1 SAMUIL 22 - Tanou Moonsoi Timugon

Namatayan ra imam-imam

¹ Kopongo raginio nangiruan ri Daut ra bandar Gat am nansibuni giu' ra luang batu mamaar ra bandar Adulam. Paat ra maayo-maayo nano am ngaangai' sasambaloi nano nokorongog ra soroi io ra giu' no, ratong ilo riso.

² Ngaangai' ulun ondo' naimbolo', kapoam ondo' makautang, kapoam ondo' manguang, niayuk minamung ri Daut, am nasauk i Daut ra tingganai nilo. Suang ru mamaya' ri Daut no olo'-olo' apat ngaatus ngaulun.

³ Intor ra luang batu no minongoi i Daut ra Mijpa giu' ra pagun Moab. Indagu io ra raja' Moab no, “Paayano' noyo matuo kuno rirun saboi ra aku makapandai ra kasagaan ri Aki Kapuuno' no raki'.”

⁴ Ginio ra inibit ri Daut no matuo nano ra raja' ru pagun Moab, am minayan ilo ra giu' no buoi ri Daut nansibuni giu' ra luang batu.

⁵ Kopongo raginio, sangarawan raginio sangulun nabi ondo' makainggalan ri Gad minatong ri Daut am indagu, “Pai' ayan ra luang batu ti. Ongoi noyo mataki' ra tana' Jiuda.” Iruani' boo ri Daut intok raginio am ongoi ra kataunan ru Kirit.

⁶ Sangarawan raginio tatanga' Raja' Saul nanturung ra ragana' ru puun tamariska giu' ra rasawat ru bulur giu' ra Gibia; tatanga' io nampaguut ra tutura' am ngaangai' pagawai minigor ra liput nano. Paat ra io nokorongog ra intok ri Daut am ulun-ulun nano natuum noyo,

⁷ indagu io ra pagawai-pagawai nano, “Rongogo', akau ngaangai' ulun ru Binjamin! Mangkara' kau kia ra i Daut no mangani' ramuyun ra umo am umo ru anggur? Saukon kau kia ngaangai' ra pagawai ralalom ru saujor nano?

⁸ Ginio kia boo ra akau nampakat gumula' raki' am kolondo' sangulun pana nambala' raki' ra anak kuno galama' nanaung noyo ri Daut no? Kolondo' sangulun pana ramuyun nangkara' raki'. Kolondo' sangulun pana ramuyun nambala' raki' ra i Daut, ulun kuno galama', paat ra raino ti tatanga' maginaa ra kaluagan koson mamatoi raki', am i Jonatan, anak kuno nangunsu' noyo riso!”

⁹ I Doig, tingganai ru magagalung ra bibiag tinambiag ru Raja' Saul, niayuk soroi ra giu' no nabaya' ra pagawai-pagawai ru raja', kon boo ri Doig, “Nakakito aku ri Daut minatong ri Agimilik anak ri Agitub, giu' ra Nob.

¹⁰ Nakitulu' i Agimilik intor ra Tuhan intor ra atan musiti' baalon ri Daut. Kopongo raginio linutuan ri Agimilik i Daut ra akanon am nangani' riso ra ilang ri Goliat, ulun ru Palistin no.”

¹¹ Ginio ra nanusub Raja' Saul no ra ulun mambala' ra Imam Agimilik am ngaangai' ru sasambaloi nano ondo' nasauk ra imam giu' ra Nob maa' raginio matong uma' riso.

¹² Pakasaboi ilo, indagu Raja' Saul ri Agimilik, “Rongogo', okou anak ri Agitub!” Taam io, “Iou, raja' kuno.”

¹³ Pangkuot Raja' Saul riso, “Kua pampakat kou am i Daut mamatoi raki'? Kua anii' mu io ra akanon am ilang? Kua pakitulu' kou ri Aki Kapuuno' ra tayar nano? Raino giminuor io raki', am tatanga' maginaa ra kaluagan koson mamatoi raki'!”

¹⁴ Taam i Agimilik, “Kaa' sala' ka i Daut no alia pagawai muno ondo' gumagaya' kaga'? Io anak mangiwan muno galama', tingganai magagalung rirun ayuk am urumaton kaga' ru ngaangai' ulun giu' ra istana.

¹⁵ Topot ra nangkuot aku noyo ra Tuhan ra tayar nano, kaa' ginio sala' ka kainsaa'. Intor ra pampakatan gumula' rirun, totopot kalo! Pai' panguu' raki' kapoam osoi pana ra sasambaloi kuno. Kalo nakapandai aku raginio!”

¹⁶ Indagu Raja', “Agimilik, okou am ngaangai' sasambaloi muno musiti' matoi.”

¹⁷ Kopongo raginio nangani' Raja' Saul ra susuban ra magagalung-magagalung ondo' minigor ra sapapa' nano, “Potoyo' min imam-imam ru Tuhan ti! Nampapakat ilo noyo ri Daut, am kalo nambala' raki' ra nagiru' noyo i Daut, kabalu' pana nakapandai ilo ra buoi ti.” Kaa' magagalung-magagalung no kalo masaga' mamatoi ra imam-imam ru Tuhan no.

¹⁸ Ginio ra indagu Raja' Saul ri Doig, “Okou noyo mamatoi risilo!” Pinatoi boo ri Doig no ngaangai' ru imam no. Paat ra orou raginio namatoi io ra balu' ngoopor am limo ngaulun imam ondo' iniou mambayang ra efod.

¹⁹ Nanusub niayuk Raja' Saul maa' raginio ngaangai' ru mamagun ru Nob, bandar ru imam no, potoyon ngaangai' no, nakaaya' ungkuyon, ruandu', lalaing, lalagang, am niayuk sapi', kaladai am niayuk domba.

²⁰ Kaa' i Abiatar, sangulun intor ra anak ri Agimilik, nakapagiru'. Minongoi io ri Daut,

²¹ am nambala' ri Daut ra Raja' Saul namatoi noyo ra imam-imam ru Tuhan.

²² Indagu i Daut riso, “Paat ra aku nakakito ri Doig ra orou raginio, nakapandai aku ra maaru' mambala' io ra Raja' Saul. Ginio ra aku noyo ondo' mansaan ra pinatayan ru ngaangai' ru sasambaloi muno.

²³ Ayan no raki' am pai' kalaa'. Moogot Raja' Saul no mamatoi rirun, kaa' moogot io mamatoi raki' niayuk. Ginio ra mamimio kou ra intok kutu.”