1 SAMUIL 17 - Tanou Moonsoi Timugon

Minanggal i Goliat ra ulun ru Israil

¹ Paat ra ulun ru Palistin nanimung ra saujor nilono koson jumalai mangayou, am timinimung giu' ra bandar Sokgo, giu' ra wilayah Jiuda. Nangkim ilo ra lolot ru Sokgo am Ajika, mamaar ra Ipis-Damim.

² Raja' Saul am ulun ru Israil timinimung niayuk am nangkim giu' ra Limayak Ila; timinampos ilo koson manguma' ra bulunsar ru ulun ru Palistin.

³ Timininting ulun ru Palistin giu' ra sambuluran, am ulun ru Israil timininting giu' ra sambuluran ra bokon, am tatanga' no mokoondo' ra limayak.

⁴ Sangulun ungkuyon ondo' makainggalan ri Goliat, intor ra bandar Gat, miningkual intor ra pangkiman ru Palistin koson gumula' ra ulun ru Israil. Sawat ru ulun no olo'-olo' talu ngamito.

⁵ Nambayang io ra gangsa' ra bagat no olo'-olo' 57 ngakilogram, am nantupi' ra gangsa'.

⁶ Kalayam nano sinilian ra panili intor ra gangsa' am limbawo nano pinasangut rondo' tanggulan gangsa'.

⁷ Pagung ru tutura' nano koson ra kinaayo ru tataun ra kuliamos ru mambaal ra konoon am mato ru tutura' no ra kinaagat no olo'-olo' tulu' ngakilogram. Sangulun saujor magibit ra perisai minugar ra saang nano.

⁸ Minigor i Goliat am pompogolok ra ulun ru Israil, “Atan kia tatanga' min baalon ra giu' no? Makimangayou kau kia? Aku ti ulun ru Palistin, akau ulipon ru Raja' Saul! Pilio' noyo sangulun ra akau ngai' no koson gumula' raki'.

⁹ Amon ru mamanang io am mamatoi raki', akai masauk ra ulipon min. Kaa' amon ru mamanang aku am mamatoi riso, akau masauk ra ulipon mai.

¹⁰ Raino niayuk, anggalon ku saujor ru Israil; pilio' noyo sangulun ra akau ngai' no koson gumula' raki'!”

¹¹ Pokorongog Raja' Saul am saujor nano ra anggal no, magalabo ilo am nalaa' kaga'.

I Daut giu' ra pangkiman ru Raja' Saul

¹² I Daut anak ri Isai, ulun ru Iprata intor ra Bitligim giu' ra Jiuda. I Isai mokoondo' ra balu' ngaulun anak ungkuyon am paat ra pamarintaan ru Raja' Saul, i Isai ti matutuo noyo kaga'.

¹³ Katatalu ngaulun anak ungkuyon ri Isai ondo' matuo toojo minaya' noyo ra Raja' Saul minongoi pangayou. Anak ri Isai ondo' katuaan makainggalan ri Iliab, ondo' karuo i Abinadab, am ondo' katalu i Syama.

¹⁴ I Daut ti anak pupusan ri Isai. Paat ra katatalu maayo nano minayan simpung ra Raja' Saul,

¹⁵ masalok i Daut mangiruan ra Raja' Saul, am minuli' ra Bitligim koson magalung ra domba ru ama' nano.

¹⁶ Buoi apat ngoopor ngoorou, moonong susuab ti am mamai' ti, minggaar i Goliat ra barisan ru saujor Israil am manggal risilo.

¹⁷ Paat ra sangarawan indagu i Isai ri Daut, “Ibito' mopor ngakilogram unor-unor ondo' sininggala' am mopor ruti', am atari' ngaangai' no ra maayo-maayo muno giu' ra pangkiman ru saujor no.

¹⁸ Ibito' niayuk mopor kiju ra tayar ru komandan ru pulalai. Kuati' noyo ra ati kulaan boo ra maayo-maayo muno. Ibito' noyo rorondo' koson mapainono' ra okou nakatuum noyo risilo, am ilo no naayag.

¹⁹ Soroi ilo giu' ra Limayak Ila nababaya' ra Raja' Saul am ngaangai' ulun ru Israil ra bokon, ondo' tatanga' gumula' ra ulun ru Palistin.”

²⁰ Suabon no ra iosusuab ayuk poyo, timinirong i Daut am timinampos. Nanusub io ra ulun bokon magalung ra domba. Io pana nagibit ra akanon no am minugar koson ra nanusuban ri Isai. Nakasaboi io ra pangkiman nakainamot ra ulun ru Israil tatanga' baris liliwa' mompogolok ra pulanu ru pangayawan.

²¹ Saujor ru Palistin am saujor ru Israil nantaluma' am timinampos koson mangayou.

