1 KORINTUS 8 - Tanou Moonsoi Timugon

Pangkuatan ra akanon ondo' pinampakan ra sinungkalalaing

¹ Raino manaam aku ra pangkuatan min poyo ra bokon intor ra akanon ondo' pinampakan ra sinungkalalaing. Motopot ragu ru ulun ra, “Itakau ngaangai' makakapandayan.” Kaa' kapandayan no mangkinibit ra ulun masauk masumbung; kaa' togom mompokoonsoi ra paliso ru ulun.

² Ulun ondo' indoson no makakapandayan io no toojo, sotopot no kalo poyo natutunan no ngaangai'.

³ Kaa' ulun ondo' totopot motogom ri Aki Kapuuno', io ti mauligan ri Aki Kapuuno'.

⁴ Ondo' pangkuatan min ra mangakan ra akanon ondo' pinairang ra sinungkalalaing: Makapandai takau raginilo sotopot no binaal ayuk ru ulun, sabap ra kolondo' tuhan ra bokon. Nakapandai takau niayuk ra rorondo' ayuk i Aki Kapuuno', am kolondo' boo bokon.

⁵ Kabalu' pana mokoondo' niayuk giu' ra suruga' kapoam giti ra tana' ti masuang ondo' piawon ru ulun “tuhan”,

⁶ kaa' itakau mangintopot ra rondo' ayuk i Aki Kapuuno', i Ama' ondo' namangun ra ngaangai' no, am intor Riso itakau naayag. Am niayuk rondo' ayuk Tuhan takau, ioginio i Jisus Kristus. Ralalom inggalan Nano noyo ngaangai' no nasauk am intor Riso niayuk itakau naayag.

⁷ Kaa' sala' ka ngaangai' ulun nakatutun raginio. Mokoondo' niayuk ragili naindalom noyo sumamba ra sinungkalalaing, am saboi raino lakat ayuk poyo mangkara' ra makatula ilo amon ru mangakan ra akanon ondo' pinampakan ra sinungkalalaing. Pangkaraan nilo makatula ilo sabap ra pangintapatan nilo malawo.

⁸ Sotopot no, pai' ru akanon no mompokoonsoi poyo ritakau ri Aki Kapuuno'. Amon ru mangakan takau raginio, kalo matatakan takau ra atan ayuk pana. Mogondo' niayuk ra amon ru kalo mangakan, kalo niayuk maulian takau.

⁹ Kaa' ilalai'! Pai' polosoo' kaluagan mino mambaal ra atan-atan mangkinibit ra ulun malawo pangintapatan mambaal poyo ra tula.

¹⁰ Amon ru sangulun malawo pangintapatan no makakito ramuyun ondo' maikang pangintapatan mangakan giu' ra kuil sinungkalalaing, sala' kia ka baal raginio mangkinibit ra ulun no pana mangakan ra akanon ondo' pinampakan no?

¹¹ Amon ru koson poyo raginio, kapandayan mino mangkinibit ra pabukat Kristian muno ondo' malawo pangintapatan makalayau boo. Kaa' sotopot no, minatoi i Kristus mamayag riso niayuk.

¹² Amon ru akau mangkinibit ra pabukat Kristian mino ondo' malawo pangintapatan makatula am maninduol ra guang nilo, ginio mogondo' ayuk ra makatula kau ri Kristus.

¹³ Ginio poyo, amon ru akanon koson raginio mangkinibit ra pabukat Kristian kuno makatula, kalo boo mangakan aku ra kual, maa' raginio kalo boo makinibitan ku ilo ti makatula.