1 SAMUIL 9 - Tanou Moonsoi Timugon

Naguma' i Saul am i Samuil

¹ Mokoondo' sangulun ungkuyon ondo' langkaya' am makakuasa' intor ra bansa' ru Binjamin. Inggalan ru ulun no i Kis anak ri Abiil, akupu ri Jiror, intor ra sasambaloi ri Bikorat, iono santayaran intor ra bansa' ru Apia.

² I Kis ti mokoondo' ra sangulun anak ungkuyon makainggalan ri Saul, sangulun buayoi ondo' maindon am mapanggol. Maindon poyo i Saul intor ra ngaangai' ru ulun giu' ra Israil am niayuk masawat poyo; kasuangan no ulun ru Israil ra bokon no polos ayuk ra limbawo ri Saul.

³ Sangarawan raginio, kukula' ngainan kaladai longgom ri Kis no natatak. Ginio ra indagu io ri Saul, “Ibito' sangulun ra ulipon no mabaya' rirun am ongoi uyumo' kaladai-kaladai no.”

⁴ Kopongo raginio i Saul am ulipon nano liminiput ra intok kabuluran ru Ipraim am Salisa, kaa' kalo natuum nilo kaladai-kaladai no. Kopongo raginio rinayus nilo pangkiralanan mongoi ra libung Saalim, kaa' kaladai-kaladai no kalio ra giu' no. Naguyum ilo poyo giu' ra wilayah Binjamin, kaa' kaladai-kaladai no lakat poyo kalo natuum.

⁵ Pakasaboi ilo giu' ra libung Jup, indagu i Saul ra ulipon nano, “Uli' tano, ati lair ru magalabo poyo i ama' i mangkara' rito intor ra kaladai-kaladai no.”

⁶ Taam ulipon no, “Pai' poyo! Giti ra bandar ti mokoondo' sangulun ulipon ri Aki Kapuuno'. Urumaton io kaga' ru ulun sabap ra atan ondo' raguon nano totopot masauk. Ongoi to uma' riso. Maaru' lair makapambala' io rito ra ati intok ru kaladai-kaladai no.”

⁷ Indagu i Saul, “Amon ru mongoi to uma' riso, atan kinua' pataakon to riso? Lutu' ra inibit tati nakai' noyo, am kolondo' atan pana boo pataakon to ra ulipon ri Aki Kapuuno' no?”

⁸ Taam ulipon no, “Aku ti mokoondo' sampila' ruit pirok. Pataakon ku ruit ti ra ulipon ri Aki Kapuuno' no, maa' raginio makapambala' io rito ra ati intok ru kaladai-kaladai no.”

^9-11 Taam i Saul, “Iou noyo! Ongoi tano.” Ongoi ilo boo ra bandar, intok inayanan ru ulipon ri Aki Kapuuno' no. Paat ilo nangkiwa' ra bulur sumuku' ra bandar no, nakatuum ilo ra kukula' ngaulun ralaa ondo' mongoi pansagou giu' ra tulubong. Kuati' nilo ralaa-ralaa no, “Mokoondo' kia ulun mangilong soroi ra bandar ti?” (Paat raginio, sangulun nabi sabiton ra ulun mangilong. Ginio ra paat sasangulun masaga' mangkuot ra rorondo' ri Aki Kapuuno', mindagu ilo, “Ongoi takau ra ulun mangilong.”)

^12-13 Taam ralaa-ralaa no, “Mokoondo'. Bagu io ayuk nakapagulu ramuyun. Amon ru mataki' kau, maaru' masunu' min io. Makasaboi kau ayuk ra bandar no, matuum min io. Bagu io minatong ra bandar no sabap ra paat orou raiti', mamagun mapataak ra taak simbalui ra rasawat ru altar giu' ra bulur. Ulun-ulun piniau kalo mangakan ra io kalo poyo makaratong, sabap ra io galing musiti' mambarakat ra taak simbalui no. Amon ru mongoi kau raino, makatuum kau riso ra io kalo poyo mangkiwa' ra bulur koson mangakan.”

