1 KORINTUS 7 - Tanou Moonsoi Timugon

Pangkuatan ra paguatan

¹ Raino masaga' aku manaam ra pangkuatan ru surat min i raki'. Amon ru sangulun ungkuyon kalo manangandu', ginio moonsoi.

² Kaa' koson kalo makinibitan kau ru paliso pansasawaan, moonsoi poyo ru moonong ungkuyon makaandu' sigagama' am niayuk moonong ruandu' makaralaki sigagama'.

³ Kalo moonsoi sangulun ralaki magimpong ra andu' nano. Am mogondo' niayuk kalo moonsoi sangulun andu' magimpong ra ralaki nano; musiti' ilo mapaansuk ra rondo' am bokon.

⁴ Sangulun andu' kalo makakuasa' ra inan nano galama', kaa' ralaki nano ayuk; nogondo' niayuk ra sangulun ralaki kalo makakuasa' ra inan nano galama', kaa' andu' nano ayuk.

⁵ Pai' pagimpong ra rondo' am bokon, ondo' ak am ra kukula' buoi ayuk, amon ru mangiou karuruo, maa' raginio makapakiasi' kau toojo. Kaa' kopongo raginio, karuruo no musiti' marampit saguli'. Maa' raginio kalo makinibitan kau ru Tingganai ru riwato no sabap ra kalo moorot min kasagaan ru guang mino.

⁶ Rinagu ku gitio sala' ka koson manusub ramuyun, kaa' koson ra rondo' pangkaraan min ayuk.

⁷ Sotopot no, maansayan aku toojo amon ru ngaangai' ulun koson raki', ra kalo maguot; kaa' sigagama' mokoondo' ra taak nano intor ri Aki Kapuuno', sangulun mokoondo' ra taak koson ragitio, am kalo mogondo' taak ru bokon no.

⁸ Ilo ondo' kalo poyo naguot am ondo' napuor, karaa' min ragu ragitio; Mulu' bonsoi no ra akau misasangulun koson raki'.

⁹ Kaa' amon ru kalo moorot min laai ru guang mino, paguot kano. Sabap ra mulu' poyo bonsoi no ra akau maguot, intor ra gumaai poyo laai ru guang mino.

¹⁰ Koson ra ilo ondo' nakapaguot noyo, gitio panusuban kutu. (Sotopot no sala' ka intor raki', kaa' Tuhan); koson ra sangulun ruandu', “Pai' iruani' ralaki muno!”

¹¹ Kaa' amon ru iniruanan no noyo, “Pai' pangindalaki ra bokon!” kapoam, “Saguli' poyo ra ralaki muno!” Sangulun ralaki pana, “Pai' alio' andu' muno!”

¹² Pabukat ra bokon, karaa' min ragu ragitio, (gitio intor raki' am sala' ka Tuhan); amon ru sangulun ungkuyon Kristian makaandu' ra sala' ka ulun Kristian, am masaga' andu' no masimpung riso, moonsoi kalo alion no andu' nano.

¹³ Amon ru sangulun ruandu' Kristian makaralaki ra sala' ka ulun Kristian, am ralaki no masaga' masimpung riso, moonsoi kalo alion no ralaki nano.

¹⁴ Sangulun ralaki ondo' sala' ka Kristian iowon niayuk ri Aki Kapuuno' sabap ra nasimpung io ra andu' Kristian nano. Sangulun andu' ondo' sala' ka Kristian niayuk iowon ri Aki Kapuuno' sabap ra nasimpung io ra ralaki Kristian nano. Amon ru kalo, anak nilono mogondo' ra anak ru ulun ondo' kalo iowon ri Aki Kapuuno'; kaa' sotopot no anak-anak raginio iowon niayuk ri Aki Kapuuno'.

¹⁵ Kaa' amon ru sangulun ondo' kalo mangintopot ri Aki Kapuuno' no moogot mangiruan ra andu' kapoam ralaki nano ra Kristian, pai' ilo no ingai'. Amon ru nasauk koson raginio, ralaki kapoam andu' ra Kristian no, pai' ilo jajali' masimpung, sabap ri Aki Kapuuno' galama' masaga' ramuyun maayag ra kaansayan.

