1 SAMUIL 16 - Tanou Moonsoi Timugon

I Daut pinili' nasauk ra raja'

¹ Tuhan pana mindagu boo ri Samuil, “Kula' poyo buoi ra okou mangiluk guang sabap ri Saul? Inimpayan Ku noyo io koson raja' ru Israil. Raino, ibito' noyo umau jaitun am ongoi no ra Bitligim, ongoi ra sangulun ondo' makainggalan ri Isai, sabap ra nampili' Aku noyo ra sangulun intor ra anak nano koson masauk ra raja'.”

² Nangkuot i Samuil, “Ati kulaan nua' aku mambaal raginio? Amon ru nokorongog Raja' Saul ra baal ragitio, maaru' mamatoi io raki'!” Taam Tuhan, “Ibito' sanginan anak sapi' gawayan am indagu riso ra okou mongoi ra giu' no koson mapataak ra taak simbalui ra Tuhan.

³ Piawo' i Isai mongoi ra upacara mapataak ra taak simbalui no. Balain Tokou ra atan ondo' musiti' baalon muno. Ulun ondo' tuluon Kuno rirun musiti' pilion mu masauk ra raja'.”

⁴ Binaal ri Samuil atan ondo' rinagu ru Tuhan no riso. Minongoi io ra Bitligim am tingganai ru bandar no minatong uma' riso ra nonontol ra malaa'. Nangkuot ilo, “Ratangan mutu magibit kia ra kaansayan?”

⁵ Taam i Samuil, “Iou. Aku minatong ti koson mapataak ra taak simbalui ra Tuhan. Impasawi' min inan mino am baya' kau raki'.” Nanusub io niayuk ri Isai am anak-anak nano mangimpasau ra inan, am nampiau risilo mongoi ra upacara mapataak ra taak simbalui no.

⁶ Pakatimung ilo noyo, nakito ri Samuil no i Iliab, anak ri Isai no. Nangkara' io, “Ulun ondo' minigor ra saang ru Tuhan ti maaru' ulun pinili' Nano.”

⁷ Kaa' indagu Tuhan ri Samuil, “Pai' ilai' sawat ru inan nano kapoam kinaindon ru bulos nano; sala' ka io pinili' Kuno. Kalo magilong Aku ra ulun koson ra ulun magilong. Ulun magilong ra bulos kaa' Aku magilong ra guang.”

⁸ Kopongo raginio nampiau i Isai ra anak nano i Abinadab, am nanusub riso muma' ri Samuil. Kaa' kon ri Samuil, “Io niayuk kalo pinili' ru Tuhan.”

⁹ Kopongo raginio nanusub i Isai ri Syama mongoi uma'. Kon ri Samuil, “Io niayuk kalo pinili' ru Tuhan.”

¹⁰ Kon raginio noyo i Isai nanusub ra tulu' ngaulun anak nano minuma' ri Samuil. Kaa' kon ri Samuil, “Kolondo' sangulun pana risilo no pinili' ru Tuhan.”

¹¹ I Samuil pana nangkuot boo ri Isai, “Ginilo ayuk kia anak ungkuyon muno?” Taam i Isai, “Lakat poyo mokoondo' sangulun poyo, ondo' pupusan, kaa' tatanga' io magalung ra domba.” Kon ri Samuil, “Panusub ra ulun mongoi pampiau riso, sabap ra kalo mababaya' takau mangakan ra io kalo poyo makaratong.”

¹² Ginio ra nanusub i Isai ra ulun minongoi pampiau ra anak pupusan nano. Io ti sangulun buayoi ondo' maindon, maligag am mato nano makasinda. Indagu Tuhan ri Samuil, “Gitio noyo ulun no. Pilio' noyo io!”

¹³ Nangalap i Samuil ra umau jaitun, am nampili' ri Daut no am nangumau ra ulu ri Daut no ra umau giu' ra saang ru ngaangai' maayo ri Daut. Paat raginio niayuk Ambiluo ru Tuhan nanguasa' ri Daut am nabaya' riso intor ra orou raginio. Kopongo raginio minuli' i Samuil giu' ra Rama.

I Daut giu' ra istana ru Raja' Saul

¹⁴ Ambiluo ru Tuhan no nangiruan ra Raja' Saul, am inimbolo' io ru ambiluo malaat ondo' sinusub ru Tuhan.

¹⁵ Indagu boo ulipon-ulipon ru Raja' Saul no riso, “Napandayan mai ra ambiluo malaat ondo' sinusub ru Tuhan no nangimbolo' rirun.

¹⁶ Amon ru mangiou kou, nakatampos akai no maguyum ra sangulun ondo' mapandai mangkuli ra jitor. Paat ra okou imboloon ru ambiluo malaat no, ulun no makapangkuli ra jitor nano am okou makaliman ra moonsoi poyo.”

¹⁷ Ginio ra nanusub Raja' Saul, “Paguyum kau ra sangulun ondo' mapandai mangkuli ra miujik, am ibito' min io ragiti.”

¹⁸ Nokorongog ra baal raginio indagu sangulun intor ra ulipon ru raja' no, “I Isai, ulun ru Bitligim no mokoondo' sangulun anak ungkuyon ondo' mapandai mangkuli ra miujik. Io niayuk sangulun ondo' baani am saujor ondo' moonsoi. Io ti poyo maindon am mapandai mindagu. Tuhan no mabaya' riso.”

¹⁹ Raja' Saul pana nanusub boo ra ulun mongoi ri Isai nabaya' ra bilin, “Susubo' noyo anak muno i Daut, ondo' magalung ra domba no paumaan raki'.”

²⁰ I Isai pana nanampos boo ra sanginan kaladai, sinakayan ra ruti' am kantungan kungkung ondo' nototop ra wain; nanampos io niayuk ra sanginan kambing. Ngaangai' no tinaakan no ri Daut koson pataakon ra Raja' Saul.

²¹ Kon raginio noyo i Daut minatong ra Raja' Saul am nangandoi riso. Naansayan kaga' Raja' Saul ri Daut, am nampili' riso nasauk ra magibit ra kinandoi mangayou nano.

²² Raja' Saul pana nangator boo ri Isai ra tanou, “Maansayan aku ri Daut. Iowo' noyo io magulayun ayan ragiti am mangandoi raki'.”

²³ Intor raginio, moonong ra Raja' Saul no subolon ru ambiluo malaat, kulion ri Daut jitor nano. Ambiluo malaat no pana mangiruan boo ra Raja' Saul, am Raja' Saul no pana matagulian am moonsoi saguli'.