2 TUNUNG RU BANSA' ISRAIL 10 - Tanou Moonsoi Timugon

Bansa' giu' ra ralayo giminuor

¹ Minongoi Raja' Rigabiam ra Sikgim sabap ra ngaangai' bansa' tampilon ra ralayo ru Israil natimung ra giu' no koson mampalantik riso masauk ra raja'.

² Paat ri Jirobiam anak ri Nibat nokorongog intor ra tanou raginio, saguli' io ra Israil. Ragili i Jirobiam minongoi ra Misir sabap ra nagiru' io intor ra Raja' Salomo.

³ Bansa'-bansa' giu' ra ralayo nampiau ri Jirobiam, io pana nababaya' risilo muma' ra Raja' Rigabiam am indagu,

⁴ “Raja' Salomo, ama' muli nangani' ramon ra sinaanan ra maagat. Raino amon ru pamaanon mu sinaanan mai am pamakuan mu ramon moonsoi, sumauk akai ra mamagun ondo' gumagaya' rirun.”

⁵ Indagu Raja' Rigabiam, “Anii' min aku talu ngoorou koson mampaguang ra baal raginio. Mopongo raginio ratong kau poyo.” Ginio ra ilo pana minugar.

⁶ Nakipinson Raja' Rigabiam intor ra ulun tuu' lair ondo' nangandoi ra ama' nali koson ra maminson. Pangkuot io, “Atan kia musiti' ku pataamon ra ngaangai' ulun no. Atan kia pinson min?”

⁷ Taam ilo, “Amon ru masaga' kou mambaal ra moonsoi ra mamagun am mapabansuk ra guang nilo, iowo' kitaakon nilo. Ilo niayuk mambaal ra moonsoi am gumagaya' rirun.”

⁸ Kaa' kalo linio ru Raja' Rigabiam pinson ru ulun-ulun tuu' lair. Nangkuot io piboo ra ulun mangamulok ondo' pantuu' nano, am ondo' raino nasauk ra maminson riso.

⁹ Indagu raja', “Atan kia pinson min? Atan kia ondo' musiti' ku paraguon ra ngaangai' ulun no, ondo' makimaan raki' ra sinaanan nilo?”

¹⁰ Taam ilo, “Ragui' ilo, ‘Titingkis kuno maayo poyo intor ra awak ru ama' kuli!’

¹¹ Ragui' ilo, ‘Ama' kuli nangani' ramuyun ra sinaanan ondo' maagat, kaa' aniin takamin ra sinaanan ondo' maagat poyo. Ama' kuli nampalapos ramuyun ra pitol lalapos, kaa' aku mampalapos ramuyun ra pitol lalapos ondo' makaruui ru basi'!’ ”

¹² Kopongo talu ngoorou, i Jirobiam am mamagun minatong poyo minuma' ra Raja' Rigabiam sumugut ra rinagu nali.

^13-14 Kalo linio ru raja' pinson ru ulun tuu' lair. Sinugut no pinson ru ulun mangamulok am indagu ra mamagun ra malasang, “Ama' kuli nangani' ramuyun ra sinaanan ondo' maagat kaa' aku mangani' ramuyun ra sinaanan ondo' maagat poyo. I ama' i nampalapos ramuyun ra pitol lalapos kaa' aku mampalapos ramuyun ra pitol lalapos ondo' makaruui ru basi'!”

¹⁵ Tuhan i Aki Kapuuno' masaga' manugut ra ragu Nano ondo' pinasaboi ri Jirobiam anak ri Nibat ondo' pinabala' galing ra Nabi Agia intor ra Silo. Ginio noyo sabap ra raja' kalo nampalio ra kinitaak ru mamagun.

¹⁶ Paat ra mamagun nakakito ra kalo masaga' raja' mangiou ra kinitaak nilo, golok ilo, “Pai' lioo' Raja' Daut am sasambaloi nano! Kalo igondo' ilo pambaal ra atan pana ritakau! Ulun kau ru Israil, ibok uli' takau! Polosoon noyo Raja' Jirobiam magalung ra inan nano galama'!” Ginio ra ulun ru Israil giminuor, am

¹⁷ Raja' Rigabiam nasauk ayuk ra raja' ru mamagun ru wilayah Jiuda ayuk.

¹⁸ Kopongo raginio nanusub Raja' Rigabiam ri Adoniram, ulun magalung ra ulun inulipon, mongoi ra ulun ru Israil, kaa' binobol nilo io saboi minatoi. Ginio ra naringkaagou Raja' Rigabiam nagiru' ra Jirusalim am siminakoi ra kurita' kuda nano.

¹⁹ Intor ragili, mamagun giu' ra tampilon ralayo ru pamarintaan ru Israil magail gumuor ra raja'-raja' ru papag ru Raja' Daut.