²² Patatango' ri Daut akanon no ra ulun magalung ra kuliamos ru saujor, am pasimbul minongoi ra intok pangayawan koson mongoi uma' ra maayo-maayo nano, am nangkuot ra tanou nilo.

²³ Kaa' paat ra io magindagu risilo, ujak i Goliat am anggal ra saujor ru Israil koson ra ondo' maindalom nano baalon; norongog ri Daut ragu-ragu manggal nano.

²⁴ Pakakito saujor-saujor ru Israil ri Goliat, nagigiru' ilo ra nalaa'.

²⁵ Konilo ra rondo' am bokon, “Ilai' ga boo io! Rongogo' anggal nano! Nambantu' noyo Raja' Saul ra ulun ondo' makapamatoi ri Goliat aniin ra taak ondo' maayo. Paanduin niayuk ru Raja' no anak ruandu' nano ra ulun raginio, am sasambaloi ru ulun raginio kalo boo pana mambayar ra cukai.”

²⁶ Nangkuot i Daut ra saujor ondo' soroi ra mamaar riso, “Atan kia ondo' taakin ra ulun ondo' makapamatoi ra ulun ru Palistin no am mapalabus ra Israil intor ra pagasaban? Makakau' kaga' ulun ru Palistin no, ulun ondo' kalo makaulig ri Aki Kapuuno', manggal ra saujor ri Aki Kapuuno' ondo' naayag!”

²⁷ Nambala' ilo ri Daut ra tangguang ondo' taakin ra ulun ondo' makapamatoi ri Goliat.

²⁸ I Iliab, maayo kasaa' ri Daut, nokorongog ra pansunuran ri Daut am saujor-saujor no. Siminangit io ri Daut, am indagu, “Kua ongoi kou ragiti? Osoi ondo' sinusub muno magalung ra domba-domba muno giu' ra tana' kaagisan no? Nakapandai aku, okou ti lalaing malaat, ikakanuo' ra baani; minatong kou ragiti koson milong ayuk ra pangayawan ti, kalo kia?”

²⁹ Taam i Daut, “Atan kia sala kuno? Mangkuot aku ayuk.”

³⁰ Io pana minugar am nangkuot ra baal ra nogondo' ra saujor-saujor ra bokon no, am nogondo' ondo' pinataam riso no.

³¹ Kaa' kukula' ngaulun ondo' nokorongog ra ragu ri Daut no, nampasaboi raginio ra Raja' Saul, am nampiau Raja' Saul ri Daut ra muma'.

³² Kon ri Daut ra Raja' Saul, “Raja' mai, osoi pana pai' kalaa' ra ulun ru Palistin no. Nakatampos aku no gumula' riso.”

³³ Taam Raja' Saul, “Pai'. Ati kulaan kou makagula' riso? Okou ti mamulok ayuk poyo kaga', am io no naindalom noyo mangayou intor ra io mamulok.”

³⁴ Kaa' indagu i Daut, “Raja' kuno, aku ti maindalom magalung ra domba ru ama' kuno. Paat ra mokoondo' ra singa' kapoam baawang matong mansaam ra domba,

³⁵ ilowon ku am gabuon ku bibiag masigo no, am bayagon ku domba no. Amon ru singa' kapoam baawang no manggal, guuton ku liog nano, am lambaan ku io saboi matoi.

³⁶ Namatoi aku noyo ra singa' am baawang, am ulun ru Palistin ondo' kalo nakaulig ri Aki Kapuuno' no, niayuk nogondo' pamakuan kuno koson ra bibiag raginio, sabap ra makakau' io manggal ra saujor ri Aki Kapuuno' ondo' naayag.

³⁷ Namayag noyo Tuhan no raki' intor ra singa' am baawang; Mamayag Io niayuk raki' intor ra ulun ru Palistin no.” Indagu i Saul, “Iou noyo. Ongoi no, gama' ru Tuhan no mabaya' rirun.”

³⁸ Tinaakan ru Raja' Saul bayang mangayou nano ri Daut ra bayangon no: Rondo' tupi' gangsa' ondo' pinatupi' ra ulu ri Daut, am bayang basi'.

³⁹ I Daut pana napaabil ra ilang ru Raja' Saul no ra bayang basi' no am kuminam mugar. Kaa' kalo makaugar i Daut, sabap ra kalo maindalom io mambayang ra bayang mangayou. Indagu io ra Raja' Saul, “Kalo makaugar aku ra bayang ragitio. Kalo maindalom aku mambayang raginio.” Aluso' boo ri Daut ngaangai' bayang mangayou no.

