1 SAMUIL 30 - Tanou Moonsoi Timugon

Mangayou manggal ra ulun ru Amalik

¹ Kopongo ruo ngoorou, i Daut am ulun-ulun nano nakasaboi giu' ra Jiklag. Ulun ru Amalik nantakou noyo ra tampilon rabugus ru pagun Jiuda am namulunsar ra Jiklag. Sinolob nilo bandar Jiklag,

² am namparakop ra ngaangai' ruandu'. Kalo poyo namatoi ilo ra osoi pana, kaa' binundus nilo noyo moonong ulun paat ra ilo nangiruan ra bandar no.

³ Paat ri Daut am ulun-ulun nano nakasaboi ra giu' no, ilai' nilo bandar no sinolob noyo am anak andu' nilono binundus noyo ru pantula'.

⁴ I Daut am ulun-ulun nano nantatangi' ra mangiluk guang ra kalo timinulou saboi ra ilo kalo boo makatangi'.

⁵ Karuruo andu' ri Daut, i Aginoam am i Abigail, binundus niayuk.

⁶ Raino i Daut ralalom ru kapaganan maayo. Ulun-ulun nano siminangit riso sabap ra kalio noyo boo anak andu' nilono. Nompololob ilo koson momobol ri Daut, kaa' Tuhan Aki Kapuuno' nano nangikang ra guang nano.

⁷ Kon ri Daut ra Imam Abiatar anak ri Agimilik, “Ibito' noyo efod no raki'.” I Abiatar pana nagibit ra efod no ri Daut.

⁸ Kopongo raginio pangkuot i Daut ra Tuhan, “Musiti' aku kia mangilou ra ulun-ulun mantakou no? Makarakop aku kia risilo?” Taam Tuhan, “Ilowo' noyo ilo. Masunu' mu ilo am mamayag ra ulun-ulun rinakop.”

⁹ Ginio ra nabaya' i Daut am onom ngaatus ngaulun ulun nano minugar. Paat ra ilo nakasaboi ra Sungoi Bisor, santayaran risilo no minuog ra giu' no.

¹⁰ Nabaya' i Daut am apat ngaatus ngaulun ulun nano naparayus ra pangkiralanan. Ruo ngaatus ngaulun ra bokon no naagui kaga' koson sumandaup ra sungoi, am uog ilo boo ra giu' no.

¹¹ Ralalom pangkiralanan raginio ulun-ulun ri Daut nakatuum ra sangulun lalaing ungkuyon ru bansa' Misir giu' ra intok malimparang, am ibito' nilo boo lalaing no ri Daut. Inanian nilo io ra akanon am inumon,

¹² am niayuk kukula' kuui ru ara am ruo ngantiis kismis. Pakaakan io, maikang io boo saguli'; napandayan ra talu ngoorou noyo io kalo nakaakan am nakainum!

¹³ I Daut pana nangkuot boo riso, “Osoi kia tuan muno? Ati kia intor mutu?” Taam lalaing no, “Aku ti ulun ru Misir, ulipon ru sangulun Amalik. Iniruanan aku ru tuan kuli ra talu ngoorou ra nakasail i sabap ra narualan aku.

¹⁴ Sinubol mai noyo intok ru ulun Kriti giu' ra tampilon rabugus ru Jiuda am intok ru bansa' ru Kalib, am niayuk nonolob ngai' ra bandar Jiklag.”

¹⁵ Pangkuot i Daut riso, “Masaga' kou kia magibit ramon ra intok ru ulun raginilo?” Taam io, “Masaga' aku. Kaa' musiti' kou magibot ralalom inggalan ri Aki Kapuuno' ra kalo mamatoi kou raki' kapoam mapataak raki' ra tuan kuli.”

¹⁶ Io pana nangator ri Daut ra intok ru ulun raginilo. Ulun raginilo nakatabual ra giu' am giti, giu' ra titikop ru intok raginio. Tatanga' ilo mangakan manginum am maansukan sabap ra masuang rapu' ondo' ginaau nilo intor ra pagun ru ulun ru Palistin am Jiuda.

¹⁷ Paat ra tumawang ra suabon no, binulunsar ilo ri Daut am pangayawan no nasauk saboi ra rondom. Suai ra apat ngaatus ngaulun mamulok ondo' nagigiru' ra nangura' ra unta, kolondo' sangulun pana ra popolos ru pantula' ondo' nakapagiru'.

¹⁸ Nakasugut i Daut nangalap saguli' ra ngaangai' ondo' ginaau ru ulun ru Amalik, nakaaya' karuruo ngaulun andu' nano;

¹⁹ kolondo' sangulun pana natatak. Naalap saguli' ri Daut ngaangai' anak ungkuyon am anak ruandu' ru ulun-ulun nano, am niayuk ngaangai' no ondo' tinalingaau ru ulun ru Amalik.

²⁰ Niayuk poyo i Daut nampagaau niayuk ra ngaangai' domba am bibiag tinambiag ra bokon. Bibiag tinambiag no inuyung ru ulun-ulun ri Daut ra pagulu no, nakapansuai intor ra kuliamos ginaau ra bokon. Ilo pana mindagu boo, “Gitio tayar ri Daut!”

²¹ Kopongo raginio siminaguli' i Daut ra ruo ngaatus ngaulun ondo' naagui kaga' koson maya' riso, am ondo' tinatang giu' ra igig ru Sungoi Bisor. Inuma' nilo i Daut am niayuk ulun-ulun nano am mininggaar i Daut risilo am nanabi' risilo.

²² Kaa' gino ngai' ru ulun-ulun ri Daut ondo' minaya' riso, mokoondo' malaat am mangangkum. Konilo, “Ngaangai' ru ulun ti kalo nakaaya', ginio sabap ra kalo makaapu ilo ra atan pana intor ra kuliamos tinalingaau. Makaalap ilo ayuk ra anak andu' nilono, am mugar.”

²³ Kaa' kon ri Daut, “Akau pabukat ku ngai', pai' kano pambaal koson raginio ra atan ondo' tinaakan noyo ru Tuhan no ritakau. Nagalung Io noyo ritakau am nangani' ritakau ra kamanangan ra ulun-ulun mantakou no.

²⁴ Kolondo' sangulun pana makapangiou ra ginuang mino. Ngaangai' ru ulun musiti' makaalap ra tayar ondo' nogondo' suang no: ulun ondo' timinatang koson magalung ra kuliamos musiti' makaalap ra tayar ondo' nogondo' koson ra ulun ondo' minongoi ra pangayawan.”

²⁵ Sinauk ri Daut nangaruan raginio koson ra rondo' aturan, am intor raginio aturan raginio ginagaya' ru ulun ru Israil saboi raino.

²⁶ Paat ri Daut minuli' giu' ra Jiklag, inataran no santayaran intor ra kuliamos ginaau no ra rangan-rangan nano, iono tingganai-tingganai ru Jiuda, pinabaya' ra bilin, “Apuo' min noyo tangguang ti intor ra kuliamos ginaau ondo' inalap mai intor ra pantula' ru Tuhan.”

^27-31 Ilono intor ra bandar ragitilo: Bitil am Rama giu' ra tampilon rabugus ru Jiuda, Jatir, Aroir, Sipmot, Istimoa, Rakal am niayuk bandar ru ulun Jiragmiil, bandar-bandar ru ulun Kini, Orma, Bor-Asan, Atak am Gibron. Nangator i Daut ra tangguang no ra ngaangai' bandar intok natanggawan ri Daut am ulun-ulun nano ragili.