1 SAMUIL 10 - Tanou Moonsoi Timugon

¹ Kopongo raginio nangalap i Samuil ra sambutul umau jaitun, am pabuuro' umau no ra rasawat ru ulu ri Saul. Inalok no i Saul am indagu, “Pinili' kou ru Tuhan masauk ra raja' ru Israil, ulun Nano. Mamarinta kou ra ulun Nano am mangampin risilo intor ra ngaangai' pantula'. Gitio noyo inono' no ra pinili' kou noyo ru Tuhan masauk ra raja' ru ulun Nano:

² Mopongo kou mangiruan raki' ra orou raiti', makauma' kou ra ruo ngaulun ungkuyon mamaar ra lobong ri Ragil giu' ra Jilja, giu' ra wilayah Binjamin. Mindagu ilo rirun koson ragitio, ‘Kaladai-kaladai ondo' inuyum muli natuum noyo. Raino ama' muli kalo boo maimamang ra kaladai-kaladai no, kaa' ruruli' mangkuot ra atan ondo' moonsoi baalon nano koson makatuum rirun.’ ”

³ Indagu poyo i Samuil, “Intor ra giu' no, rayuso' noyo pangkiralanan muno saboi kou makasuku' ra puun tataun ru intok sambayangan giu' ra Tabor. Giu' no makatuum kou ra talu ngaulun ungkuyon ondo' tatanga' mongoi ra Bitil koson mapataak ra taak simbalui ri Aki Kapuuno'. Sangulun intor risilo no manguyung ra talu ngainan anak kambing, sangulun poyo magibit ra talu ruti', am sangulun poyo magibit ra kantungan kungkung ondo' napanu' ra wain.

⁴ Tumabi' ilo rirun am mangani' ilo ra ruo ruti' ondo' musiti' apuon mu.

⁵ Mopongo raginio ongoi ra bulur ri Aki Kapuuno' giu' ra Gibia. Giu' no mokoondo' ra pangkiman ru ulun ru Palistin. Giu' ra kulobon mumpos ra bandar, makatuum kou ra sampulalai nabi ondo' mambusul intor ra bulur, intok ru altar no. Mangkuli ilo ra gambus, rabana, suling am jitor. Saliligo' am sogogolok ilo.

⁶ Paat raginio niayuk kuasaan kou ru Ambiluo ru Tuhan, am aniin kou ra paliso bagu, am maya' kou risilo saliligo am sogogolok.

⁷ Paat ra masauk baal raginio, baalo' atan ayuk limanin muno ra moonsoi, sabap ra i Aki Kapuuno' mabaya' rirun.

⁸ Mopongo raginio musiti' kou mongoi ra Gilgal ra makapagulu intor raki', am paginaa ra giu' no buoi tulu' ngoorou. Mopongo raginio matong aku koson mapataak ra taak simbalui koson mapabansuk ra guang ru Tuhan, am taak simbalui koson makibarakat ra Tuhan, am niayuk mambala' rirun ra atan ondo' musiti' baalon muno.”

⁹ Kairuani' ayuk ri Samuil no i Saul, nangani' i Aki Kapuuno' no ri Saul ra paliso ondo' bagu. Ngaangai' baal ondo' pinabala' ri Samuil riso no nasauk ra orou raginio niayuk.

¹⁰ Paat ri Saul am ulipon nano nakasaboi giu' ra Gibia, tinuum i Saul ru sampulalai nabi. Paat raginio niayuk Ambiluo ri Aki Kapuuno' no nanguasa' ri Saul, am minaya' io ra nabi-nabi no saliligo' am sogogolok.

¹¹ Ulun ondo' nakaulig ri Saul intor ragili, nakakito ra paliso nano am sakukuot ra rondo' am bokon, “Atan kinua' nasauk ra anak ri Kis no? Inda' nua' ru i Saul niayuk nasauk ra sangulun nabi?”

¹² Kopongo raginio pangkuot sangulun ondo' minayan ra giu' no, “Ati kulaan ra nabi-nabi ra bokon no – guang min osoi kia ama' nilono?” Ginio noyo puun ru pagabigan ragitio, “Inda' nua' ru i Saul niayuk nasauk ra sangulun nabi?”

