2 TUNUNG RU BANSA' ISRAIL 13 - Tanou Moonsoi Timugon

Raja' Abia mangayou ra Raja' Jirobiam

¹ Paat ra bilor koopor am balu' ra pamarintaan ru Raja' Jirobiam giu' ra Israil, i Abia nasauk ra raja' giu' ra Jiuda.

² Raja' Abia namarinta giu' ra Jirusalim buoi talu ngambilor. Ina' nano iono i Mikaya anak ri Uriil intor ra Gibia. Paat ra nasauk pangayawan ra Raja' Abia am Raja' Jirobiam,

³ Raja' Abia nanusub ra saujor ra suang no 400,000 ngaulun, am Raja' Jirobiam minanggal riso ra saujor ra suang no 800,000 ngaulun.

⁴ Karuruo pulalai ru saujor no naguma' giu' ra kabuluran Ipraim. Raja' Abia nagaloi ra Gunung Jimaraim am golok ra Raja' Jirobiam am saujor ru Israil, “Rongogo'!

⁵ Nakapandai kau ra Tuhan i Aki Kapuuno' ru Israil nambaal rondo' nabantuan ra Raja' Daut ra io am papag nano mamarinta ra Israil ra sabubuoi no. Nabantuan no kalo maalap ra sulang.

⁶ Jirobiam anak ri Nibat giminuor ra raja' nano, Raja' Salomo.

⁷ Kopongo raginio tinimung no kukula' ngaulun mangalaat am nangala ra Raja' Rigabiam anak ru Raja' Salomo, ondo' paat raginio lakat ayuk poyo mamulok kaga' am kalo mapandai koson manggal.

⁸ Raino akau pana masaga' manggal ra kuasa' ondo' tinaakan ru Tuhan ra papag ru Raja' Daut. Mokoondo' kau ra saujor ondo' maayo am sinungkalalaing ru anak sapi' gawayan intor ra mas ondo' binaal ri Jirobiam koson ra dewa-dewa min.

⁹ Pinagiru' min imam-imam ru Tuhan, iono imam-imam papag ri Arun am pinagiru' min niayuk ulun ru Liwi. Koson ra palit nilo, linantik min imam sumugut ra kaindalaman ru bansa'-bansa' ra bokon. Osoi ayuk ondo' matong ra sanginan sapi' gawayan kapoam tulu' ngainan domba, malantik masauk ra imam koson rorondo' ondo' sala' ka i Aki Kapuuno'.

¹⁰ Kaa' lakat akai poyo mangandoi ayuk ra Tuhan, i Aki Kapuuno' mai. Kalo nangiruan akai Riso. Imam-imam ru papag ri Arun nambaal ra kandoi nilo liliwa' inindangan ru ulun ru Liwi.

¹¹ Moonong susuab ti am mai' ti mampataak ilo ra kaminyan, am niayuk bibiag koson ra taak simbalui koson mapabansuk ra guang ru Tuhan. Mampataak ilo ra ruti' pasulungon giu' ra rasawat ru mija' ondo' pinatimpok noyo, am moonong rondom mansikit ilo ra lampung-lampung ra tampakan ra lampung mas. Binaal mai susuban ru Tuhan, kaa' inimpayan min Io.

¹² I Aki Kapuuno' galama' ondo' nasauk ra tingganai mai. Imam-imam Nano soroi ragiti am nakatampos manamput ra bujung koson ra tatandu' mai koson mamulunsar ramuyun. Mamagun kau ru Israil, pai' anggal ra Tuhan, i Aki Kapuuno' ru kinamatuaan min! Kalo lair mamanang kau!”

¹³ Liliwa' raginio, Raja' Jirobiam nangator ra santayaran intor ra saujor nano koson magawang ra saujor ru Jiuda intor ra talikuron, am ondo' bokon muma' risilo intor ra saang.

¹⁴ Saujor ru Jiuda nakakito giu' ra liliut nilo am nakaliman ra inawangan ilo. Golok ilo boo ra Tuhan makiindangan, am imam-imam nanamput ra bujung nilo.

¹⁵ Kopongo raginio saujor ru Jiuda giminolok ra mosongou, am ragana' ru naningganayan ru Raja' Abia, namulunsar ilo. Kinala ri Aki Kapuuno' Raja' Jirobiam am saujor ru Israil.

¹⁶ Saujor ru Israil nagigiru' intor ra saujor ru Jiuda, am pinoloso ri Aki Kapuuno' saujor ru Jiuda nangala risilo.

¹⁷ Kinala ilo ra najanjayan ru Raja' Abia am saujor nano. Satanga juta' ngaulun saujor ru Israil ondo' moonsoi kaga' minatoi.

¹⁸ Koon raginio noyo ulun ru Jiuda nangala ra ulun ru Israil, sabap ra ulun ru Jiuda liminansan ra Tuhan, i Aki Kapuuno' ru kinamatuaan nilo.

¹⁹ Raja' Abia nangilou ra pulalai ru Raja' Jirobiam am nanguasa' ra kukula' bandar no, iono Bitil, Jisana, Ipron am ngaangai' pekan ra liliut ru bandar-bandar no.

²⁰ Raja' Jirobiam kalo nakapanapuli' ra kuasa' nano buoi ra pamarintaan ru Raja' Abia. Pupus no Raja' Jirobiam pinatoi ru Tuhan, am io pana minatoi.

²¹ Raja' Abia boo gumaai makakuasa'. Io mokoondo' 14 ngaulun andu', 22 ngaulun anak ungkuyon am 16 ngaulun anak ruandu'.

²² Tunung ra bokon intor ra Raja' Abia, ragu nano am binaal nano, tinulisan ra ralalom ru kitab Sejarah ru Nabi Ido.