2 TUNUNG RU BANSA' ISRAIL 15 - Tanou Moonsoi Timugon

Raja' Asa nambaal ra panalimbaguan

¹ Ambiluo ri Aki Kapuuno' nanguasa' ri Ajaria anak ri Obid,

² io pana minongoi uma' ra Raja' Asa. Kono, “Rongogo' aku, okou Raja' Asa, am akau ngaangai' mamagun ru Jiuda am Binjamin! Tuhan mabaya' ramuyun buoi ra akau mabaya' Riso. Amon maguyum kau Riso, Io pana mangiou am matuum min. Kaa' amon mangiruan kau Riso, Io pana mangiruan ramuyun.

³ Nabuoi noyo Israil kalo nangandoi ayuk ri Aki Kapuuno' ondo' motopot, kolondo' imam-imam ondo' mangila' risilo, am kolondo' ukum.

⁴ Kaa' paat ra kapaganan, nakiindangan ilo ra Tuhan, i Aki Kapuuno' ru Israil. Maguyum ilo Riso, am makatuum Riso.

⁵ Paat raginio kolondo' osoi pana makaugar ra maayag, sabap ra titikop ru pagun mampapatoi.

⁶ Bansa' ondo' rondo' mangimbolo' ra bansa' ra bokon, am bandar ondo' rondo' mangimbolo' ra bandar ra bokon, sabap ra i Aki Kapuuno' tatanga' mamparatong ra kapaganan am pagalabaan risilo.

⁷ Kaa' akau musiti' maikang am baani. Kandoi ondo' baalon min aniin ra ampos.”

⁸ Pokorongog Raja' Asa ra inala' ri Ajaria anak ri Obid, guang nano minikang. Pinatiran no ngaangai' sinungkalalaing giu' ra Jiuda am Binjamin, am niayuk ngaangai' sinungkalalaing giu' ra bandar-bandar ondo' ginaau nano giu' ra kabuluran Ipraim. Raja' Asa nomonsoi ra altar ru Tuhan ondo' pinabanta' giu' ra liliut ra Baloi ru Tuhan.

⁹ Masuang ulun minatong intor ra Ipraim, Manasi am Simion, am minayan ra ralalom ru pamarintaan ru Raja' Asa, sabap nakakito ilo ra Tuhan mangindangan ra Raja' Asa. Raja' Asa nampiau risilo ngaangai' nababaya' ra mamagun ru Jiuda am Binjamin.

¹⁰ Ilo ngaangai' natimung giu' ra Jirusalim am paat ra sila' katalu ra bilor koopor am limo ra pamarintaan ru Raja' Asa.

¹¹ Paat ra orou raginio nampataak ilo ra 700 ngainan sapi' am 7,000 ngainan domba koson ra taak simbalui ra Tuhan; ngaangai' no ampos ru ginaau.

¹² Nambaal ilo ra nabantuan ra mabaya' ra totopot ru guang am salibuor, maayag ilo sumugut ra kasagaan ru Tuhan, i Aki Kapuuno' ru kinamatuaan nilai.

¹³ Osoi ayuk pana, matutuo kapoam mamulok, ungkuyon kapoam ruandu', ondo' kalo maayag sumugut ra kasagaan ru Tuhan, i Aki Kapuuno' ru Israil, musiti' ukumin ra matoi.

¹⁴ Mabaya' ra bolos mosongou am ralalom inggalan ru Tuhan, nagibot ilo koson mampaguut ra nabantuan nilono. Kopongo raginio, nagilakup ilo am nanamput ra bujung.

¹⁵ Ngaangai' mamagun ru Jiuda naansukan sabap ra nambaal ilo ra nabantuan no ra totopot ru guang. Siminambayang ilo ra Tuhan ra totopot, ilo pana iniou ru Tuhan am inanian ra kaansayan ra titikop ru pagun.

¹⁶ Raja' Asa nampatuun ra intok ru aru' nano, i Maakga koson ra ina' ru raja' ruandu', sabap ra nambaal io ra rondo' sinungkalalaing majamol koson ra Dewi Asyira, dewi kalabungan. Ginaba' ru Raja' Asa sinungkalalaing no, tinotok no, am sinolob no giu' ra Limayak Kidron.

¹⁷ Kabalu' pana Raja' Asa kalo nampalunsai ra ngaangai' intok sambaan ra sinungkalalaing giu' ra pagun no, kaa' nagulayun io giminagaya' ayuk ra Tuhan buoi ru bayag nano.

¹⁸ Pinabanta' no ngaangai' kuliamos ondo' patimpokon noyo ru ama' nali, giu' ra ralalom Baloi ru Tuhan. Giu' no Raja' Asa niayuk nampabanta' ra kuliamos-kuliamos mas am pirok ondo' patimpokon nano galama'.

¹⁹ Pangayawan kalo nasauk saboi ra bilor katalu ngoopor am limo ru pamarintaan nano.