¹⁴ Ginio ra i Saul am ulipon nano minongoi ra bandar. Paat ra ilo mumpos ra kulobon garabang, nakapantalison ilo ri Samuil ondo' tatanga' mangkiralan mongoi ra intok sambayangan giu' ra bulur.

¹⁵ Songorou ra kalo poyo raginio, minindagu noyo Tuhan ri Samuil,

¹⁶ “Susuab no tampilon ra susuab ti olo'-olo' paat koson ragitio, manusub Aku ra sangulun ungkuyon intor ra bansa' ru Binjamin muma' rirun. Umawo' ulu nano ra umau koson ra tatandu' nampili' riso masauk ra raja' ru ulun Kuno Israil. Mapalabus io ra ulun Kuno intor ra ulun ru Palistin. Nakito Ku noyo kaimbalaan ru ulun Kuno, am norongog Ku noyo tangi' nilo ra makiindangan.”

¹⁷ Pakakito i Samuil ri Saul, indagu Tuhan riso, “Gitio noyo ulun ra koon Kuli. Mamarinta io ra ulun Kuno.”

¹⁸ Liliwa' raginio i Saul no mongoi inggaar ri Samuil mamaar ra kulobon garabang, am pangkuot, “Makimaap aku, tuan, ati kinua' baloi ru ulun mangilong i?”

¹⁹ Taam i Samuil, “Aku no io i. Pagulu kano intor raki' mongoi ra intok sambayangan giu' ra bulur, sabap ra orou raiti' mangakan kau mabaya' raki'. Susuab no ra iosusuab taamon ku ngaangai' pangkuatan mino. Mopongo raginio muli' kau boo.

²⁰ Pai' kaimamang ra kaladai ondo' natatak ra talu ngoorou ra nakasail ti. Kaladai-kaladai no natuum noyo. Ra mulu' poyo ra ondo' gogoton kaga' ru ulun ru Israil iono okou; okou am sasambaloi ru ama' muno.”

²¹ Taam i Saul, “Aku ti intor ra bansa' ru Binjamin, bansa' ondo' boborok kaga' giu' ra Israil, am sasambaloi kuno ondo' kalo maatang kaga' ralalom ru bansa' raginio. Kua indagu kou raki' koson raginio?”

²² Kopongo raginio nangkimait i Samuil ri Saul am ulipon nano mongoi ra rondo' lamin ondo' maayo. Nangani' i Samuil ra intok ondo' maatang no risilo giu' ra saang ru ulun-ulun piniau, ondo' suang no olo'-olo' talu ngoopor ngaulun.

²³ Indagu i Samuil ra ulun mangngansak no, “Pasulungo' noyo kual ondo' pinataak kuli rirun, ondo' pinabulian kuli rirun.”

²⁴ Kopongo raginio nagibit ulun mangngansak no ra kual moonsoi kaga' intor ra kual ru paa am pasulungo' no ginio ri Saul. Indagu i Samuil, “Gitio noyo tayar ondo' binulian ku ra tayar muno, maa' raginio makaakan kou mabaya' ra ulun-ulun piniau no. Akan no.” Ginio ra minaya' i Saul ri Samuil nangakan paat ra orou raginio.

²⁵ Kopongo raginio minugar ilo intor ra intok sambayangan am umpos ra bandar no. Inanian i Saul ra intok pambalangan giu' ra rasawat ru taap ru baloi,

²⁶ am pombolong io ra giu' no. Paat ra sumirang mato ru orou, nampiau i Samuil ri Saul ondo' soroi ra rasawat ru baloi no. Kono, “Sukal no. Rapitin tokou.” Sukal i Saul, am ugar nabaya' ri Samuil.

I Samuil nampili' ri Saul masauk ra raja'

²⁷ Paat ra ilo nakasaboi ra kiing ru bandar, indagu i Samuil ri Saul, “Susubo' ulipon muno magulu ugar.” Kopongo raginio minugar ulipon no, am indagu poyo i Samuil, “Uog ragiti sangkinolor. Masaga' aku mambala' rirun ra ragu ri Aki Kapuuno'.”