1 PITRUS 2 - Tanou Moonsoi Timugon

I Jisus Kristus noyo batu naayag

¹ Ginio nai patiri' min noyo ngaangai' kalaatan ru guang min; pai' kano pamparuung, pai' pagabau, pai' kaingot am pai' pagasab ra ulun bokon.

² Mogondo' ra sangulun lalagang ondo' kakaanak ra masalok maguyum ayuk ra gatas, akau pana musiti' masalok maguyum ayuk ondo' mampaikang ra pangintapatan min. Maa' raginio mapiot pangintapatan min am bayagon kau.

³ Sabap ra tinulisan noyo ra Buuk Kitab, “Nakaliman kano ra mumpara' boo kinoonsoi guang ru Tuhan.”

⁴ Intor poyo raginio, ibok am ratong kano ra Tuhan. Io ti mogondo' ra batu naayag, ondo' pinatiran noyo ru ulun ra kolondo' onong; kaa' Io no ondo' pinili' ri Aki Kapuuno' ra mokologo toojo.

⁵ Akau pana mogondo' ra batu naayag. Ginio ra polosoo' noyo kaayagan min alapon ru Ambiluo ri Aki Kapuuno' mambaal ra Baloi Tuhan. Bagu masauk kau koson ra imam Nano ondo' mapasau, am sabap ri Jisus Kristus makapangani' kau ri Aki Kapuuno' ra taak ondo' iowon Nano, maya' ra indangan ru Ambiluo Nano.

⁶ Sabap tinulisan noyo ra Buuk Kitab kon ragino, “Ilai', pinabanta' Ku noyo giu' ra bandar Sion rondo' batu ra mokologo, ondo' pinili' Ku ra batu maatang: am kalo noyo igondo' Io pangkinibit ra pangkausan ra ulun ondo' mangintopot Riso.”

⁷ Koson ra akau ondo' mangintopot, batu ti mokologo toojo. Kaa' koson ra ulun ondo' kalo mangintopot: “Batu ra kolondo' onong ru ulun mananambaloi, io boo nasauk ra batu ondo' maatang kaga'.”

⁸ Tinulisan poyo ra Buuk Kitab, “Gitio noyo batu kasaruan ru ulun, batu kalauban nilo.” Koson ilo ra ulun makasaru ra batu, sabap ra kalo gumagaya' ilo ra bala' ri Aki Kapuuno'. Ginio noyo ondo' inaru' ri Aki Kapuuno' no risilo.

⁹ Kaa' akau ti noyo bansa' ondo' pinili' ri Aki Kapuuno', imam ru Raja', bansa' inaru' mangandoi Riso, ulun Nano. Pinili' kau ri Aki Kapuuno' am piniau kau intor ra kalandaman sumubol ra sinda Nano ondo' makaimuag, koson mampatanou kau ra baalon Nano ondo' makaimuag.

¹⁰ Ragili, akau sala' ka ulun ri Aki Kapuuno', kaa' raino siminauk kano boo ra ulun Nano. Am poyo ragili, pai' ru nakaulig kau ra asi' Nano, kaa' raino ti inasian kau boo.

Pakapaliso kano koson ra ulipon ri Aki Kapuuno'

¹¹ Pabukat ondo' tagamin ku, akau koson ra ulun bansa' ru bokon ondo' kolondo' karandanan ra tana' ti, maa' raginio kitaakon ku ramuyun, inggaluri' min noyo kinibit malaat, ondo' masalok gumula' ra kasagaan min gumagaya' ri Aki Kapuuno'.

¹² Kaayag kano ra moonsoi ra sasanggilan akau lumatok ra ulun ondo' kalo nakaulig ra Tuhan. Maa' raginio, paat ra ilo manguu' ramuyun ra akau ti ulun malaat, makamakito ilo ra sotopot no moonsoi ayuk baalon min i, suku' mokopongompor ilo ri Aki Kapuuno' paat ra orou pangukuman Nano ondo' matong.

¹³ Sabap ra mangintopot kano ra Tuhan, gagaya' kano ra osoi ayuk ondo' maningganai ramuyun; ioginio Kaisar ondo' tingganai maayo kaga',

¹⁴ kapoam gabenor-gabenor ondo' sinusub mangukum ra ulun ondo' mambaal ra malaat am niayuk mangurumat ra ulun ondo' mambaal ra moonsoi.

¹⁵ Sabap ra kasagaan ri Aki Kapuuno' noyo ginio, ra mambaal kau ayuk ra moonsoi, koson mopolonggo' kau ra panguwan ru ulun bungas ondo' kolondo' onong no.

¹⁶ Kaayag kano koson ra ulun ondo' kalo boo uliponon ru tula, kaa' pai' polosoo' pampalabusan min ti mapasibuni ra tula min, kaa' pakapaliso kano koson ra ulipon ri Aki Kapuuno'.

¹⁷ Urumato' noyo ngaangai' ulun am tagami' noyo pabukat mino ra Kristian. Kalaa' kano ri Aki Kapuuno' am urumato' noyo i Kaisar.

Kaimbalaan ri Kristus rondo' tiluan moonsoi

¹⁸ Ulipon kau ngai'; Gagaya' kano ra susuban ru tuan mino, sala' ka ilo ayuk ondo' molomoi am moonsoi guang, kaa' ilo ondo' malaat no pana.

¹⁹ Amon ru pantataan ayuk guang min ra akau ilaaton ru ulun ra kolondo' sasaban, sabap ra makatutun kau ra kasagaan ri Aki Kapuuno', barakaton No akau.

²⁰ Atan noyo maalap koompor amon ru mataan guang mino ra akau ukumin sabap ra makasala kau tupo? Kaa' amon ru pantataan guang min ra akau imboloon sabap ra binaal min ra moonsoi, barakaton kau ri Aki Kapuuno'.

²¹ Nampiau i Aki Kapuuno' ramuyun pantataan ra akau imboloon sabap ra mambaal ra moonsoi. I Kristus galama' inimbolo' ra bala min, am raginio nakapangani' Io ramuyun ra tiluan ondo' moonsoi suguton min.

²² Kalo noyo igondo' Io makatula am kolondo' sangulun pana nakaili' nokorongog ra magabau Io.

²³ Paat ra Io inasaban, kalo niayuk nambalos Io pagasab. Paat ra Io sinindualan, kalo noyo nompololob Io risilo. Kaa' liminansan Io ayuk ri Aki Kapuuno', Akim ondo' mabanis guang no.

²⁴ I Kristus galama' nansaan ra tula takau giu' ra salip. Ginio nai ra nakalabus takau intor ra kuasa' ru tula am maayag takau sumugut ra kasagaan ri Aki Kapuuno'. Pilat ri Kristus ti noyo ondo' namabas ramuyun.

²⁵ Ragili, koson kau ra domba ondo' timinanggau, kaa' raino inibit kano sumaguli' koson maya' kau ra Magagalung am Mangngampin min.