1 SAMUIL 7 - Tanou Moonsoi Timugon

¹ Kopongo raginio mamagun ru Kiryat-Jiarim nangalap ra Kaban Nabantuan ru Tuhan no am inibit ginio ra baloi ru sangulun ondo' makainggalan ri Abinadab; baloi no giu' ra rasawat ru bulur. Patimpokon nilo i Iliajar anak ri Abinadab koson magalung ra Kaban Nabantuan.

Namarinta i Samuil ra Israil

² Nabuoi niayuk Kaban Nabantuan ru Tuhan no soroi ra Kiryat-Jiarim, olo'-olo' ruo ngoopor ngambilor. Buoi raginio ngaangai' ru ulun ru Israil nampiau makiindangan ra Tuhan.

³ Indagu i Samuil ra ulun ru Israil, “Amon ru masaga' kau sumaguli' ra Tuhan am sumamba Riso ra sototopot ru guang min, patiri' noyo ngaangai' dewa ru bansa' ru bokon no am sinungkalalaing Dewi Asyitorit. Pataako' min noyo inan mino lingono' ra Tuhan am pangandoi kano Riso ayuk. Bagu no mapalabus Io ramuyun intor ra kuasa' ru ulun ru Palistin.”

⁴ Ginio ra ulun ru Israil namatir ra ngaangai' sinungkalalaing Dewa Baal am Dewi Asyitorit, am siminamba ra Tuhan ayuk.

⁵ Kopongo raginio indagu i Samuil, “Timungo' noyo ngaangai' ulun ru Israil giu' ra Mijpa. Mopongo raginio makiasi' aku ra tayar min ra giu' no.”

⁶ Ginio ra ilo ngaangai' timinimung giu' ra Mijpa. Nansagou ilo ra timug am sinasaran ginio ra tayar ru taak ra Tuhan. Nampali ilo niayuk buoi songorou. Indagu ilo, “Makatula akai noyo ra Tuhan.” (Giu' ra Mijpa nanalasai i Samuil ra baal pansangaran ru gino ngai' ru ulun ru Israil.)

⁷ Pakaining ulun ru Palistin ra ulun ru Israil timinimung noyo giu' ra Mijpa, limo ngaulun raja' ru Palistin no minongoi ra giu' nababaya' ra saujor nilo koson mamulunsar ra ulun ru Israil. Nalaa' ulun ru Israil paat ra ilo nokorongog ra baal raginio.

⁸ Indagu ilo ri Samuil, “Pai' kou longgo' makiasi' ra Tuhan, i Aki Kapuuno' takano, maa' raginio bayagon No itakau intor ra ulun ru Palistin.”

⁹ Nanimbalui i Samuil ra sanginan anak domba mamulok am pinataak no ginio ra tayar ru taak simbalui koson mapabansuk ra guang ru Tuhan. Kopongo raginio nakiasi' io ra Tuhan mangindangan ra Israil, am iniou ru Tuhan pakiasian nano.

¹⁰ Tatanga' i Samuil mapataak ra taak simbalui no, tumalimpuun ulun ru Palistin mamulunsar risilo. Kaa' paat raginio niayuk, naningkalur Tuhan intor ra limbowon koson mangayou ra ulun ru Palistin. Nataliajou ilo am nagigiru' ra naubong.

¹¹ Miningkual saujor ru Israil intor ra Mijpa am nangilou ra ulun ru Palistin saboi mamaar makasaboi ra Bit-Kar, liliwa' namatoi risilo ra galur ru ralan.

¹² Kopongo raginio pinatirong ri Samuil rondo' batu giu' ra balitan ru Mijpa am Siin. Kono, “Nangindangan noyo toojo Tuhan no ritakau.” Ginio ra inggalani' no batu no ra “Batu Nangindangan”.

¹³ Koon raginio noyo ra ulun ru Palistin kinala. Buoi ri Samuil naayag, nongompong Tuhan ra ulun ru Palistin sumubol lalayau ra intok ru Israil.

¹⁴ Ngaangai' bandar ru Israil tinalingaau noyo ru ulun ru Palistin, intor ra Ikron saboi ra Gat, pinasaguli' ra Israil. Koon raginio ra Israil nakaalap saguli' ra titikop ru wilayah nilo. Ulun ru Israil am ulun ru Amori pana naayag ra moonsoi.

¹⁵ Namarinta i Samuil ra Israil ra buoi ru bayag nano.

¹⁶ Moonong bilor ongoyon no liputo' Bitil, Gilgal am Mijpa. Giu' no nanalasai io ra baal-baal ru pansangaran.

¹⁷ Kopongo raginio masalok io muli' ra baloi nano giu' ra Rama. Giu' no nasauk io niayuk ra akim ru ulun ru Israil. Giu' ra Rama, nambaal io rondo' altar ra tayar ru Tuhan.