2 TUNUNG RU BANSA' ISRAIL 2 - Tanou Moonsoi Timugon

Katampasan koson mambaal ra Baloi ru Tuhan

¹ Raja' Salomo namatas koson mambaal ra baloi, intok sambayangan ra Tuhan, am niayuk rondo' istana nano galama'.

² Nanusub io ra 70,000 ngaulun koson magaut ra kuliamos, 80,000 ngaulun koson mamahat ra batu giu' ra kabuluran, am 3,600 ngaulun mandur koson magalung ra kandoi no.

³ Nangator Raja' Salomo ra tanou ra Raja' Giram intor ra Tirus, “Pakimagamung raki' ra pantalanan koson ra okou nakimagamung ra pantalanan ra ama' kuli, Raja' Daut. Nantalan kou riso ra tataun sidar paat ra io nambaal ra istana nali.

⁴ Masaga' aku mambaal ra rondo' baloi sambayangan koson mangurumat ra Tuhan, i Aki Kapuuno' kuno. Baloi no masauk ra intok matulai, intok ru mamagun am aku galama' sumamba ra Tuhan am monolob ra kaminyan ondo' maamis owou; giu' no aku am mamagun kuno magail mampataak ra ruti' ondo' mapasau am niayuk taak simbalui koson mapabansuk ra guang ru Tuhan ra moonong susuab ti am mai' ti, paat ra orou-orou Sabat, paat ra pangiantakan ru Sila' Bagu, am paat ra pangiantakan ra bokon no. Aku am mamagun kuno masaga' mangurumat ra Tuhan, i Aki Kapuuno' mai. Namarinta Io ra ulun ru Israil am nambaal raginio ra sabubuoi no.

⁵ Mangatang aku koson mambaal ra rondo' baloi sambayangan ondo' matulai, sabap i Aki Kapuuno' mai matulai poyo intor ra tuhan-tuhan ra bokon.

⁶ Kaa' osoi kia ondo' totopot makabaal ra baloi ri Aki Kapuuno'? Titikop ru limbowon no pana kalo sama' gayo koson masauk ra intok ayanan Nano. Ginio ra baloi ondo' baalon kuno Riso koson ayuk ra intok koson monolob ra kaminyan ri Aki Kapuuno'.

⁷ Atari' sangulun manukang raki'. Musiti' io matuyu' mangukir am matasik mambaal ra kuliamos intor ra mas, pirok, gangsa' am basi', am niayuk matuyu' mambaal ra konoon makabatik motomou, matanggilung am malia'. Mangandoi io ra ulun manukang intor ra Jiuda am Jirusalim ondo' pinili' ru ama' kuli, Raja' Daut.

⁸ Nakapandai aku ra mokoondo' kou ra ulun mantagar ra tataun ondo' mapandai; ginio ra atari' akai ra tataun sidar, tataun sipris am tataun cendana intor ra Libanon. Nakatampos aku no mangator ra mangngandoi kuno koson mangindangan ra mangngandoi muno koson

⁹ momongo ra tataun balak ondo' masuang, sabap ra Baloi ru Tuhan ondo' masaga' kuno baalon maayo am maindon.

¹⁰ Koson ra lutu' ru ulun-ulun mangngandoi kuno, atarin ku 2,000 ngatan gandum, 2,000 ngatan barli, 400,000 ngalito wain, am 400,000 ngalito umau jaitun.”

¹¹ Nangator Raja' Giram ri Raja' Salomo ra surat am taam no koson ragitio, “Sabap ra Tuhan motogom ra ulun Nano, linantik No okou masauk ra raja' nilo.

¹² Koompor noyo Tuhan, i Aki Kapuuno' ru Israil, Namangun ra limbowon am namingkal ra tana' ti! Nangani' Io ra Raja' Daut sangulun anak ungkuyon ondo' mapintar, mapandai, am maligag, ondo' raino mangatang koson mambaal rondo' baloi koson ra Tuhan am rondo' istana nano galama'.

¹³ Atarin ku i Guram, sangulun manukang ondo' matuyu' am mapintar rirun.

¹⁴ Ina' nano intor ra bansa' ru Dan am ama' nano ulun ru Tirus. Matuyu' io mambaal ra kuliamos intor ra mas, pirok, gangsa', basi', batu am tataun. Makabaal io ra konoon makabatik motomou, matanggilung, malia' am konoon linon. Makaukir io ra mansalinut ukiran, am makaulit ra atan ayuk baalon ondo' pabaalin riso. Polosoon noyo io mangandoi ra ulun-ulun manukang muno am ulun ondo' nangandoi noyo ra Raja' Daut, ama' muli.

¹⁵ Ginio ra atari' noyo gandum, barli, wain am umau jaitun ramon koson ra binantu' muli.

¹⁶ Tagaron mai tataun sidar giu' ra kagunungan Libanon ra kinasuang ondo' kitaakon muno. Bongkoson mai tataun-tataun balak no masauk ra rakit, am abason ginio giu' ra raat saboi ra Jopi. Intor ra giu' no maibit mu ginilo ra Jirusalim.”

Pambaalan ra Baloi ru Tuhan patalimpuunon

¹⁷ Inuntob ru Raja' Salomo ngaangai' ulun bansa' ra bokon ondo' minayan giu' ra pagun ru Israil, koson ra ondo' binaal ru ama' nali, Raja' Daut. Ngaangai' no mokoondo' 153,600 ngaulun bansa' ra bokon ondo' nasauk ra mamagun ra giu' no.

¹⁸ Nanusub Raja' Salomo ra 70,000 ngaulun risilo koson magaut ra kuliamos-kuliamos, am 80,000 ngaulun mandur koson manutun ra kandoi no baalon.