo ulun ru Liwi am mamagun ru Jiuda nampaugar ra susuban ri Joyada. Ulun ondo' nopongo nangandoi paat ra orou Sabat kalo iniou muli'. Ginio ra tingganai-tingganai nakapanusub ra ulun ondo' nopongo nangandoi am niayuk ulun ondo' bagu matong koson mangandoi.

⁹ Nangani' i Joyada ra pagawai-pagawai ru saujor no ra tutura' am perisai, ondo' ragili linonggom ru Raja' Daut, am ondo' binulian giu' ra ralalom Baloi ru Tuhan.

¹⁰ Pinosoroi ri Joyada ulun nampaguut ra ilang giu' ra titikop tampilon ra saang ru Baloi ru Tuhan koson manindung ra raja'.

¹¹ Kopongo raginio nagibit i Joyada ri Joas miningkual, pinasampak karaun giu' ra ulun nano, am nangani' riso ra rondo' kitab ondo' suang no ukum-ukum ra tayar ru raja' ondo' mamarinta. Koon raginio noyo i Joas sinauk ra raja'. Kopongo raginio Imam i Joyada am anak-anak nano nampasasar ra umau ra tayar ru upacara palantikan ra raja' ra ulu ru Raja' Joas, am ngaangai' ulun giminolok, “Kaayag noyo raja'!”

¹² Raja' Ruandu' Atalya nokorongog ra mamagun nagilakup manguma' ra raja'. Naringkaagou io minongoi ra Baloi ru Tuhan, giu' ra intok ru ulun masuang timinimung.

¹³ Raja' Ruandu' Atalya nakakito ra raja' ondo' bagu, migor giu' ra kulobon sumubol ra Baloi ru Tuhan, intok io linantik, linimpuan ru pagawai-pagawai ru saujor am ulun manamput ra bujung. Ilo ngaangai' nagilakup am naansukan liliwa' nanamput ra bujung. Ulun-ulun mangkuli ra miujik giu' ra Baloi ru Tuhan nanumbaya' ra upacara no ra kuliamos miujik nilo. Raja' Ruandu' Atalya namparilak ra bayang nano sabap ra magalabo am siminangit. Golok io, “Mamparuung! Mamparuung!”

¹⁴ Kalo nangiou i Joyada ra potoyon Raja' Ruandu' Atalya giu' ra liliut ru Baloi ru Tuhan. Kon ri Joyada ra pagawai-pagawai ru saujor, “Ibito' raja' ruandu' ra tatanga' ru barisan ru ulun magagalung. Potoyo' osoi ayuk ondo' kuminam mamayag riso.”

¹⁵ Rinakop nilo Raja' Ruandu' Atalya am inibit io ra istana, am pinatoi io giu' ra Kulobon Kuda.

Nambaal i Joyada ra panalimbaguan

¹⁶ Imam Joyada nangkimait ra Raja' Joas am mamagun mambaal ra nabantuan ra ilo masauk ra ulun ru Tuhan.

¹⁷ Ilo pana subol boo ra ralalom ru kuil Baal am nampalunsai ra kuil no. Pinopol nilo ngaangai' altar am sinungkalalaing ra giu' no. Pinatoi nilo niayuk i Matan, imam Baal no giu' ra saang ru altar-altar ra giu' no.

¹⁸ Pinangandoi ri Joyada imam-imam am ulun-ulun ru Liwi koson manalingapu ra kandoi giu' ra Baloi ru Tuhan sumugut ra pantayaran ra kandoi ondo' inaru' noyo ru Raja' Daut. Musiti' ilo mampataak ra taak simbalui koson mapabansuk ra guang ru Tuhan sumugut ra Ukum ri Musa. Ilo niayuk pinangandoi manalingapu ra miujik am pangiantakan.

¹⁹ I Joyada niayuk nampakandoi ra ulun-ulun magalung giu' ra kulobon garabang maa' raginio manginggalar ra osoi pana ondo' kalo maaya' koson sumambayang mumpos ra giu' no.

²⁰ Pagawai-pagawai ru saujor, tingganai-tingganai ru mamagun, pagawai-pagawai am ngaangai' mamagun minaya' ri Joyada namaya' ra raja' intor ra Baloi ru Tuhan mongoi ra istana. Siminubol ilo mansail ra kulobon maatang, am raja' pana nanturung giu' ra rasawat ru turungan nano.

²¹ Ngaangai' mamagun naansukan am bandar pana mamimio sabap ra Raja' Ruandu' Atalya pinatoi noyo.