1 SAMUIL 21 - Tanou Moonsoi Timugon

Nagiru' i Daut intor ra Raja' Saul

¹ Kopongo raginio minongoi i Daut ra Imam Agimilik giu' ra Nob. Nonontol i Agimilik miningkual tuum ri Daut, am pangkuot, “Kua ratong kou ragiti ra misasangulun?”

² Taam i Daut, “Kandoi pinataakan raki' ru raja' am nanginggalar mambala' ra osoi pana intor ra kandoi no. Ginio ra nanusub aku ra ulun kuno maginaa ra rondo' intok.

³ Masaga' aku mangkuot, atan akanon soroi rirun raino? Pataako' raki' limo ruti' kapoam atan ayuk ondo' soroi.”

⁴ Taam imam no, “Kolondo' ruti' ku ra bokon, ruti' ra pataakon ayuk ondo' soroi. Alapo' min ginio, amon ru ulun-ulun muno kalo nakimarulug ra ruandu' ra babagu ti.”

⁵ Taam i Daut, “Totopot kalo! Ulun-ulun kuno magail mapasau, kabalu' pana mapaugar ra kandoi kaindalaman ayuk; atan poyo ra raino ti paat ra akai mapaugar ra kandoi timpokon ti!”

⁶ Kopongo raginio ruti' ra pataakon no pinataak ru imam no ri Daut, sabap ra ruti' ondo' soroi riso no ruti' pataakon ondo' pinataak noyo ri Aki Kapuuno'. Ruti' no inalap noyo intor ra intok papataakan koson papaliton ra ruti' ondo' baguon. (

⁷ Nakainamot ra i Doig ulun ru Idom, tingganai ru magagalung ra bibiag tinambiag ru Raja' Saul, soroi ra giu' no paat ra orou raginio koson manugut ra pabaalin ru ugama.)

⁸ Nangkuot i Daut ri Agimilik, “Binulian mu kia tutura' kapoam ilang ondo' mapakai kuno? Susuban ru raja' no namulali' kaga' saboi naagou-agou aku minugar am kalo boo nakasimbat nangalap ra ilang kapoam kinandoi ra bokon.”

⁹ Taam i Agimilik, “Binulian ku ilang ri Goliat, ulun ru Palistin ondo' pinatoi muli giu' ra Limayak Ila. Ilang no soroi ra talikuron ru efod, linopot ra konoon. Amon ru masaga' kou ra ilang no, alapo' noyo, sabap ra ginio ayuk kinandoi mangayou ondo' soroi ragiti.” Indagu i Daut, “Ilang raginio noyo ondo' moonsoi kaga' ra titikop ru pagun; pataaki' noyo ilang no raki'!”

¹⁰ Paat ra orou raginio niayuk, nagiru' i Daut intor ra Raja' Saul, am minongoi ra Raja' Akis giu' ra bandar Gat.

¹¹ Indagu pagawai-pagawai ru Raja' Akis riso, “Sala' ka kia io ti i Daut, raja' ru giu' ra pagun nano? Io noyo ondo' kon ru ruandu'-ruandu' ondo' paat ragili liminigo'-ligo' liliwa' narimbai koson ragitio, ‘I Saul namatoi ra riribu ngaulun pantula', kaa' i Daut namatoi ra opor-opor ngaribu ngaulun pantula'.’ ”

¹² Ragu-ragu raginio nakajajou ra pangkaraan ri Daut, am nalaa' io kaga' ra Raja' Akis.

¹³ Ginio ra, giu' ra saang nilo i Daut no minitutuyang. Paat ra ilo kuminam mamparakop riso, ilain ayuk ra io kalo matanda'; binalis-balis no kulobon ru bandar no am pinoloso no tiwog nano timinilis ra jangut.

¹⁴ Kopongo raginio indagu Raja' Akis no ra pagawai-pagawai nano, “Kalo kia nakito min ra mantuyang ulun no? Kua ibito' min io ragiti?

¹⁵ Lakat poyo kia natutusan libung kutu ra ulun mantuyang, saboi inibit min sangulun mantuyang poyo ra istana kutu?”