1 SAMUIL 20 - Tanou Moonsoi Timugon

Nangindangan i Jonatan ri Daut

¹ I Daut pana nagiru' boo intor ra Nayot mamaar ra Rama, am minongoi uma' ri Jonatan. Pangkuot io ri Jonatan, “Atan kinua' binaal kutu? Atan kinua' kasalaan kutu? Atan kinua' tula kutu ra ama' muno saboi ra ama' muno masaga' mamatoi raki'?”

² Taam i Jonatan, “Pai' indagu koson raginio! Sabap ri Aki Kapuuno' no, kalo potoyon kou! Masalok ama' kuno mambala' raki' ra ngaangai' ru inatangan nano, ondo' maatang kapoam ondo' kalo maatang. Kalo igondo' io pambuni ra atan pana raki'. Kalo motopot baal raginio!”

³ Taam i Daut, “Nakapandai ama' muno ra motogom kou kaga' raki'. Ginio ra kalo nambala' ama' muno rirun ra atan ondo' inatang nano, maa' raginio kalo mangiluk guang muno. Magibot aku ralalom inggalan ru Tuhan ondo' naayag ra sotopot no kaayagan kutu matikapulir ra kapatayan!”

⁴ Kon ri Jonatan, “Suguton ku atan ayuk kitaakon muno.”

⁵ Taam i Daut, “Koson ragitio, susuab no Pangiantakan ra Sila' Bagu. Sotopot no aku ti musiti' maya' ra raja' no mangakan. Kaa' amon ru mangiou kou, mongoi aku pansibuni giu' ra padang saboi ra rondom ru malaas no.

⁶ Amon ru mangkuot ama' muno ra kua kalo siminaang aku, balai' io ra nakitaak aku noyo rirun koson mataki' muli' ra Bitligim, sabap ra giu' no paugaron upacara mapataak ra taak simbalui ru kabilaran ra tayar ru ngaangai' sasambaloi kuno.

⁷ Amon ru mindagu raja' no, ‘Iou noyo,’ aku ti am mamaa', kaa' amon ru sumangit raja' no, kapandayi' noyo ra namatas noyo raja' no koson mapajamar raki'.

⁸ Makiindangan aku rirun sabap ra naigot tano ru nabantuan ra saang ru Tuhan. Kaa' amon ru aku makasala, potoyo' aku no, kaa' pai' aku pataako' ra ama' muno.”

⁹ Taam i Jonatan, “Pai' kaimamang! Amon ru makapandai aku toojo ra ama' kuno totopot noyo mapajamar rirun, maaru' balain tokou.”

¹⁰ I Daut pana nangkuot boo, “Osoi kia ondo' mambala' raki' amon ru sumangit ama' muno?”

¹¹ Kon ri Jonatan, “Ibok ongoi to ra padang.” Minongoi ilo ruo ra padang,

¹² am indagu boo i Jonatan ri Daut, “Gama' ru Tuhan, i Aki Kapuuno' ru Israil no masauk ra sasi' to. Susuab no kapoam malaas no ra olo'-olo' paat ra raino ti, mirot aku koson manutun ra suang ru guang ru ama' kuno. Amon ru manampaliso moonsoi io rirun, kirimin tokou ra tanou.

¹³ Kaa' amon ru makaguang io koson mapajamar rirun, polosoon noyo Tuhan no mamatoi raki' amon ru kalo mambala' aku rirun ra baal raginio am mamayag rirun. Gama' ru mabaya' Tuhan no rirun koson Io mabaya' ra ama' kuno ragili!

¹⁴ Amon ru lakat aku poyo maayag, karaa' noyo ra nabantuan tali giu' ra saang ru Tuhan am gagaya' no raki'; kaa' amon ru kalio aku no boo,

¹⁵ pakitono' gagaya' muno ra papag kuno ra sabuoi-buoi no. Mopongo Tuhan no mamuso ra ngaangai' ru pantula' muno,

¹⁶ gama' ru nabantuan tano ruo mantilayun. Amon ru masulang nabantuan no, mangukum Tuhan no rirun.”

¹⁷ Ginio noyo kainduo ri Jonatan nakitaak ri Daut mabantu' koson motogom riso, sabap ra io galama' motogom ri Daut koson ra inan nano galama'.

¹⁸ I Jonatan pana mindagu boo riso, “Susuab no Pangiantakan ra Sila' Bagu. Amon ru kalo makasaang kou, maaru' mapandayan ru ulun sabap ra intok muno kolondo' manturung giu' ra mija' pagakanan.

¹⁹ Amon ru malaas no pana kalo makasaang kou, maaru' uyumon kou. Ginio ra ongoi no ra intok pansibunian muno galing, am pansibuni no ra tinaulian ru batu pinupug ra giu' no.

²⁰ Malaas no mamanah aku intalu ra tampilon ru batu pinupug no, ilain ayuk koson nampupugan no intok tiwon.

