2 TUNUNG RU BANSA' ISRAIL 18 - Tanou Moonsoi Timugon

Nabi Mika nampakara' ra Raja' Agab

¹ Paat ra Raja' Josapat intor ra Jiuda nasauk ra langkaya' am nauligan kaga', tinambilian no sangulun pabukat nano ra sangulun pabukat ru Raja' Agab giu' ra Israil.

² Kopongo kukula' ngambilor, nanambului Raja' Josapat ra Raja' Agab giu' ra bandar Samaria. Nambaal Raja' Agab ra bunsag am nanusub ra ulun nanimbalui ra masuang sapi' am domba koson mangurumat ra Raja' Josapat am ulun nababaya' riso no. Nangkinam Raja' Agab nangkimait ra Raja' Josapat maa' raginio maya' riso mamulunsar ra bandar Ramot giu' ra Giliad.

³ Pangkuot Raja' Agab, “Masaga' kou kia maya' raki' koson mamulunsar ra Ramot?” Taam Raja' Josapat, “Nakatampos aku no maya' rirun. Koson niayuk ra saujor kuno. Mangayou akai mababaya' rirun.”

⁴ Kon poyo ru Raja' Josapat, “Kaa' ibok pangkuot takau galing ra Tuhan.”

⁵ Ginio ra pampiau Raja' Agab ra nabi-nabi, ondo' suang no olo'-olo' apat ngaatus ngaulun. Pangkuot io risilo, “Maalap ku kia ra bulunsar Ramot kapoam kalo?” Taam ilo, “Bulunsaro' noyo, mangani' i Aki Kapuuno' rirun ra kamanangan.”

⁶ Kaa' pangkuot poyo Raja' Josapat, “Kolondo' kia nabi ra bokon ondo' makapangkuot ra baal ragitio ra Tuhan?”

⁷ Taam Raja' Agab, “Mokoondo' sangulun poyo, i Mika anak ri Jimla. Kaa' masisang aku riso, sabap ra kalo igondo' io nanala' ra baal ondo' moonsoi raki'; masalok io manala' intor ra baal ondo' malaat.” Taam Raja' Josapat, “Kalo musiti' kou mindagu koon raginio.”

⁸ Ginio ra Raja' Agab nampiau ra sangulun pagawai ru istana am nanusub riso nangindibok nampiau ri Mika.

⁹ Karuruo ngaulun raja' no, nambayang ra bayang ru raja', nanturung ra rasawat ru panturungan ru raja', giu' ra intok mangagik ra gandum, giu' ra liwar ru kulobon garabang ru Samaria. Ngaangai' nabi tatanga' manala' giu' ra saang nilo ruo.

¹⁰ I Jidikia anak ri Kinaana, sangulun intor ra nabi raginio, nambaal ra kukula' sangau basi' am indagu ra Raja' Agab, “Koon ragitio ragu ru Tuhan, ‘Mabaya' ra sangau-sangau basi' ti manggal kou ra ulun ru Siria saboi ilo malingon maala.’ ”

¹¹ Ngaangai' ru nabi ra bokon niayuk mindagu koon raginio. Konilo, “Jalai no mamulunsar ra Ramot. Maaru' mamanang kou. Mangani' Tuhan rirun ra kamanangan.”

¹² Liliwa' raginio, pagawai ondo' minongoi pampiau ri Mika minindagu riso, “Ngaangai' ru nabi nanala' noyo ra mamanang raja'. Moonsoi okou pana manala' koon raginio.”

¹³ Kaa' taam i Mika, “Ralalom inggalan ru Tuhan ondo' naayag, mambantu' aku ra mindagu aku ayuk ra atan ondo' rinagu ri Aki Kapuuno' raki'!”

¹⁴ Paat ri Mika muma' ra Raja' Agab, pangkuot raja' no riso, “Mika, iowon kia Raja' Josapat am aku mamulunsar ra Ramot kapoam kalo?” Taam i Mika, “Bulunsaro' noyo! Maaru' mamanang kou. Tuhan mangani' rirun ra kamanangan.”

¹⁵ Kaa' indagu Raja' Agab, “Amon ru mindagu kou raki' ralalom inggalan ru Tuhan, raguo' ra motopot. Ingkula' aku musiti' mampakara' rirun ra baal ragitio?”

