1 TISALONIKA 5 - Tanou Moonsoi Timugon

Tampos kano manguma' ra Tuhan Jisus

¹ Pabukat ku ngai', kalo pana boo manulis akai ramuyun ra sanggilan baal raginio masauk.

² Sabap ra akau galama' nakapandai toojo ra ratangan ru Tuhan no ra pulali' kon ayuk, mogondo' ra ratangan ru sangulun mantatakou paat ra io rondom.

³ Paat ra ulun mindagu ra, “Raino nampalinos noyo ngaangai' am mokoondo' noyo pabansayan,” paat raginio niayuk pulali' kon ilo pusoon. Pulali' kon Io matong koson ra ruol ru ruandu' matipaganak, am kalo makapagiru' ilo.

⁴ Kaa' akau, pabukat ku ngai', pai' ru maayag kau ra kalandaman, am Orou raginio sotopot no kalo mampaliar ramuyun koson ra sangulun mantatakou.

⁵ Akau no ulun ondo' maayag ralalom ru sinda, ioginio maayag ra matawang. Itakau ti sala' ka maayag ra kalandaman.

⁶ Ginio ra pai' takano pombobolong ayuk koson ra ulun bokon no, kaa' ilalain am masalok takano tumampos.

⁷ Sabap ra paat ra rondom ti ulun mombobolong am rondom ti ulun gumauk.

⁸ Kaa' itakau ti maayag ra matawang, am musiti' masalok takau tumampos. Musiti' takau mangintopot ra Tuhan am motogom ra ulun bokon, ginio koson migampin takau ra bayang basi'. Am poyo kalansanan ra bayagon takau koson migampin takau ra tupi' basi'.

⁹ Sabap ra pai' ru pinili' takau ri Aki Kapuuno' koson ra ukumin, kaa' koson mokoowot takau ra pamayagan ralalom ri Jisus Kristus, Tuhan takau.

¹⁰ Minatoi Io mamayag ritakau, koson paat ra ratangan Nano itakau ngaangai' maayag sumimpung Riso, iou pana lakat takau ayuk poyo maayag kapoam minatoi noyo.

¹¹ Ginio ra kaikango' am pangindangan kano ra rondo' am bokon mogondo' ra baalon min raino ti.

Bilin pupus am kaansayan

¹² Pabukat ku ngai', makitaak akai ra urumaton min noyo ilo ondo' mirot mangandoi koson ra kaatangan min, sabap ra pinili' ilo no ru Tuhan koson maningganai am magalung ramuyun.

¹³ Urumato' am tagami' noyo toojo ilo sabap ra kandoi nilai ti. Kasalok kano mobonsoi ra rondo' am bokon.

¹⁴ Pabukat ku ngai', makitaak akai poyo ramuyun ra sawayo' min noyo ulun ondo' mangatiar, kaikango' min noyo guang ru ulun ondo' malaa', indangano' min noyo ulun ondo' malawo am kataan kano ra ngaangai' ulun.

¹⁵ Ilalai' min noyo ra kolondo' sangulun kon pana mambalos ra kalaatan risilo ondo' mambaal ra kalaatan riso. Kaa' pirot kano pambaal ra moonsoi ra rondo' am bokon am poyo ra ngaangai' ulun.

¹⁶ Kasalok kano pakaansuk

¹⁷ am pakiasi'.

¹⁸ Paringkuanang kau ayuk ra ngaangai' ondo' matuum min, sabap raginio noyo kasagaan ri Aki Kapuuno' ramuyun koson ra ulun ondo' sumimpung ri Kristus Jisus.

¹⁹ Pai' min noyo ompongo' Ambiluo ri Aki Kapuuno'.

²⁰ Pai' kano pagasab ra pambalaan ondo' intor ra Ambiluo ri Aki Kapuuno'.

²¹ Ngaangai' ru atan ayuk baal ilain min galing, am ondo' moonsoi no ginio suguton min.

²² Inggalur kano ra atan ayuk baal malaat.

²³ Gama' ru i Aki Kapuuno' ondo' mangani' ritakau ra pabansayan, mampatimpok ra kaayagan mino Riso galama'. Gama' ru magalung Io ramuyun ngai' – ioginio ambiluo, saliguor am poyo inan mino – saboi kolondo' sala min paat ra ratangan ru Tuhan takau, i Jisus Kristus.

²⁴ I Aki Kapuuno' noyo mampiau ramuyun, am Io no makapambaal raginio sabap ra Io totopot malansanan.

²⁵ Pabukat ku ngai', karaa' min niayuk akai ra pakiasian min.

²⁶ Paat ra akau manguma' ra pabukat Kristian indagu kano ra kaansayan mabaya' ra guang mapasau.

²⁷ Mabaya' ra kuasa' ru Tuhan, kitaakon takamin maa' raginio surat ti pabasaan ra ngaangai' pabukat Kristian.

²⁸ Gama' ru Tuhan takau i Jisus Kristus mambarakat ramuyun.