¹³ Kopongo i Saul liligo' am gogolok, ongoi io ra altar giu' ra rasawat ru bulur.

¹⁴ Kamaman ri Saul no nakakito ri Saul am ulipon nano, am kuati' no ilo, “Ati intor min ti?” Taam i Saul, “Minongoi akai paguyum ra kaladai ondo' natatak, kaa' kalo natuum mai, ongoi akai tuum ri Samuil.”

¹⁵ Nangkuot kamaman nano, “Atan rinagu ri Samuil?”

¹⁶ Taam i Saul, “Kono, kaladai-kaladai no natuum noyo.” Kaa' kalo nambala' i Saul ra kamaman nano ra i Samuil no napasauk noyo ri Saul ra raja'.

Pinili' i Saul nasauk ra raja'

¹⁷ Kopongo raginio piniau ri Samuil ngaangai' ulun ru Israil tumimung ra saang ru Tuhan giu' ra Mijpa.

¹⁸ Indagu io risilo, “Kon ragitio noyo ragu ru Tuhan, i Aki Kapuuno' ru Israil, ‘Nagibit Aku noyo ramuyun miningkual intor ra Misir am napalabus ramuyun intor ra bansa' raginio am bansa'-bansa' ra bokon ondo' nangimbolo' ramuyun.

¹⁹ Aku noyo i Aki Kapuuno' min ondo' napalabus ramuyun intor ra ngaangai' kaimbalaan am kapaganan. Kaa' raino nangimpai kau Raki', i Aki Kapuuno' min, sabap ra nakipili' kau Raki' ra sangulun raja' min. Iou noyo, timung kano ra saang Kutu, Tuhan min, lumili' maya' ra bansa' mino.’ ”

²⁰ Kopongo raginio nanusub i Samuil ra moonong bansa' no jumalai ra saang, am bansa' ri Binjamin ondo' napili'.

²¹ Nanusub i Samuil ra ngaangai' sasambaloi ri Binjamin jumalai, am sasambaloi ri Matri ondo' napili'. Paat ra ulun ru sasambaloi ri Matri muma' ra mansusunu' sangulun am sangulun, i Saul anak ri Kis ondo' napili'. Naguyum ilo ri Saul kaa' kalio io ra giu' no.

²² Ginio ra kuati' nilo Tuhan, “Iou Tuhan, soroi kinua' ulun no ragiti?” Taam Tuhan, “Nansibuni i Saul giu' ra talikuron ru kuliamos-kuliamos.”

²³ Ginio ra nasisimbul ilo am nagibit ri Saul giu' ra tatanga' ru mamagun. Pakabigor i Saul ra tatanga' ru mamagun, nakito nilo ra io noyo ondo' malanggou kaga'; ulun ra bokon polos ayuk ra limbawo nano.

²⁴ Indagu boo i Samuil ra mamagun, “Gitio noyo ulun ondo' pinili' ru Tuhan. Kolondo' sangulun pana ritakau ti ondo' nogondo' riso ti.” Ngaangai' nompoloos ra, “Kaayag no raja' mai!”

²⁵ Kopongo raginio nambala' i Samuil intor ra katapatan am kandoi ru raja', am tulisi' no ra rondo' buuk. Binulian no buuk no ra rondo' intok ondo' mapasau. Kopongo raginio sinusub ri Samuil ulun-ulun no minuli' ra baloi ru sigagama'.

²⁶ Raja' Saul niayuk minuli' ra baloi nano giu' ra Gibia, binaya' ru kukula' ngaulun ondo' mangapanggol. Guang nilo inunsu' noyo ru Tuhan koson mamaya' ra Raja' Saul.

²⁷ Kaa' mokoondo' kukula' ngaulun malaat ondo' mindagu ra, “Ati kulaan ru ulun ragitio mokoonong ritakau?” Nagasab ilo ra Raja' Saul am kalo nanaak riso ra tangguang, kaa' talingoon bauwi ru Raja' Saul.