1 SAMUIL 24 - Tanou Moonsoi Timugon

Kalo namatoi i Daut ra Raja' Saul

¹ Kopongo raginio minongoi i Daut ra In-Gidi am nansibuni ra giu' no.

² Paat ra Raja' Saul siminaguli' intor ra pangayawan minanggal ra ulun ru Palistin, nokorongog io ra soroi i Daut giu' ra tana' kaagisan mamaar ra In-Gidi.

³ Nampili' Raja' Saul ra talu ngaulun saujor ondo' moonsoi kaga' intor ra titikop ru Israil, am minugar naguyum ri Daut am ulun-ulun nano giu' ra tampilon sirangon ru Bulur Batu Kambing Kataunan.

⁴ Nakasaboi Raja' Saul giu' ra rondo' intok mamaar ra kukula' kandang ru domba ra kiing ru ralan. Siminubol Raja' Saul no ra ralalom ru luang batu ra giu' no ra mampangara'. Nakainamot toojo ri Daut am ulun-ulun nano tatanga' nansibuni ra luang batu raginio niayuk, giu' ra ujok poyo.

⁵ Indagu ulun ri Daut no riso, “Gitio noyo kaluagan muno. Sala' ka nakaindagu alia Tuhan no rirun koson ragitio, ‘Pantula' muno pataakon Kuno rirun, guguang muno mambaal ra kasagaan muno riso.’ ” Kopongo raginio simininok i Daut minongoi ra intok ru Raja' Saul am kalo nangginia' namutul koborok ra kiing ru sukub ru Raja' Saul.

⁶ Kaa' kalupus raginio, malimanan ri Daut ra makasala sabap ra binaal no ginio.

⁷ Indagu io ra ulun-ulun nano, “Gama' ru manginggalar Tuhan no raki' intor ra mambaal ra malaat ra raja' kuno ondo' pinili' noyo ru Tuhan. Aku ti kalo ga makapaparuol ra raja' no ra sanganu pana sabap ra raja' no pinili' noyo ru Tuhan.”

⁸ Kon raginio noyo i Daut nanimayo ra ulun-ulun nano, am kalo nangiou risilo ra mamulunsar ra Raja' Saul. Ingkakat Raja' Saul no am iruani' luang batu no, am naparayus ra pangkiralanan.

⁹ Kaa' sinunu' ri Daut no Raja' Saul giu' ra liwar ru luang batu am nampiau intor ra bakulung nano, “Raja' kuno!” Nangkaili Raja' Saul, am kuku' i Daut ra sumamba

¹⁰ am indagu, “Kua rongogo' mu ragu ru ulun ondo' mansunur ra masaga' aku mapajamar rirun?

¹¹ Raino nakaili' kou galama' ra giu' ra ralalom ru luang batu ni, pinataak kou noyo ru Tuhan no raki'. Sinusub aku ru kukula' ngaulun ulun kuno koson mamatoi rirun, kaa' marara' aku. Tinaam ku ra kalo masaga' aku mapakaruol ra raja' ondo' pinili' noyo ru Tuhan.

¹² Ilai' noyo ama'! Ilai' noyo putul ru sukub mutu ondo' ginuut kutu! Sotopot no mapatoi tokou, kaa' pinutul ku ayuk koborok kiing ru sukub muno. Baal ragitio napainono' ra aku ti kalo nampaguang ra malaat kapoam manggal. Nangingilou kou raki' koson mamatoi raki', kabalu' pana kolondo' sala kuno ra sanganu pana rirun.

¹³ Gama' ru mamatas Tuhan no ra osoi ondo' makasala, aku kapoam okou. Amon ru mambalos Tuhan no ra binaal muno raki', kaa' kalo rualin tokou ra sanganu pana.

¹⁴ Nakapandai kou ra pagabigan lair ti, ‘Kalaatan no baalon ayuk ru ulun malaat.’ Ginio sabap ra kalo rualin tokou.

¹⁵ Imansaa' aku ti ondo' masaga' potoyon ru raja' ru Israil! Ilai' noyo aku ti ondo' ilolowon mutu! Aku ti sanginan uku' minatoi ayuk, rondo' kutu ayuk!

¹⁶ Tuhan no mangakim rirun am aku, am mangaru' ra osoi ondo' makasala. Gama' ru Io manutun ra baal ragitio, am manaung raki' am niayuk mamayag raki' intor rirun.”

¹⁷ Kopongo i Daut minindagu raginio, indagu Raja' Saul, “Motopot kia ra okou i Daut, anak kuno?” Nantangi' boo Raja' Saul.

¹⁸ Kopongo raginio indagu Raja' Saul ri Daut, “Topot ra okou noyo ondo' motopot am aku ondo' makasala. Moonsoi kou kaga' raki', kabalu' pana malaat aku rirun.

¹⁹ Orou raiti' napainono' kou noyo ra moonsoi kou raki'. Kalo pinatoi mu aku kabalu' pana Tuhan no napataak noyo raki' rirun.

²⁰ Sanganuan ayuk toojo ulun mapalabus ra pantula' ra kalo rualin no ra malupus tuumon no pantula' raginio. Tuhan mambarakat rirun sabap ra binaal muno ondo' moonsoi raki' ra orou raiti'!

²¹ Raino mangintopot aku ra okou noyo masauk ra raja' ru Israil, am ra pamarintaan ru Israil maulian ralalom ru pamarintaan muno.

²² Kaa' pakimabantu' no ralalom inggalan ru Tuhan ra okou kalo mamatoi ra papag kuno am kalo luluon inggalan ru sasambaloi kuno.”

²³ Ginio boo ra nagibot i Daut koson manugut ra kitaakon raginio. Kopongo raginio Raja' Saul minuli' ra baloi, am i Daut am ulun-ulun nano siminaguli' ra intok nansibunian nilono.