1 SAMUIL 4 - Tanou Moonsoi Timugon

Kaban Nabantuan ginaau ru ulun ru Palistin

¹ Moonong i Samuil mindagu, ngaangai' ulun ru Israil rumongog riso.Paat raginio nanimung ulun ru Palistin ra saujor nilo koson mamulunsar ra Israil. Ginio ra saujor ru Israil pana minongoi ra intok pangayawan. Saujor ru Israil nangkim giu' ra Ibin-Gaijir, am saujor ru Palistin nangkim giu' ra Apik.

² Namulunsar saujor ru Palistin ra saujor ru Israil, am kalupus nampapatoi toojo, naala saujor ru Israil. Olo'-olo' 4,000 ngaribu ngaulun ru Israil pinatoi ru saujor ru Palistin ra pangayawan no.

³ Paat ra saujor ru Israil ondo' lakat poyo naayag no minuli' ra pangkiman, indagu tingganai-tingganai ru Israil, “Kua kia nopoloso Tuhan no ra saujor ru Palistin no nangala ritakau ra orou raiti'? Ibok ibito' takau Kaban Nabantuan ru Tuhan intor ra Silo, maa' raginio Io mabaya' ritakau am mamayag ritakau intor ra pantula'.”

⁴ Ginio ra nanusub ilo ra ulun mongoi ra Silo koson mangalap ra Kaban Nabantuan ru Tuhan Ondo' Maayo Kaga' Kuasa', ondo' soroi ra rasawat ru Kirub. Karuruo ngaulun ra anak ri Ili, iono i Gopni am i Pinigas pana minatong nabaya' ra Kaban Nabantuan no.

⁵ Paat ra Kaban Nabantuan no nakasaboi ra pangkiman, noloos saujor ru Israil ra mapuor kaga' sabap ra naansukan, saboi tana' ti mapuyu'.

⁶ Nokorongog niayuk saujor ru Palistin ra noloos no am indagu, “Kua nua' noloos ulun ru Ibrani no?” Kaa' kalupus ra ilo nakapandai ra Kaban Nabantuan ru Tuhan nakasaboi noyo ra pangkiman ru ulun ru Ibrani,

⁷ nalaa' ilo. Konilo, “Mokoondo' ra dewa minatong ra pangkiman nilono! Aibui boo ritakau ti! Kalo poyo igondo' takau pakaili' ra baal koson ragitio!

⁸ Osoi kinua' makapamayag ritakau intor ra dewa-dewa ondo' maikang no? Dewa-dewa raginio noyo ondo' nakapamuso ra ulun ru Misir giu' ra tana' kaagisan ragili.

⁹ Pai' kau kalaa', saujor ru Palistin kau ngai'! Pangayou kano koson ra ungkuyon! Amon ru kalo, masauk takau ra ulipon ru ulun ru Ibrani koson ilo ragili nasauk ra ulipon takau. Ginio ra baani kano ra mangayou!”

¹⁰ Nangayou toojo saujor ru Palistin, am kinala nilo saujor ru Israil. Nagigiru' saujor ru Israil minongoi ra kim ru sigagama' sabap ra ilo naala toojo; suang 30,000 ngaulun saujor ru Israil no minatoi.

¹¹ Kaban Nabantuan ri Aki Kapuuno' no ginaau ru pantula', am karuruo anak ri Ili, i Gopni am i Pinigas minatoi.

Minatoi i Ili

¹² Sangulun intor ra bansa' ru Binjamin nagiru' intor ra intok pangayawan no am ongoi ra Silo. Nakasaboi io ra Silo ra orou raginio niayuk. Rinilak-rilak no noyo bayang nano am pinatauk tana' ra ulu koson ra tatandu' mangiluk guang.

¹³ I Ili ondo' magalabo kaga' mangkara' ra Kaban Nabantuan no tatanga' nanturung ra kurisi' giu' ra kiing ru ralan, liliwa' mangkuliman. Paat ra ulun no napatanou ra kakalaan ru ulun ru Israil giu' ra titikop ru bandar, nantatangi' ngaangai' ulun ra mosongou.

¹⁴ Norongog ri Ili noloos no am pangkuot, “Atan noloos no?” Liliwa' raginio pasimbul ulun ra raitii' ni am pambala' ra tanou malaat no.

¹⁵ Paat raginio umur ri Ili siam ngoopor am balu' ngambilor am mamaar io no moolou.

¹⁶ Indagu ulun no ri Ili, “Nagiru' aku intor ra intok pangayawan ra orou raiti' am kakasaboi ku ayuk.” Pangkuot i Ili riso, “Atan tanou muno, ali ra anak kuno?”

¹⁷ Taam ulun nagibit ra tanou no, “Nagigiru' saujor ru Israil intor ra saujor ru Palistin. Naala akai kaga'. Masuang ulun pinatoi, nakaaya' ruo ngaulun anak muli, i Gopni am i Pinigas. Kaban Nabantuan ri Aki Kapuuno' niayuk ginaau ru pantula'!”

¹⁸ Paat ra ulun no nanabit ra Kaban Nabantuan, naratu' i Ili pakalangan intor ra kurisi' nano, giu' ra kiing ru kulobon garabang. Matutuo io noyo kaga' am molomok kaga', saboi paat io naratu' napandak liog nano. Paat raginio niayuk io minatoi. Nasauk io ra tingganai ru Israil buoi apat ngoopor ngambilor.

Napuor ri Pinigas no minatoi

¹⁹ Paat raginio, anak mangiwan ri Ili, iono andu' ri Pinigas, tatanga' maapang am maar noyo paat ru paganakan nano. Paat ra io nokorongog ra Kaban Nabantuan ri Aki Kapuuno' ginaau noyo am iwan nano ra ungkuyon am niayuk ralaki nano minatoi noyo, namulali' io marualan ra maganak, am kalo nabuoi raginio naganak io.

²⁰ Paat ra io mamaar noyo matoi, ruandu'-ruandu' ondo' nangindangan riso no mindagu riso, “Ikango' guang muno! Ungkuyon anak mutu!” Kaa' kalo timinaam io kapoam nampalio risilo.

²¹ Ininggalanan no anak raginio i Ikabod. Kono, “Nairu' noyo boo ra Israil ti katulayan ri Aki Kapuuno'.” Rinagu no ginio sabap ra Kaban Nabantuan ginaau noyo am iwan nano ra ungkuyon am niayuk ralaki nano minatoi noyo.

²² Kono, “Katulayan ri Aki Kapuuno' nangiruan noyo ra Israil, sabap ra ginaau noyo Kaban Nabantuan ri Aki Kapuuno'.”