¹⁶ Taam i Mika, “Nakito ku saujor ru Israil nakapantutuliar giu' ra bulur-bulur koson ra sampanon ru domba ondo' kolondo' magagalung. Indagu Tuhan, ‘Ngaangai' ru ulun ti kolondo' tingganai; polosoon ilo muli' ra maayag.’ ”

¹⁷ Kon ru Raja' Agab ra Raja' Josapat, “Nambala' aku no rirun ra kalo igondo' io nanala' intor ra baal ondo' moonsoi raki'; masalok io manala' intor ra baal ondo' malaat!”

¹⁸ Kon poyo ri Mika, “Rongogo' noyo ragu ru Tuhan! Nakito ku Tuhan manturung giu' ra panturungan Nano giu' ra suruga', am ngaangai' ru malaikat Nano minigor ra liput Nano.

¹⁹ Pangkuot Tuhan, ‘Osoi kia ondo' mamparuung ri Agab maa' raginio mongoi io ra Ramot am matoi ra giu' no?’ Taaman ru malaikat-malaikat no nansasala'.

²⁰ Kopongo raginio rondo' ambiluo minujak am uma' ra Tuhan. Kon ru ambiluo no, ‘Ruungon ku i Agab.’ Pangkuot boo Tuhan, ‘Ati kulaan?’

²¹ Taam ambiluo no, ‘Mangkinibit aku ra ngaangai' nabi ri Agab magabau.’ Indagu Tuhan, ‘Ongoi no ruungo' io. Makasugut kou.’ ”

²² Kon poyo ri Mika, “Gitio noyo ondo' nasauk. Nangkinibit Tuhan ra nabi-nabi muno nagabau rirun. Kaa' Tuhan galama' nangaru' noyo ra malumpa' kou ru karaat.”

²³ Inggaar Nabi Jidikia ri Mika, nampalapis ra pingas nano, am pangkuot, “Intor sanggilan kia Ambiluo ru Tuhan nangiruan raki' am indagu rirun?”

²⁴ Taam i Mika, “Makapandai kou ra baal ragitio paat ra okou mansibuni giu' ra rondo' intor ra lamin ra talikuron.”

²⁵ Kopongo raginio indagu Raja' Agab ra sangulun intor ra pagawai nano, “Rokopo' i Mika am ibito' io ra gabenor ru bandar, iono i Amon, am anak ungkuyon ri Joas.

²⁶ Susubo' ilo mangaput riso ra lamin pangaputan, am aniin io ra ruti' am timug ayuk saboi ra aku sumaguli' ra maayag.”

²⁷ Kon ri Mika, “Amon ru sumaguli' kou ra maayag, maaruan ra kalo minindagu Tuhan pinabala' galing raki'!” Kon poyo ri Mika, “Rongogo' min ulun kau ngai', ra atan ondo' rinagu ku noyo ti!”

Pinatayan ru Raja' Agab

²⁸ Kopongo raginio Raja' Agab intor ra Israil am Raja' Josapat intor ra Jiuda minongoi pamulunsar ra bandar Ramot giu' ra Giliad.

²⁹ Kon ru Raja' Agab ra Raja' Josapat, “Paat ra itakau mangayou, sumalu aku, kaa' okou mambayang ra bayang ru raja'.” Ginio ra raja' ru Israil siminalu paat ra minongoi pangayou.

³⁰ Raja' ru pagun Siria nanusub ra saujor ru pulalai mangkuda nano maa' raginio kalo mamulunsar ra osoi pana ondo' ak am raja' ru Israil.

³¹ Paat ra ilo nakakito ra Raja' Josapat, indoson nilo ra io no raja' ru Israil. Ginio ra likar ilo am pamulunsar riso. Kaa' paat ra Raja' Josapat giminolok, Tuhan i Aki Kapuuno' nangindangan riso am pinatingkuang pamulunsaran no ra intok ra bokon.

³² Panglima ru pulalai mangkurita' kuda no nakaliman ra raja' no sala' ka raja' ru Israil, ilo pana liminonggo' namulunsar riso.

³³ Nakaintuma' ra sangulun intor ra saujor ru pagun Siria nampalabus ra anak panah nano ondo' nakatiu' ra Raja' Agab ginio ra napatunggulan ra bayang mangayou nano. “Napilat aku!” giminolok Raja' Agab ra mampaugar ra kurita' kuda nano. “Palimpuongo' kurita' kuda am ingkual intor ra pangayawan ti!”

³⁴ Liliwa' pangayawan no giminaai moporos, Raja' Agab siminungka' giu' rasawat ru kurita' kuda nano ondo' nakatingkuang ra saujor ru Siria. Paat ra tumolop mato ru orou, Raja' Agab minatoi.