1 SAMUIL 3 - Tanou Moonsoi Timugon

Minintalang Tuhan no ri Samuil

¹ Liliwa' raginio, i Samuil ondo' lalaing ayuk poyo, tatanga' mangandoi ayuk ra Tuhan no inalungan ri Ili. Paat raginio sanganuan ayuk toojo mokoondo' ra ragu am intalangan intor ra Tuhan.

² Sarandaman raiti, i Ili ondo' matutuo noyo kaga' am mamaar moolou, tatanga' nombolong ra lamin nano.

³ Paat raginio i Samuil nombolong giu' ra ralalom baloi ru Tuhan, intok napabantaan ra Kaban Nabantuan ri Aki Kapuuno'. Ra kalo poyo tumawang, paat lampung ra rasawat ru altar lakat poyo mapaang,

⁴ pampiau Tuhan ri Samuil. Taam i Samuil, “Iou tuan!”

⁵ Kopongo raginio pasimbul io ongoi ri Ili am indagu, “Tuan nampiau kou raki', am ratong aku boo.” Taam i Ili, “Kalo nampiau aku rirun. Ongoi no koolong.” I Samuil pana minongoi boo koolong saguli'.

^6-7 Kopongo raginio pampiau poyo Tuhan no ri Samuil. Kalo nakapandai i Samuil ra ondo' nampiau no Tuhan, sabap ra kalo igondo' indagu Tuhan no riso. Ginio ra sukal io am ongoi ri Ili, am indagu, “Tuan nampiau kou raki', am ratong aku boo.” Kaa' taam i Ili, “Kalo nampiau aku rirun. Ongoi no koolong.”

⁸ Nampiau Tuhan no ri Samuil ra kaintalu, am sukal i Samuil am ongoi ri Ili. Indagu io, “Tuan nampiau kou raki', am ratong aku boo.” Kopongo raginio nakaliman i Ili ra Tuhan ondo' nampiau ra anak no.

⁹ Ginio ra indagu i Ili ri Samuil, “Ongoi no koolong. Amon ru piawon kou poyo, taamo' ra, ‘Indagu no, iou Tuhan. Rumongog ulipon Mutu.’ ” Saguli' boo i Samuil ra intok pambalangan nano.

¹⁰ Kopongo raginio ratong Tuhan am bigor ra intok raginio am niayuk nampiau poyo riso, “Samuil! Samuil!” Taam i Samuil, “Indagu no, iou Tuhan. Rumongog ulipon Mutu.”

¹¹ Indagu Tuhan riso, “Baalon Ku rondo' baal ondo' makalalaa' kaga' ra ulun ru Israil, saboi moonong ulun ondo' mokorongog no mokokotog.

¹² Paat ra orou raginio baalon Ku ngaangai' lolob Kuno ra sasambaloi ri Ili, intor ra talimpuun saboi ra pupus.

¹³ Nambala' Aku noyo riso ra mangukum Aku ra sasambaloi nano ra mantilayun, sabap ra anak-anak nano nagasab Raki'. Nakapandai i Ili ra binaal nilono, kaa' kalo ininggalaran no ilo.

¹⁴ Ginio ra magibot Aku ra sasambaloi ri Ili, ra koson mantilayun kolondo' taak simbalui kapoam taak ra atan pana ondo' makapuso ra tula ondo' makalalaa' kaga' no.”

¹⁵ Kopongo raginio luya' i Samuil ra intok nambalangan nano saboi ra iosusuab. Kopongo raginio sukal io am nangukab ra kulobon-kulobon ra baloi ru Tuhan. Malaa' io mambala' ri Ili intor ra napakitanan no,

¹⁶ kaa' nampiau i Ili riso, “Samuil, anak kuno!” Taam i Samuil, “Iou tuan.”

¹⁷ Nangkuot i Ili, “Atan kia rinagu ru Tuhan rirun? Tunungo' ngaangai' no raki'. Amon ru mokoondo' ondo' bunion muno, maaru' maagat pangukum rirun no ri Aki Kapuuno'.”

¹⁸ Ginio ra nantunung i Samuil ra ngaangai' no. Kalo binuni no atan pana. Kopongo raginio indagu i Ili, “Io noyo Tuhan; polosoon Io no mambaal ra atan ondo' karaan Nano ra moonsoi.”

¹⁹ Siminukor poyo i Samuil. Tuhan mabaya' riso am nambaal ra ngaangai' ondo' rinagu ri Samuil no totopot nasauk.

²⁰ Ngaangai' boo ru ulun ru Israil intor ra titikop pagun no nangiou ra i Samuil no nabi ru Tuhan.

²¹ Narayus Tuhan minintalang giu' ra Silo. Giu' no minintalang Io ri Samuil am minindagu riso.