1 SAMUIL 23 - Tanou Moonsoi Timugon

Namayag i Daut ra mamagun ru bandar Kigila

¹ Paat ra sangarawan binalaan i Daut ra namulunsar ulun ru Palistin ra bandar Kigila am nanalingaau ra unor-unaran ondo' bagu kinumos.

² Ginio ra nangkuot io ra Tuhan, “Musiti' ku kia ongoyon bulunsaro' ulun ru Palistin?” Taam Tuhan, “Iou. Bulunsaro' ilo no am bayago' noyo mamagun ru Kigila.”

³ Kaa' indagu ulun-ulun ri Daut riso, “Ali ka giti ra Jiuda ti mangalaa' takano, mulu' piboo amon ru mongoi takau ra Kigila am mamulunsar ra ulun ru Palistin!”

⁴ Ginio ra nangkuot poyo i Daut ra Tuhan, am taam Tuhan, “Ongoi no am bulunsaro' noyo bandar Kigila, sabap ra manaak Aku rirun ra kamanangan ra ulun ru Palistin.”

⁵ I Daut am ulun-ulun nano pana minongoi boo ra Kigila am namulunsar ra ulun ru Palistin. Namatoi ilo ra masuang ulun ru Palistin am nanalingaau ra bibiag tinambiag nilono. Kon raginio noyo i Daut namayag ra mamagun ru bandar no.

⁶ Paat ri Abiatar anak ri Agimilik nagiru' minongoi ri Daut, am minaya' ri Daut minongoi ra Kigila, io niayuk nagibit ra efod.

⁷ Raja' Saul no binalaan ra minongoi noyo i Daut ra Kigila, indagu boo Raja' Saul ralalom ru guang, “Raino napataak noyo i Aki Kapuuno' ri Daut no ra kalindu' kutu. Nalandak noyo i Daut sabap ra minumpos ra ralalom ru bandar ondo' makatimbok am mokoondo' ra kulobon garabang ondo' makaumpok.”

⁸ Ginio ra nanimung Raja' Saul ra saujor-saujor nano am minongoi ra Kigila koson magawang ra Raja' Daut mabaya' ra ngaangai' ru ulun nano.

⁹ Pokorongog i Daut ra malaat ginuang ru Raja' Saul koson mamulunsar riso, indagu io ra Imam Abiatar, “Ibito' efod no ragiti.”

¹⁰ I Daut pana makiasi', “Iou Tuhan, i Aki Kapuuno' ru Israil, norongog ku noyo ra makaguang Raja' Saul no matong ra Kigila ti am mamuso ra bandar ragitio sabap ra aku, ulipon Mutu.

¹¹ Pataakon kinua' aku ti ru mamagun Kigila ti ra Raja' Saul? Motopot kia ra matong Raja' Saul koson ra ondo' norongog kutu? Iou Tuhan, i Aki Kapuuno' ru Israil, kitaakon ku, taam no raki'!” Taam Tuhan, “Iou, matong Raja' Saul.”

¹² Nangkuot poyo i Daut, “Pataakon kinua' aku ti am ulun-ulun kuti ru mamagun Kigila ti ra Raja' Saul?” Taam Tuhan, “Iou.”

¹³ Ginio ra i Daut am ulun-ulun nano, olo'-olo' onom ngaatus ngaulun, nagindibok nangiruan ra Kigila am timinanggau intor ra rondo' intok minongoi ra intok ra bokon. Pokorongog Raja' Saul ra minugar noyo i Daut intor ra Kigila, kalo sinugut no inatangan nano.

I Daut giu' ra kabuluran

¹⁴ Nansibuni i Daut giu' ra intok-intok panindungan giu' ra kabuluran, giu' ra tana' kaagisan Jiip. Masalok io ilolowon ru Raja' Saul, kaa' Tuhan kalo napataak riso ra Raja' Saul.

¹⁵ Nalaa' i Daut no sabap ra Raja' Saul no totopot masaga' koson mamatoi riso. Rondo' paat ra i Daut soroi giu' ra Oris, giu' ra tana' kaagisan Jiip.

¹⁶ Minongoi i Jonatan tuum riso ra giu' no am napaikang riso ra i Aki Kapuuno' no manindung riso.

¹⁷ Kon ri Jonatan riso, “Pai' kalaa', kalo marakop kou ru ama' kuno. Nakapandai io toojo ra okou noyo masauk ra raja' ru Israil am ra aku ti makaintok ra ragana' muno.”

¹⁸ I Daut am i Jonatan pana nabantu' ra tutun giu' ra saang ru Tuhan. Kopongo raginio minuli' i Jonatan ra baloi nano, am i Daut liminayun ra Oris.

¹⁹ Kopongo raginio kukula' ngaulun intor ra Jiip minuma' ra Raja' Saul giu' ra Gibia am indagu, “Nansibuni i Daut giu' ra Wilayah maino giu' ra intok panindungan giu' ra Oris, giu' ra rasawat ru Bulur Gakila, tampilon ra rabugus ru tana' kaagisan Jiuda.

²⁰ Nakapandai akai ra masaga' kou mamparakop riso. Ginio ra ratong noyo ra wilayah maino. Tutunon mai toojo ra marakop mu io.”

²¹ Indagu Raja' Saul, “Gama' ru barakaton kau ru Tuhan sabap ra moonsoi raki'.

²² Ugar kano am tutuno' min igondo' poyo. Imumuyi' min toojo intok sinarayan ri Daut am osoi nakakito noyo riso ra giu' no. Norongog ku ra mapintar io kaga'.

²³ Ilai' min toojo intok-intok ondo' nasauk ra pansibunian nano, am kataki' kau saguli' mambala' raginio raki'. Ongoyon ku boo mabaya' ramuyun. Amon ru lakat io poyo soroi ra intok raginio, maaru' sunuon ku io kabalu' pana ra musiti' aku lumiput ra titikop ru Jiuda.”

²⁴ Ilo pana minuli boo ra Jiip siminigulu ra Raja' Saul. Paat raginio i Daut am ulun-ulun nano soroi giu' ra intok masiluk Maon, giu' ra limayak ondo' masiluk ra tampilon rabugus ru tana' kaagisan Jiuda.

²⁵ Raja' Saul am ulun-ulun nano minatong koson maguyum ri Daut, kaa' ulun minongoi pambala' ri Daut ra baal raginio. Ongoi boo i Daut ra rondo' bulur makabatu giu' ra tana' kaagisan Maon am ayan ra giu' no. Pakapandai Raja' Saul raginio, nataki' io nangilou ri Daut.

²⁶ Raja' Saul am ulun-ulun nano minugar giu' ra sisil ru rondo' sapapa' ru gunung am i Daut am ulun-ulun nano giu' ra sisil ru sapapa' ra bokon no. Nagindibok i Daut nagiru' intor ra Raja' Saul ondo' tumalimpuun noyo magawang risilo am maar mamparakop risilo.

²⁷ Nainamot paat raginio sangulun sinusub minatong uma' ra Raja' Saul am indagu, “Raja' mai, ribaki' uli' no! Ulun-ulun ru Palistin tatanga' mamulunsar ra pagun takau!”

²⁸ Ginio sabap ra linanggaan ru Raja' Saul nangilou ri Daut, am ongoi boo pangayou manggal ra ulun ru Palistin. Ginio sabap ra intok raginio ininggalanan ra Bulur Pantuliaran.