1 TISALONIKA 2 - Tanou Moonsoi Timugon

Kandoi ri Paulus giu' ra Tisalonika

¹ Pabukat ku ngai', akau galama' makapandai ra rinatangan maili ramuyun pai' ru kolondo' ampos.

² Nakapandai kau ra kalo poyo nakaratong akai ramuyun ra Tisalonika, inimbolo' am inasaban akai giu' ra bandar Pilipi. Kaa' iou pana masuang ulun tumula' ramon ragili, inindangan akai ri Aki Kapuuno' ra makaatas akai mampasaboi ra Tanou Moonsoi ondo' intor Riso.

³ Pangkimaitan maiti ramuyun pai' ru mampakalayau ramuyun kapoam intor ra guang mai malaat kapoam mamparuung ramuyun.

⁴ Kaa' sotopot no, pai' ru mampakaansuk akai ra guang ru ulun kaa' guang ri Aki Kapuuno', ondo' mangkinam ra guang mai. Io no ondo' nampasauk ramon koson maaya' akai mampasaboi ra Tanou Moonsoi no.

⁵ Akau galama' nakapandai ra kalo igogondo' akai mindagu ra ragu mampagamis koson mambuni ra guang maringkumaa'. I Aki Kapuuno' galama' sasi' mai!

⁶ Kalo noyo igondo' akai pakiompor ra osoi ayuk pana, intor kia ramuyun kapoam ulun ra bokon,

⁷ kabalu' pana akai ti, koson ra rasul ri Jisus Kristus, maaya' akai makitaak ra atan-atan ayuk intor ramuyun. Kaa' kinolomoi mai guang mai paat ra akai soroi ramuyun, koson ra sangulun ina' ra io mantalaanak.

⁸ Sabap ra kinotogom mai ramuyun, nakatampos akai no sala' ka mampasaboi ra Tanou Moonsoi intor ri Aki Kapuuno' no ayuk, kaa' suku' mampataak ra painawo maiti pana ramuyun. Sabap ra maayo toojo togom maiti ramuyun!

⁹ Pabukat ku ngai', maaru' makara' min noyo kandoi am bagui maili paat ra akai nampasaboi ra Tanou Moonsoi ri Aki Kapuuno' ti ramuyun. Mangalandaman akai nangandoi koson kalo nantipagon ra osoi ayuk pana intor ramuyun.

¹⁰ Akau no sasi' mai, am koson niayuk i Aki Kapuuno', ra mapasau, mabanis am matanda' paliso mai ramuyun ondo' nangintopot noyo ri Kristus.

¹¹ Nakapandai kano ra paliso mai ramuyun sigagama', ioginio mogondo' ra sangulun ama' am anak-anak nano.

¹² Sinawai, sinimayo am kinimaitan takamin koson maayag kau sumugut ra kasagaan ri Aki Kapuuno', ondo' mampiau ramuyun makaliman ra Tana' Bagu ri Aki Kapuuno' am katulayan Nano.

¹³ Gitio rondo' poyo sasaban ra akai masalok maringkuanang ri Aki Kapuuno', ra nangkirongog am nangapu kau po ra tanou intor ri Aki Kapuuno' ondo' pinasaboi maili. Nangapu kau ra tanou no sala' ka koson ra tanou intor ra ulun, kaa' koson ra totopot i Aki Kapuuno' noyo intor ru tanou no. Am Io po nampasauk ramuyun nangintopot ri Kristus.

¹⁴ Pabukat ku ngai', akau pana nakaliman ra atan ondo' nasauk ra pasimpungan ulun Kristian giu' ra Judia, ioginio ilo ondo' nangintopot ri Jisus Kristus. Kaimbalaan ondo' malimanan min ti intor ra bansa' min galama', mogondo' niayuk ra sauk ru ulun Kristian ru Judia ra ilo inimbolo' ru ulun ru Jaudi.

¹⁵ Ilo noyo namatoi ra Tuhan Jisus am nabi-nabi am niayuk nangimbolo' ramon. Kalo gumagaya' ilo ri Aki Kapuuno' am makimantula' ilo ra ngaangai' ulun.

¹⁶ Am mulu' poyo ilo mongompong ramon mambala' ra bansa' ondo' sala' ka Jaudi ra tanou ondo' mampakaayag risilo. Koson boo raginio gumaai poyo tula nilai saboi maukop suang no am raino matiu' ilo boo ra sangit am ukum ri Aki Kapuuno'.

Maayo guang ri Paulus tumuum poyo ra ulun ru Tisalonika

¹⁷ Pabukat ku ngai', intor ra itakau nakapantuliar, maayo guang mai tumuum poyo ramuyun am moondom toojo guang maiti ramuyun, maalur kau pana ra mato, mamaar ayuk ra guang.

¹⁸ Makaguang akai noyo mongoi tuum ramuyun, ra kaingkula' ku noyo nangkinam, kaa' inampangan akai ru Tingganai ru riwato no.

¹⁹ Akau no toojo kalansanan am kaansukan mai. Sabap ra paat ra ratangan saguli' ru Tuhan Jisus ra tumuum takau Riso, akau no sasaban ru paringkuanangan maino.

²⁰ Akau noyo puun ru paringkuanangan am kaansukan maiti!