1 TIMOTIUS 5 - Tanou Moonsoi Timugon

Paliso paningganayan ra ulun Kristian

¹ Ilalai' toojo ragu muno ra okou mansawai ra ungkuyon ondo' matuo ka okou, porongogon mu io koson ra ama' muno galama'. Ungkuyon ondo' mamulok ka okou karaan mu koson ayuk ra boborok muno,

² ruandu' matuo koson ayuk ra ina' muno am ruandu' ondo' mamulok ka okou koson ra boborok muno mabaya' ra kapasawan.

³ Pakaraa' noyo ulun mangintopot ra napuor no ondo' totopot kolondo' magalung risilo.

⁴ Kaa' amon ru sasangulun napuor no makaanak kapoam akupu, ilo ti musiti' lansanin koson magalung ra sasambaloi nilai galama'. Sabap ragitio ralan nilo mambalos ra indangan ru matuo am aki-aru' nilo am niayuk mampakatasu' ri Aki Kapuuno'.

⁵ Napuor ondo' totopot misasangulun ayuk, koson kolondo' magalung riso, malansan io ayuk ri Aki Kapuuno'. Orou-rondom kalo lulumonggo' io makiasi' koson makitaak ra kaindanganan Nano.

⁶ Kaa' napuor ondo' maringkumaa' ayuk ra kalangkayaan, io ti karaan koson ra pangintapatan nano minatoi noyo, kabalu' pana naayag io.

⁷ Ginio ra pakaraa' noyo ulun-ulun mangintopot no raginio, maa' raginio kolondo' boo makapanguu' risilo.

⁸ Kaa' osoi ayuk kalo magalung ra pabukat nano, mulu' poyo pinongkotob nano galama', ulun ragitio karaan ra nagali' noyo ra pangintapatan am mulu' poyo malaat io ka ulun ondo' kalo mangintopot ri Kristus.

⁹ Napuor ondo' iowon mangapu ra tayar ru indangan musiti' koson ragitio: umur nano nakasail noyo onom ngoopor ngambilor, igondo' ayuk pangindalaki

¹⁰ am kauligan mambaal ra moonsoi koson; matanda' nampasukor ra anak nano, mataau mangapu ra tambului, maluoi mangindangan ra ulun Kristian suku' ra kandoi kalo maatang, mangindangan ra ulun makakapaganan am mapirot io mambaal ra atan ayuk kandoi moonsoi.

¹¹ Kaa' napuor ondo' lakat ayuk poyo mamulok, pai' iowo' ilo mangapu ra tayar ru indangan; sabap ra amon ru makaguang ilo poyo mangindalaki kalo boo mangandoi ilo ayuk ri Kristus,

¹² am ginio karaan koson lumungkang ilo ra atan ondo' binantu' nilo i.

¹³ Am poyo maindalom ilo boo magayam ayuk gagalapon; mulu' poyo raginio ilo ti mansunur ayuk ra ulun gagalapon, kokosombot ra baalon ru bokon am poyo magindagu ra ondo' kalo sama' iningon.

¹⁴ Ginio ra moonsoi niayuk ru napuor ra mangamulok no mangindalaki am maganak poyo, am mirot ayuk pampaugar ra kandoi nilo koson ra sangulun andu', maa' raginio ulun lumaat ritakau kolondo' boo kaluagan mampakalaat ra inggalan takau.

¹⁵ Sabap ra mokoondo' niayuk kukula' ngaulun napuor ondo' nangiruan ritakau am siminugut boo ra Tingganai ru riwato.

¹⁶ Kaa' amon ru sangulun ruandu' Kristian makapabukat ra napuor, moonsoi io magalung risilo am pai' noyo pantipagon ra pasimpungan ulun Kristian. Maa' raginio maalap nilo kaindangan ulun-ulun napuor no ondo' kolondo' magalung risilo.

¹⁷ Magagalung ra pasimpungan ulun Kristian no ondo' matanda' toojo mampaugar ra kandoi nilo, musiti' urumaton am gajiin, mulu' poyo ilo ondo' mapirot toojo mampatanou am mangila'.

¹⁸ Sabap ra mokoondo' noyo tinulisan ra Buuk Kitab, “Pai' noyo bongkoso' kabang ru sapi' paat ra io mangagik,” am poyo ra “Mangangandoi no maaya' mangapu ra ampos ru kandoi nano.”

¹⁹ Amon ru sangulun magagalung ra pasimpungan ulun Kristian uwin, pai' pangintopot amon ru kalo sungkaan ru ruo kapoam talu ngaulun sasi'.

²⁰ Sawayo' noyo ra saang ru ulun masuang ilo ondo' mambaal ra tula, maa' raginio bokon no pana malaa' boo tumilu.

²¹ Giu' ra saang ri Aki Kapuuno' am i Jisus Kristus am poyo ra malaikat-malaikat matulai, maminson aku toojo rirun ra suguto' noyo ngaangai' pangilaan ragitio, am pai' inggio' bokon, kaa' pogogondoon mu ayuk.

²² Pai' kaluoi papabanta' ra kalindu' ra ulu ru sasangulun, koson ra tatandu' ra mangiou riso ra mangngandoi ru Tuhan. Amon ru ulun ra bokon mambaal ra tula, pai' no pakaayaya'. Kaa' alungi' ayuk toojo kapasawan ru kaayagan muno.

²³ Pai' luuro' ayuk timug no inumo', kaa' inum niayuk kasanganu ra wain sabap ra okou magail ayuk marualan ra tinai'.

²⁴ Mokoondo' niayuk tula ru sasangulun ondo' makito toojo am ukumin ra mataki', kaa' mokoondo' niayuk tula ru ulun bokon ondo' maintutunan ayuk ra tauli no.

²⁵ Mogondo' niayuk ra baal moonsoi, maluoi makito ru ulun; kaa' ondo' kalo maluoi makito pana, kalo niayuk mabuni.