1 TISALONIKA 3 - Tanou Moonsoi Timugon

¹ Pupus i kalo boo moorot guang maiti. Ginio ra nampaguang akai ra moonsoi ru lumuur akai ayuk ra bandar Atina,

² liliwa' poongoyon mai ramuyun i Timotius, pabukat takau. Io no sangulun mangangandoi ra Tuhan ondo' mabaya' ramon mampasaboi ra Tanou Moonsoi ri Kristus. Io sinusub mai mampaikang ra guang am pangintapatan mino ri Kristus.

³ Koson boo raginio kolondo' sangulun pana intor ramuyun no lumonggo' mangintopot sabap ra kaimbalaan min ti. Akau galama' nakapandai ragitio noyo tayar ru kasagaan ri Aki Kapuuno' ritakau.

⁴ Sabap ra paat ra akai soroi ramuyun ragili, nambala' akai no kalalair ra makatuum takau ra kaimbalaan; am ginio noyo ondo' nasauk koson ra natutunan min.

⁵ Ginio ra nompoongoi aku ri Timotius sabap ra kalo boo moorot guang kuli am masaga' aku mintutun ra ati kulaan ru pangintapatan min. Maimamang aku ra maampon lair rinukuan kau ru pangkinaman ru Tingganai ru riwato, suku' kolondo' boo ampos ru kandoi maili ramuyun.

⁶ Raino siminaguli' noyo i Timotius am nagibit ra tanou moonsoi intor ra pangintapatan am togom mino. Nambala' io ramon ra masalok kau moondom ramon am masaga' kau tumuum ramon, mogondo' ra akai masaga' tumuum ramuyun.

⁷ Pabukat ku ngai', ginio noyo ondo' nampaikang ra guang maiti, iou pana nakatuum akai ra kapaganan am kaimbalaan. Pangintapatan minti noyo nampaikang ra guang mai,

⁸ suku' ra maayag akai toojo raino, ondo' amon ru rumondon kau toojo ra Tuhan.

⁹ Raino maringkuanang akai toojo ra saang ri Aki Kapuuno' sabap ra kaansukan ru guang maiti ramuyun.

¹⁰ Orou rondom akai makiasi' mabaya' ra kinapirot ru guang mai, koson makapantuum takau poyo am makapampasingkot akai poyo ra atan ondo' kalo poyo naila' ramuyun intor ra pangintapatan min ri Kristus.

¹¹ Gama' ru i Aki Kapuuno' galama', Ama' takau, am Tuhan takau i Jisus mangani' ra kaluagan koson makapantuum poyo saguli' ramuyun.

¹² Gama' ru Tuhan mangindangan ramuyun topot-topot motogom ra rondo' am bokon am niayuk ra ngaangai' ulun, saboi kinotogom min rumuang mogondo' ra kinotogom mai ramuyun.

¹³ Maa' raginio mampaikang Io ramuyun, saboi guang mino mapasau am kolondo' sala ra pagilangan ri Aki Kapuuno', Ama' takau, paat ra ratangan ru Tuhan takau, i Jisus, mabaya' ra ngaangai' ulun Nano.