2 TUNUNG RU BANSA' ISRAIL 22 - Tanou Moonsoi Timugon

Raja' Agajia, raja' ru Jiuda

¹ Kukula' ngaulun ru Arab minongoi panubol am namatoi ra ngaangai' anak ungkuyon ru Raja' Jigoram ondo' ak am Agajia, anak ungkuyon ra pupusan. Ginio ra mamagun ru Jirusalim nampalantik ri Agajia nasauk ra raja' koson minalit ra ama' nano.

^2-3 Raja' Agajia nasauk ra raja' paat io makaumur ruo ngoopor am ruo ngambilor am namarinta io giu' ra Jirusalim buoi sambilor. Raja' Agajia minaya' ra ralan kaayagan ru sasambaloi ru Raja' Agab, sabap ina' nano, i Atalya nambilin riso koson mambaal ra malaat. I Atalya iono anak ruandu' ru Raja' Agab, akupu ru Raja' Omri, raja' ru Israil.

⁴ Raja' Agajia makatula ra Tuhan sabap ra kalupus pinatayan ru ama' nali, kukula' ngaulun ra sasambaloi ru Raja' Agab nasauk ra ulun maminson riso; ilo noyo ondo' nangkinibit ra naratuan ru Raja' Agajia.

⁵ Sabap ra pinson nilo, Raja' Agajia naguguum ra Raja' Joram intor ra Israil koson mangayou ra Raja' Gajail, intor ra Siria. Pampatayan nasauk giu' ra Ramot ra libung ru Giliad, am Raja' Joram napilatan ra pampatayan no.

⁶ Raja' Joram pana minuli' boo ra Jijriil koson babason, am Raja' Agajia minongoi pagilong riso ra giu' no.

⁷ Inaru' noyo ri Aki Kapuuno' maa' raginio Raja' Agajia makauma' ra karatuan nano paat io mongoi ilong ra Raja' Joram. Paat ra Raja' Agajia soroi ra giu' no, io am Raja' Joram ginabu' ru sangulun ondo' inggalan no i Jigu anak ri Nimsi, ondo' pinili' noyo ru Tuhan koson mamuso ra sasambaloi ru Raja' Agab.

⁸ Paat ri Jigu nampaugar ra ukuman ru Tuhan ra sasambaloi raginio, nakauma' io ra sampulalai tingganai ru Jiuda am anak-anak ungkuyon ru pabukat ru Raja' Agajia ondo' minaya' ra ugar mongoi ilong no. I Jigu pana namatoi risilo ngaangai'.

⁹ Kopongo raginio nanusub i Jigu ra ulun maguyum ra Raja' Agajia. Rinakop io paat nansibuni giu' ra Samaria. Inibit nilo Raja' Agajia ri Jigu, am pinatoi io boo. Kabalu' pana raginio linobong nilo Raja' Agajia sabap ra mangurumat ilo ra aki nali, Raja' Josapat ondo' nangandoi ayuk ra Tuhan ra totopot ru guang. Kolondo' sangulun boo intor ra sasambaloi ru Raja' Agajia nakapalit ra pamarintaan.

Raja' Ruandu' Atalya nanguasa' ra Jiuda

¹⁰ Paat ra ina' ru Raja' Agajia nokorongog intor ra namatayan ra anak ungkuyon nano, ina' ru raja' no nanusub maa' raginio ngaangai' ulun ra sasambaloi ru raja' Jiuda potoyon.

¹¹ Raja' Agajia mokoondo' sangulun pabukat ra pansukapu ruandu' ininggalanan ri Josiba, ondo' nangindalaki ra sangulun imam ininggalanan ri Joyada. Sininok ri Josiba nangalap ri Joas, sangulun intor ra anak ungkuyon ru Raja' Agajia. Inalap ri Josiba i Joas intor ra anak-anak ungkuyon ru raja' ra bokon no, am binuni i Joas am ulun magalung riso no giu' ra rondo' lamin ra Baloi ru Tuhan. Koon raginio i Josiba namayag ri Joas intor ri Atalya ina' ru raja', ondo' masaga' mamatoi ra anak-anak ungkuyon ru raja'.

¹² Onom ngambilor buoi ri Joas binuni ra giu' no liliwa' i Atalya ina' ru raja', namarinta koson ra raja' ruandu'.