2 TUNUNG RU BANSA' ISRAIL 21 - Tanou Moonsoi Timugon

¹ Raja' Josapat minatoi am linobong giu' ra kalabangan ru raja' giu' ra Bandar Daut, am anak ungkuyon nano i Jigoram minalit riso koson ra raja'.

Raja' Jigoram, raja' ru Jiuda

² Raja' Jigoram anak ungkuyon ru Raja' Josapat, raja' ru Jiuda mokoondo' onom pabukat ra ungkuyon: I Ajaria, Jiwil, Jakaria, Ajariagu, Maikol am Sipatia.

³ Ama' nilo nangani' risilo ra masuang mas, pirok, kuliamos mongologo ra bokon, am sigagama' niayuk inanian ra rondo' bandar ondo' mokoondo' ra kubu giu' ra Jiuda. Sabap ra i Jigoram anak ungkuyon katuaan, linantik ru Raja' Josapat anak ungkuyon nano malit riso.

⁴ Kopongo Raja' Jigoram nangikang ra pamarintaan nano, pinatoi no ngaangai' pabukat ungkuyon nano, am niayuk kukula' ngaulun pagawai masawat.

⁵ Raja' Jigoram nasauk ra raja' paat ra io makaumur 32 ngambilor, am namarinta io giu' ra Jirusalim buoi balu' ngambilor.

⁶ Minaya' io ra ralan kaayagan ru Raja' Agab am raja'-raja' ru Israil ra bokon sabap ra inandu' no sangulun intor ra anak ruandu' ru Raja' Agab. Raja' Jigoram makatula ra Tuhan,

⁷ kaa' Tuhan marara' mamuso ra raja' papag ru Raja' Daut, sabap ra binantu' noyo ru Tuhan ra Raja' Daut ra papag nano mamarinta ra sabubuoi no.

⁸ Paat ra pamarintaan ru Raja' Jigoram, giminuor Idom ra Jiuda am nasauk ra pagun ra makapamarintaan galama'.

⁹ Ginio ra Raja' Jigoram am pagawai-pagawai nano minintor ra nangkurita' kuda am namulunsar ra Idom. Giu' no inawangan ilo ru saujor ru Idom, kaa' paat ra rondom no nakapagiru' ilo.

¹⁰ Intor raginio Idom kalo boo nakiala ra Jiuda. Paat raginio bandar Libna niayuk giminuor, sabap ra Raja' Jigoram nangiruan ra Tuhan, i Aki Kapuuno' ru kinamatuaan nano.

¹¹ Nambaal piboo Raja' Jigoram ra intok-intok sambaan ra sinungkalalaing giu' ra kagunungan ru Jiuda, am nangkinibit ra mamagun ru Jiuda am Jirusalim makatula ra Tuhan.

¹² Nangator Nabi Ilia ra rondo' surat ra Raja' Jigoram. Bolos ru surat no koon ragitio, “Tuhan, i Aki Kapuuno' ondo' sambaan ru Raja' Daut, kinamatuaan muli, mangukum rirun, sabap ra kalo minaya' kou ra binaal moonsoi ru Raja' Josapat ama' muli, kapoam binaal moonsoi ru Raja' Asa aki muli.

¹³ Kaa', binaya' mu ralan kaayagan ru raja'-raja' ru Israil, am nangkinibit ra mamagun ru Jiuda am Jirusalim kalo giminagaya' ri Aki Kapuuno', koson ra Raja' Agab am raja'-raja' ondo' tauli no nangkinibit ra Israil kalo giminagaya' ri Aki Kapuuno'. Pinatoi mu piboo pabukat-pabukat muli ondo' moonsoi poyo ka okou.

¹⁴ Ginio ra mangukum Tuhan ra mamagun, anak-anak am andu'-andu' muno ra maagat, am niayuk mamuso ra rapu' linonggom muno.

¹⁵ Okou galama' maimbolo' ra maruol ru tinai' ondo' lumanja' ra orou ka orou!”

¹⁶ Paat raginio mokoondo' ulun ru Palistin am ulun ru Arab ondo' mayan mamaar ra namagunan ru ulun Itiopia giu' ra tampilon ru nagas. Tinugog ru Tuhan guang nilo koson mangayou ra Raja' Jigoram.

¹⁷ Namulunsar ilo ra Jiuda, nampagaau ra rapu' giu' ra istana, am namparakop ra ngaangai' andu' am anak ungkuyon ru raja' ondo' ak am i Agajia, anak ungkuyon ra pupusan.

¹⁸ Kopongo ngaangai' baal raginio nasauk, pinaratong ru Tuhan maruol ru tinai' ondo' masaran ra Raja' Jigoram.

¹⁹ Buoi ru maar ruo ngambilor maruol no liminanjag-lanjag saboi pupus no raja' minatoi ra naimbolo' kaga'. Kalo nampaang mamagun ra apui maayo koson ra tatandu' mangulir riso, koson ondo' binaal ra kinamatuaan nano.

²⁰ Raja' Jigoram nasauk ra raja' paat io makaumur 32 ngambilor, am namarinta io giu' ra Jirusalim buoi balu' ngambilor. Kolondo' osoi pana mangiluk guang paat ra pinatayan nano. Linobong io giu' ra Bandar Daut, kaa' sala' ka kalabangan ru raja'.