²¹ Mopongo raginio manusub aku ra ulipon kuno maguyum ra anak panah no. Amon ru mindagu aku riso, ‘Ilai' noyo, anak panah no mamaar poyo ragiti, alapo' noyo,’ arati' no ra maayag kou am makaingkual. Magibot aku ralalom inggalan ru Tuhan ondo' naayag no ra okou no kalo ra ralalom ru makalalaa' ra atan pana.

²² Kaa' amon ru mindagu aku ra ulipon kuno, ‘Anak panah no maalur poyo ra giu' no,’ arati' no ra manusub Tuhan no rirun mugar; ginio ra ugar no.

²³ Gama' ru manutun Tuhan no maa' raginio mantilayun to mampaguut ra nabantuan tano.”

²⁴ I Daut pana ongoi boo pansibuni giu' ra padang. Paat ra Pangiantakan ra Sila' Bagu, minatong Raja' Saul ra bunsag no.

²⁵ Koson ra kaindalaman no manturung Raja' Saul mamaar ra rinding; i Jonatan manturung mantaluma' riso, am i Abnir manturung ra sapapa' ru Raja' Saul, kaa' kurisi' ri Daut no kolondo' nanturung.

²⁶ Paat ra orou raginio, kalo naguta' Raja' Saul ra baal raginio sabap ra nangkara' io, “Maaru' mokoondo' nasauk ri Daut, saboi nangkinibit riso majamol.”

²⁷ Suabon raginio, songorou malupus Pangiantakan ra Sila' Bagu, kurisi' ri Daut no lakat poyo kolondo' nanturung. Kopongo raginio pangkuot Raja' Saul ri Jonatan, “Kua kinua' ri Daut kalo siminaang ra bunsag, ra mai' i am ra orou raiti'?”

²⁸ Taam i Jonatan, “Nakitaak io noyo raki' koson mongoi ra Bitligim.

²⁹ Kono, ‘Paugaro' aku no, sabap ra sasambaloi kuno tatanga' mangiantak ra karamayan mapataak ra taak simbalui giu' ra Bitligim, am sinusub aku ru maayo kuno matong. Ginio ra amon ru mataak mu aku, masaga' aku mongoi tuum ra pabukat-pabukat kuno.’ Ginio sabap ra io kalo siminaang ra bunsag ti, ama'.”

³⁰ Pokorongog raginio Raja' Saul siminangit kaga' ri Jonatan. Indagu Raja' no, “Tinimor ti! Raino nakapandai aku ra manaung kou ri Daut. Napakauyu' kou ra ina' muno am inan muno galama'.

³¹ Kalo kia nakapandai kou ra buoi ri Daut no maayag, kalo noyo masauk kou ra raja' ru pagun ragitio? Raino panusub no ra ulun maguyum riso am magibit riso ragiti, sabap ra musiti' io matoi!”

³² Taam i Jonatan, “Kua musiti' io matoi? Atan kia tula nano?”

³³ Paat raginio niayuk Raja' Saul no napatura' ra tutura' ra tampilon ri Jonatan koson mamatoi riso. Ginio ra nakaliman i Jonatan ra totopot ama' nano mamatoi ri Daut.

³⁴ Ra siminangit kaga' i Jonatan nangiruan ra mija' pagakanan no am kalo nangakan io ra atan pana paat ra panangarawan ru Pangiantakan ra Sila' Bagu no. Magalabo io kaga' mangkara' ri Daut ondo' inasaban noyo ru Raja' Saul, ama' nano.

³⁵ Suabon no ra iosusuab i Jonatan minongoi ra padang koson tumuum ri Daut koson ra ondo' inatang nilo noyo ruo. Nagibit io ra sangulun lalaing ungkuyon, iono ulipon nano, nabaya' riso.

³⁶ Indagu i Jonatan riso, “Pasimbul no, uyumo' anak-anak panah ondo' pinapanah kuno.” Tatanga' lalaing no nasimbul, pinapanah ri Jonatan rondo' anak panah no nansail ra lalaing no.

³⁷ Paat ra lalaing no nakasaboi ra intok naratuan ru anak panah no, golok i Jonatan riso, “Anak panah no maalur poyo ra giu' no!

³⁸ Ribaki' noyo! Pai' pangintairoi ayuk!” Inanam no anak panah no am saguli' ra tuan nano.

³⁹ Totopot io kalo nakarati' ra ragu ri Jonatan no, i Jonatan am i Daut ayuk ondo' nakarati'.

⁴⁰ Pinataak ri Jonatan kuliamos panah nano ra lalaing no am nanusub riso magibit raginio sumaguli' ra bandar.

⁴¹ Pakaugar lalaing no, miningkual i Daut intor ra tinaulian ru batu pinupug no, am samba intalu. I Daut am i Jonatan nantangi' paat ra ilo nagalok. Kangilukan ri Daut no maayo poyo intor ra kangilukan ri Jonatan.

⁴² Kopongo raginio indagu i Jonatan ri Daut, “Gama' ru i Aki Kapuuno' no mabaya' rirun. Tuhan no manutun maa' raginio ito am papag tano masalok mampaguut ra nabantuan tano ruo giu' ra saang Nano.” Kopongo raginio i Daut minugar, am i Jonatan minuli' ra bandar.