1 KORINTUS 9 - Tanou Moonsoi Timugon

Kuasa' am kandoi ru rasul

¹ Kalo boo uliponon aku ru kaulayan ru Jaudi. Aku ti sangulun rasul. Nakakito aku no toojo ri Jisus, Tuhan takau am akau no ampos ru kandoi kuli.

² Kabalu' pana ra mokoondo' lair ulun ra bokon ondo' kalo mangiou ra aku ti sangulun rasul, kaa' maaru' akau mangiou! Sabap ra kaayagan min koson ra ulun Kristian no rondo' tatandu' noyo ra aku ti sangulun rasul.

³ Insan ru mononsol lair ulun raki', gitio pataamon kutu:

⁴ Kua? Makaapu aku ra akanon am inumon sabap ra kandoi kutu.

⁵ Makakuasa' aku mapaaya' ra andu' Kristian ra aku mugar-ugar, tumilu ra rasul-rasul ra bokon no, pabukat ru Tuhan Jisus am i Simon Pitrus.

⁶ Kapoam akai ruo ri Barnabas ayuk kia musiti' maguyum ra kaukapan ru akanon mai galama'?

⁷ Kolondo' saujor maguyum ra balanja' nano galama' paat ra io makaaya' ra pangayawan. Kapoam kolondo' ulun magitanom kalo mangakan ra kawa' ru anggur intor ra umo nano galama'. Kapoam kolondo' magagalung ondo' kalo manginum ra gatas intor ra domba nano galama'.

⁸ Ngaangai' abig ra sinabit ku ra raitii' ni intor ra ragu ru ulun, kaa' mokoondo' niayuk tinulisan ra Ukum ri Musa.

⁹ Koson ragitio ragu no, ‘Pai' bongkoso' kabang ru sapi' ondo' mangagik ra gandum.’ Sapi' no kia ondo' karaan ri Aki Kapuuno'?

¹⁰ Kapoam itakau nua' koson ru ginio? Motopot, itakau noyo kinaatang ru tinulisan ti. Ginio ra ulun ondo' mantanom am mangkumos no mangandoi sabap ra malansan makaapu io ra tayar intor ra ampos ru kandoi nano.

¹¹ Akai no ondo' napatias ramuyun ra sampug, ioginio nampasaboi ra bala' ri Aki Kapuuno' ramuyun. Am raino mantipagon kia amon ru mangkumos akai ondo' pinatias mai ragili, ioginio makitaak ra akanon songongorou?

¹² Amon ru ulun ra bokon no makakuasa' lumansan ramuyun, mulu' poyo akai ka ilo. Kaa' kalo poyo igondo' ku pasalulaa' kuasa' raginio. Mulu' poyo bonsoi no ru aku ayuk galama' maguyum ra kaukapan ru akanon ka mampajajou ra pampatanawan ra Tanou Moonsoi ri Jisus Kristus.

¹³ Nakapandai kano ra ulun ondo' mangandoi ra Baloi Tuhan makaapu ra akanon intor ra pangandayan nano. Mogondo' niayuk ra ulun ondo' mapabandai ra taak simbalui ra altar, makasia' intor ra taak raginio.

¹⁴ Ginio ra Tuhan pana nangaru' ra ulun ondo' mampasaboi ra Tanou Moonsoi no musiti' makaapu ra akanon songongorou intor ra kandoi no raginio.

¹⁵ Kabalu' pana koson raginio, kalo poyo igondo' ku pasalulaa' kuasa' raginio koson makitaak ra atan ayuk pana. Am raino pana, aku nanulis ra surat ti, sala' ka mapasalula' aku ra rondo' pakitaakan. Moonsoi poyo matoi aku galing ka matatakan ra kaansukan kutu raginio.

¹⁶ Kalo maaya' aku lumimbau amon ru mampabala' aku ra Tanou Moonsoi, sabap ra aku ti sinusub ri Aki Kapuuno'. Mapara' boo usung kuno amon ru kalo mampatanou aku ra Tanou Moonsoi no.

¹⁷ Amon ru kondoyon kutu sumugut ra kasagaan kuno galama', maaya' aku niayuk makitaak ra ampos. Kaa' aku mampasaboi ra Tanou Moonsoi no, sabap raginio musiti' baalon kuno, io no kandoi tinaakan ri Aki Kapuuno' raki'.

¹⁸ Ginio poyo, atan kia ampos raki'? Gitio noyo ampos ti: makapampasaboi aku ra Tanou Moonsoi am kalo mantipagon ra ulun bokon mampaakan raki'. Sabap ra koson sangulun mampatanou ra Tanou Moonsoi no, kalo gogoton ku atan-atan poboloson.

¹⁹ Aku ti sala' ka ulipon ru osoi ayuk pana. Kaa' aku galama' siminauk ra ulipon ru ngaangai' ulun, maa' raginio makapangkimait aku ra masuang ulun mangintopot ri Kristus.

²⁰ Ginio ra amon ru sumimpung aku ra ulun ru Jaudi, paliso ku koson ayuk ra ulun ru Jaudi, maa' raginio makapangkimait aku risilo mangintopot ri Kristus. Am niayuk ra ulun ondo' sumugut ra Ukum ri Musa, aku pana ilain koson ayuk risilo, kabalu' pana kalo boo. Kaayagan kuno koson raginio, maa' raginio makapangkimait aku risilo mangintopot ri Kristus.

²¹ Mogondo' niayuk ra aku sumimpung ra ulun ondo' sala' ka Jaudi, paliso kuno koson ayuk ra ulun sala' ka Jaudi, maa' raginio makapangkimait aku risilo mangintopot ri Kristus. Arati' nati, sala' ka kalo gumagaya' aku ra susuban ri Aki Kapuuno'; sotopot no sumugut aku ra susuban ri Kristus.

²² Am poyo ra aku sumimpung ra ulun ondo' malawo pangintapatan, paliso kuno koson ra ulun ondo' malawo pangintapatan, maa' raginio makapangkimait aku risilo mangintopot ri Kristus. Iou, makimogondo' aku noyo ra nansalinut paliso ru ulun, maa' raginio, amon ru maalap, makapangkimait aku ra kukula' ngaulun risilo mangintopot ri Kristus.

²³ Ngaangai' ti baalon ku sabap ra kaatangan ru Tanou Moonsoi no, maa' raginio aku pana mabarakat.

²⁴ Pabukat kau, maaru' nakapandai kano ra ralalom pagugulaan masimbul, moonong ulun ondo' maya' raginio masimbul, kaa' sangulun ayuk mokoowot ra taak kamanangan. Pasimbul kano koson riso, saboi mokoowot kau ra taak raginio.

²⁵ Moonong ulun ondo' makaguang maya' ra pagigilayan masimbul, magalung io toojo ra inan nano. Am mongorot io toojo, maa' raginio mokoowot io ra karaun kamanangan ondo' mapuso niayuk ra tauli. Kaa' itakau ti mongorot, maa' raginio mokoowot takau ra karaun kamanangan ondo' mantilayun.

²⁶ Ginio nai ra mangandoi aku ayuk ri Aki Kapuuno', mogondo' ra sangulun masimbul gumogot ra kamanangan kapoam mogondo' ra sangulun peninju mompokono' ra gonggom nano ra pantula' nano.

²⁷ Intor raginio, pantataanin ku kaayagan kutu suku' manguasa' aku ra ngaangai' kinibit no. Binaal ku ginio sabap ra malaa' aku ra kabalu' pana aku mangkimait ra bokon maya' ra pagigilayan ti, kaa' pupus aku piboo impayin.