1 SAMUIL 12 - Tanou Moonsoi Timugon

Ragu pantutuliaran ri Samuil

¹ Kopongo raginio indagu i Samuil ra ngaangai' ulun ru Israil, “Sinugut ku noyo ngaangai' kinitaak mino. Nampili' aku noyo ra sangulun raja' koson mamarinta ramuyun.

² Intor raino io noyo ondo' maningganai ramuyun. Ilai' noyo, aku ti matutuo noyo am makauan; anak-anak kuno soroi mababaya' ramuyun. Naningganai aku ramuyun ra nabuoi kaga' – intor ra aku mamulok saboi raino.

³ Raino ti, migor aku ra saang min. Amon ru nambaal aku noyo ra kasalaan, panguu' kano raki' ra saang ru Tuhan am raja' ondo' pinili' Nano. Igondo' aku kia nampagaau ra sapi' kapoam kaladai ru ulun ra bokon? Igondo' aku kia namparuung kapoam nangimbolo' ra ulun bokon? Igondo' aku kia nangapu ra rasua intor ra ulun? Raguo' ayuk, maa' raginio atan ayuk ondo' inalap kuli pasagulion ku.”

⁴ Taam ngaangai' ulun no, “Kalo, kalo igondo' kou pamparuung kapoam pangimbolo' ramon. Kalo igondo' kou pangalap ra atan pana longgom ru ulun.”

⁵ Ginio ra indagu i Samuil, “Polosoon noyo Tuhan am raja' ondo' pinili' Nano masauk ra sasi' ra orou raiti' ra koon min ra kolondo' ra sanganu pana sala kuno.” Taam ilo, “Iou motopot. Tuhan no nasauk ra sasi' takau.”

⁶ Rinayus poyo ri Samuil, “Nampili' noyo Tuhan ri Musa am i Arun. Io niayuk nagibit noyo ra kinamatuaan mini miningkual intor ra Misir.

⁷ Raino, pai' kapo ugar. Manguu' aku ramuyun ra saang ru Tuhan am mapakara' ramuyun ra ngaangai' ru binaal maayo ru Tuhan koson mamayag ramuyun am kinamatuaan mini.

⁸ Paat ri Jakub am sasambaloi nano minongoi ra Misir, am paat ra ulun ru Misir nangimbolo' risilo, kinamatuaan nilai nampiau nakiindangan ra Tuhan. Ginio ra nanusub Tuhan ri Musa am i Arun koson naningganai risilo miningkual intor ra Misir, am niayuk nangindangan risilo liminayun ra pagun ragitio.

⁹ Kaa' kalupus raginio linilianan nilo Tuhan, i Aki Kapuuno' nilono. Ginio sabap ra nopoloso Tuhan ra ulun ru Palistin, raja' ru pagun Moab, am i Sisira, iono panglima saujor ru bandar Gajor, namulunsar ra kinamatuaan mini am nangala risilo.

¹⁰ Kopongo raginio nampiau ilo nakiindangan ra Tuhan, am indagu, ‘Makatula akai noyo sabap ra tinalikuran mai Okou, iou Tuhan, am siminamba ra sinungkalalaing Dewa Baal am Asyitorit. Raino ti, pamayag no ramon intor ra pantula', am akai mangandoi ayuk boo Rirun!’

¹¹ Kopongo raginio nanusub Tuhan ri Gidion, am i Barak boo, am i Jipta boo am pupus toojo aku. Akai sigagama' napalabus noyo ramuyun intor ra pantula', saboi kaayagan min namimio.

¹² Kaa' paat ra akau nakapandai ra Raja' Nagas intor ra Amon no masaga' mamulunsar ramuyun, inimpayan min Tuhan koson ra raja' min. Minindagu kau raki', ‘Masaga' akai ra sangulun raja' koson mamarinta ramon.’

¹³ “Raino ti, mokoondo' kau ra sangulun raja' pinili' min galama'. Nakitaak kau ra sangulun raja', am nanaak noyo Tuhan no ramuyun ra raja'.

¹⁴ Pakaansuk kano amon ru mangurumat kau ra Tuhan, mangandoi ayuk Riso, am rumongog am niayuk gumagaya' ra susuban Nano, am amon ru akau am niayuk raja' mino gumagaya' toojo ra Tuhan i Aki Kapuuno' mino.

¹⁵ Kaa' amon ru kalo rumongog kau ra Tuhan, kaa' manggal ra susuban nano, maaru' akau am raja' mino anggalon ru Tuhan.

¹⁶ Raino ti, rongogo' kano toojo! Ilai' min toojo baal maayo ondo' baalon ru Tuhan ra talupak ru mato mino.

¹⁷ Raino sala' ka kia bulintok ru tampio? Kaa' makiasi' aku, am patuunon ru Tuhan no tingkalur am rasam koson ra taaman ru pakiasian kuno. Paat ra baal raginio masauk makaliman kau boo ra mapara' gayo ru tula mino ra Tuhan sabap nakitaak ra sangulun raja'.”

¹⁸ Kopongo raginio pakiasi' i Samuil, am paat ra orou raginio niayuk napatuun Tuhan ra tingkalur am rasam. Ginio ra moonong ulun no nalaa' ra Tuhan am i Samuil.

¹⁹ Indagu ilo ri Samuil, “Anii pangindangan tuan, pakiasi' no ra Tuhan i Aki Kapuuno' muno ra tayar mai, maa' raginio kalo matoi akai. Raino nakaliman akai ra suai ra tula mai ondo' masuang, makatula akai poyo paat ra akai nakitaak ra sangulun raja'.”

²⁰ Taam i Samuil, “Pai' kau kalaa'! Kabalu' pana ra nambaal kano ra baal ondo' malaat, pai' talikuri' Tuhan. Pangandoi kano ayuk toojo Riso ra sototopot ru guang mino.

²¹ Pai' baya' ra dewa-dewa ondo' kalo makapangindangan kapoam makapamayag ramuyun, sabap ra dewa-dewa no sotopot no kolondo'.

²² Nagibot noyo Tuhan ra kalo mangiruan Io ramuyun, sabap ra namatas Io noyo ra masauk kau ra ulun Nano galama'.

²³ Ra aku ti, makatula aku ra Tuhan amon ru kalo makiasi' aku ra tayar mino; gama' ru painggaluron ru Tuhan tula no intor raki'. Kaa' marayus aku mangila' ramuyun ra baal ondo' mongoonsoi am ondo' mongotopot.

²⁴ Gagaya' kano ra Tuhan am pangandoi ayuk toojo Riso am ra sototopot ru guang mino. Karaa' noyo baal maayo ondo' binaal Nano ramuyun.

²⁵ Kaa' amon ru mararayus kau makatula, akau am raja' mino pusoon.”