2 TUNUNG RU BANSA' ISRAIL 16 - Tanou Moonsoi Timugon

Pangayawan manggal ra Israil

¹ Paat ra bilor katalu ngoopor am onom ra pamarintaan ru Raja' Asa giu' ra Jiuda, Raja' Baisa intor ra Israil namulunsar ra Jiuda am tumalimpuun mangikang ra bandar Rama koson mamutat ra ralan mingkual sumubol ra Jiuda.

² Ginio ra Raja' Asa nangalap ra pirok am mas intor ra pambulian giu' ra Baloi ru Tuhan am giu' ra istana. Kopongo raginio Raja' Asa nangator raginio ra Damsyik ra Raja' Bingadad raja' ru Siria, nabaya' ra bilin ragitio,

³ “Ibok pakimabukat to koson ra binaal ru ama' tali ragili. Mas am pirok ti taak posoboyon rirun. Putato' pabukatan muno am Raja' Baisa giu' ra Israil, maa' raginio raja' ru Israil no mampalugut kalalaat ra saujor nano intor ra wilayah kuno.”

⁴ Raja' Bingadad nangiou ra inatangan ru Raja' Asa, Raja' Bingadad pana nangator boo ra panglima-panglima nano am saujor nilo koson mamulunsar ra bandar-bandar ru Israil. Ginaau nilo Iyon, Dan, Abil-Bit-Maakga, am ngaangai' bandar giu' ra Naptali, iono intok-intok pambulian ra inula' ru pagun.

⁵ Paat ra Raja' Baisa nokorongog ra baal raginio, linanggaan no pirot nano mamiot ra Rama.

⁶ Kopongo raginio Raja' Asa namarinta ra ulun intor ra titikop ru Jiuda maa' raginio magibit ra batu am balak ondo' pakayon ru Raja' Baisa giu' ra Rama, am namakai ilo ra ngaangai' no koson mamiot ra bandar Giba am Mijpa.

Nabi Ganani

⁷ Paat raginio minuma' Nabi Ganani ra Raja' Asa am indagu, “Sabap ra okou liminansan ra raja' ru Siria am kalo liminansan ra Tuhan, i Aki Kapuuno' muno, nairu' boo kaluagan koson mangala ra saujor ru raja' ru Siria.

⁸ Sala' ka kia saujor ru Itiopia am Libia ondo' masuang kaga'? Mokoondo' ilo ra kurita' kuda am pulalai mangkuda, kaa' sabap ra okou liminansan ra Tuhan, mangani' Io rirun ra kamanangan manggal risilo.

⁹ Tuhan magail magalung ra titikop ru tana' ti am mangani' ra kaikangan risilo ondo' gumagaya' Riso. Sasambungon binaal muno, ginio ra intor raino magail kou mangayou.”

¹⁰ Siminangit kaga' Raja' Asa ra nabi no saboi nabi no inaput. Paat raginio noyo Raja' Asa tumalimpuun mangimbolo' ra kukula' ngaulun.

Pupus ru pamarintaan ru Raja' Asa

¹¹ Ngaangai' kasaukan paat ra pamarintaan ru Raja' Asa, intor ra talimpuun saboi ra pupus, tinulisan ra ralalom ru kitab Sejarah ru Raja'-Raja' Jiuda am Israil.

¹² Paat ra bilor katalu ngoopor am siam ra pamarintaan ru Raja' Asa, kalayam nano natiu' ra maruol mapaja'. Kabalu' pana raginio kalo nakiindangan io ra Tuhan; kaa' nakiindangan io ra ulun mamabas.

¹³ Kopongo ruo ngambilor Raja' Asa minatoi.

¹⁴ Linobong io giu' ra kalabangan bulur batu ondo' pinahat noyo riso giu' ra Bandar Daut. Baangkai nano linatakan ra apa' pampagamis ra akanon am ondo' mangaamis owou ra kalo poyo linobong. Apui pinaangan ondo' maayo kaga' koson mangurumat riso.