⁴⁰ Kopongo raginio nagibit io ra jujuga' ru magalung nano, am nangalap ra limo batu ondo' tapungol intor ra sungoi, am batu no pinasuang ra ralalom ru kantungan nano. Nabaya' ra pamalastik ra kalindu' nano minongoi io tingkuang ri Goliat.

Kinala ri Daut no i Goliat

⁴¹ Kopongo raginio tumalimpuun i Goliat mugar mongoi ri Daut, siniguluan ru ulun magibit ra kinandoi mangayou nano. Rayus io mininggaar ri Daut,

⁴² kaa' paat ra io nakakito ri Daut am inimansaan no, nakakurit i Goliat ra magasab sabap ra lakat poyo kaga' mamulok i Daut am maindon.

⁴³ Indagu i Goliat ri Daut, “Atan pakuan ra jujuga' no? Mangkara' kou kia ra aku ti uku'?” Nagulas i Goliat ri Daut ralalom inggalan ru dewa-dewa nano.

⁴⁴ Indagu io poyo koson manggal ri Daut, “Ibok, pataakin ku inan muno ra susuit kapoam bibiag maa' raginio akanon!”

⁴⁵ Kon ri Daut, “Okou matong manggal raki' ra ilang, tutura' am tanggulan. Kaa' aku matong manggal rirun ralalom inggalan ru Tuhan Ondo' Maayo Kaga' Kuasa', i Aki Kapuuno' ru saujor Israil ondo' inasaban muno.

⁴⁶ Orou raiti' niayuk Tuhan no mapataak rirun ra ralalom ru kalindu' kutu. Kalaan tokou am manginggulu' ra ulu muno. Pataakin ku inan ru saujor Palistin ra susuit am bibiag maa' raginio akanon. Kon raginio noyo ra titikop ru tana' ti makapandai ra akai, bansa' ru Israil ti mokoondo' ri Aki Kapuuno'.

⁴⁷ Ngaangai' ulun ragiti makakito ra Tuhan no kalo manangilang kapoam manantutura' koson mamayag ra ulun Nano. Magail io mamanang ralalom ru pangayawan, am pataakin No akau ngaangai' no ra ralalom ru kalindu' mai.”

⁴⁸ Tumalimpuun i Goliat mugar minggaar ri Daut, am pasimbul i Daut ra mataki' mongoi ra tampilon ra barisan ru ulun ru Palistin koson manggal riso.

⁴⁹ Pinokokog ri Daut kalindu' nano ra ralalom ru kantungan nano, am nangalap ra rondo' batu am pinalastik batu no ra tampilon ri Goliat. Nakatiu' batu no ra rabas ri Goliat saboi kuapak nano nopopol. Paat raginio niayuk naaba' i Goliat am bulos no nakatukop ra tana'.

⁵⁰ Kon raginio noyo ra kalo nanangilang, kinala ri Daut no i Goliat am namatoi riso ra pamalastik am batu.

⁵¹ Nasimbul i Daut minongoi ri Goliat am bigor ra sapapa' ru inan nano. Binutus no ilang ri Goliat intor ra angkap no am inggului' ulu ri Goliat; koson raginio noyo i Daut namatoi ri Goliat. Paat ra ulun ru Palistin nakakito ra ulun maikang nilono minatoi noyo, nagigiru' ilo.

⁵² Gogolos ulun ru Israil am ulun ru Jiuda, am nangilou risilo saboi ra Gat am kulobon garabang ru Ikron. Ulun ru Palistin ondo' nangapilat rumumpalangan ra galur ru ralan mongoi ra Saaraim, saboi ra Gat am Ikron.

⁵³ Pakasaguli' intor ra nangilou ra ulun ru Palistin, ulun ru Israil nanalingaau ra pangkiman ru ulun ru Palistin.

⁵⁴ Inalap ri Daut ulu ri Goliat am inibit no ra Jirusalim, kaa' binulian no kinandoi ri Goliat giu' ra kim nano.

Pinaulig i Daut no ra Raja' Saul

⁵⁵ Pakakito Raja' Saul ri Daut giminula' ri Goliat, nangkuot io ri Abnir, panglima saujor nano, “Abnir, osoi ra anak kia buayoi raginio?” Taam i Abnir, “Raja' kuno, kalo nakapandai aku.”

⁵⁶ Susuban ru Raja' Saul, “Ongoyo' imumuyi' baal raginio.”

⁵⁷ Ginio ra paat ri Daut siminaguli' ra pangkiman nalupus namatoi ri Goliat, inibit io ri Abnir minuma' ra Raja' Saul. Lakat poyo i Daut nananggal ra ulu ri Goliat.

⁵⁸ Nangkuot Raja' Saul no riso, “Okou buayoi, osoi kia ra anak okou ti?” Taam i Daut, “Aku ti anak ri Isai, intor ra Bitligim.”