1 SAMUIL 11 - Tanou Moonsoi Timugon

Kinala ru Raja' Saul no ulun ru Amon

¹ Kopongo raginio Raja' Nagas, raja' ru pagun Amon, naningganai ra saujor nano am nagawang ra bandar Jabis giu' ra tampilon ru Giliad. Mamagun ru Jabis nampasaboi ra inatang no ra Raja' Nagas, “Pakimabantu' noyo ramon, am apuon mai okou raja' koson ra mamarinta ramon.”

² Indagu Raja' Nagas, “Mambaal aku ra nabantuan ramuyun ra rondo' kitaakon: Kiulon ku unor ru mato ra pamiris ru moonong ulun ondo' nanauyu' ra ngaangai' ru ulun ru Israil.”

³ Kopongo raginio indagu tingganai-tingganai ru bandar Jabis, “Anii' akai buoi tulu' ngoorou koson mangator ra tanou ra titikop ru pagun Israil. Amon ru kolondo' makapangindangan ramon, am akai ngaangai' makirakop rirun.”

⁴ Ulun-ulun sinusub no nakasaboi giu' ra Gibia, intok inayanan ru Raja' Saul. Paat ra tanou no pinasaboi, ngaangai' mamagun ra giu' no tumalimpuun mantangi' sabap ra nangkaus.

⁵ Paat raginio kakauli' ayuk ru Raja' Saul intor ra umo nabaya' ra sapi'-sapi' nano. Kuati' no, “Atan kinua'? Kua pantangi' ngaangai' ru ulun?” Nalingas io binalaan ra tanou ondo' inibit ru ulun-ulun sinusub intor ra Jabis.

⁶ Paat ra Raja' Saul nakaining ra tanou no, kinuasa' io ru Ambiluo ri Aki Kapuuno', am sangit io boo.

⁷ Nangalap Raja' Saul ra ruo ngainan sapi' am tinata'-tata' no nasauk ra masuang tata'. Kopongo raginio nanusub io ra kukula' ngaulun nagibit ra tata'-tata' ru sapi' no ra titikop ru pagun ru Israil nabaya' ra susuban, “Osoi ayuk kalo maya' ra Raja' Saul am i Samuil mongoi pangayou, sapi' nano tataan koson ragitio!” Nalaa' ulun ru Israil ra atan lair ondo' baalon ru Tuhan, am ngaangai' ru ulun, kalo ra sangulun pana nakasuai, minongoi baya' ra mangayou.

⁸ Nanimung Raja' Saul risilo giu' ra Bijik: 300,000 ngaulun intor ra Israil am 30,000 ngaulun intor ra Jiuda.

⁹ Indagu ilo ra ulun-ulun sinusub intor ra Jabis no, “Balai' noyo mamagun ru Jabis ra susuab no, ra kalo poyo tanga' ru orou, makaalap ilo ra indangan.” Paat ra mamagun ru Jabis nokorongog ra tanou raginio, naansukan ilo kaga'

¹⁰ am indagu boo Raja' Nagas, “Susuab no akai ngaangai' makirakop am guguang mu mambaal ra atan ayuk pamakuan muno ramon.”

¹¹ Suabon no riminondom Raja' Saul nantatayar ra ulun-ulun nano nasauk ra talu ngampulalai. Kopongo raginio, paat ra matatawang, minongoi ilo ra tatanga' ru nangkiman ru ulun ru Amon am namulunsar risilo. Kalo poyo ra tanga' ru orou, kinala noyo pantula' ru saujor-saujor ru Raja' Saul. Ulun ru Amon ondo' kalo minatoi, nantabulias am saboi kolondo' ruo ngaulun ondo' nabaya' ra nagiru'.

¹² Kopongo raginio indagu ulun ru Israil ri Samuil, “Ati kinua' ulun ondo' ragili makakau' mindagu ra Raja' Saul kalo maaya' masauk ra raja' takau? Pataako' ilo ramon. Potoyon mai ilo!”

¹³ Kaa' indagu Raja' Saul, “Kolondo' sangulun pana potoyon ra orou raiti', sabap paat ra orou raiti' namayag Tuhan ra ulun ru Israil.”

¹⁴ Indagu i Samuil risilo, “Ibok ongoi takau ra Gilgal am igondo' poyo mapasauk ra Raja' Saul koson raja' takau.”

¹⁵ Ginio ra ilo ngaangai' minongoi ra Gilgal, am giu' no, giu' ra intok sambayangan no sinauk nilo Raja' Saul ra raja'. Napataak ilo ra taak simbalui koson makibarakat ra Tuhan am Raja' Saul am ngaangai' ulun ru Israil nangiantak ra kasaukan raginio.