¹⁶ Andu' ra Kristian kau, maalap min nua' ralaki mino mangintopot ra Tuhan? Mogondo' niayuk ramuyun, ralaki kau ra Kristian, maalap min nua' andu' mino mangintopot ra Tuhan?

Kaayag kano sumugut ra kasagaan ri Aki Kapuuno'

¹⁷ Kaayag kano sigagama' sumugut ra tinaakan ru Tuhan ramuyun, ioginio tayar ru kaayagan min paat ri Aki Kapuuno' nampiau ramuyun. Ginio noyo pangilaan kuno ra moonong pasimpungan ulun Kristian.

¹⁸ Amon ru sangulun nasunatan noyo paat ri Aki Kapuuno' nampiau riso, ulun no kalo pana makiiru' ra sunat nano. Koson niayuk ra sangulun ondo' kalo poyo sinunatan paat ri Aki Kapuuno' nampiau riso, ulun no kalo pana makisunat.

¹⁹ Sabap ra makasunat kapoam kalo, ginio kalo maatang ri Aki Kapuuno'. Ondo' ayuk maatang am gumagaya' ra susuban Nano.

²⁰ Moonong ulun musiti' maayag sumugut ra tayar ru kaayagan ondo' soroi riso paat ri Aki Kapuuno' nampiau riso.

²¹ Amon ru ulipon kou paat ri Aki Kapuuno' nampiau rirun, pai' kapagon mangkara' raginio. Kaa' amon ru makakaluagan kou koson lumabus intor ra pangulipanan, alapo' noyo kaluagan raginio.

²² Sabap ra sangulun ulipon ondo' piniau ru Tuhan, sotopot no pinalabus io no ru Tuhan. Mogondo' niayuk ra sangulun sala' ka ulipon ondo' piniau ru Tuhan, uliponon io no ri Kristus.

²³ Mologo toojo pinambabali ri Aki Kapuuno' ramuyun, ioginio i Kristus. Sabap raginio pai' boo polosoo' paliso malaat ru ulun no mangulipon ramuyun.

²⁴ Pabukat kau ngaangai', simpung kano ri Aki Kapuuno' am kaayag kano sigagama' sumugut ra tayar ru kaayagan ondo' soroi ramuyun paat ra akau piniau ragili.

Pangkuatan ru ulun kolondo' ralaki kapoam andu'

²⁵ Koson ra ulun ondo' kalo poyo nawot, kolondo' pambalaan ru Tuhan posoboyon kuno ramuyun, kaa' mangani' aku ayuk ramuyun ra pamaguangan koson ra pangkaraan. Sabap ra asi' ru Tuhan raki', maaya' aku mindagu am niayuk malansanan min.

²⁶ Koson mangkara' ra ngaangai' kapaganan paat ra raino ti, guang ku moonsoi poyo moonong ulun marayus maayag koson ra buoi ti.

²⁷ Amon ru makaandu' kou noyo, pai' io no iruani'. Amon ru kalo poyo nakapanangandu' kou, pai' noyo gogot panangandu'.

²⁸ Kaa' amon ru maguot kou, kolondo' tula muno. Koson niayuk amon ru sangulun ralaa mangindalaki, kolondo' tula nano. Kaa' masaga' aku ayuk ra akau makainggalur ra kapaganan ondo' matuum ru ulun nakapaguot.

²⁹ Pabukat kau ngaangai', gitio arati' ru kon kuli: kaluagan takau kalo boo mabuoi. Ginio ra tumalimpuun intor raino, moonong ungkuyon ra makaandu', moonsoi mampakaatang io ri Aki Kapuuno' ka mampakaatang ra andu' nano ayuk.

³⁰ Mogondo' ra ulun ondo' mantangi', koson ayuk ra ilo kalo mangiluk guang; mogondo' ayuk ra ulun ondo' makakurit, koson ayuk ra ilo kalo maansukan; am poyo koson ra ulun ondo' nakabali, koson ayuk ra kalo nokoowot ilo.

³¹ Ulun ondo' mangingindapu' ra tana' ti, koson ayuk ra kalo guguangon nilo ginio. Sabap ra pupus no atan ondo' mokoondo' ra tana' ti, mapuso boo!

³² Malansan aku ra makalabus kau intor ra pagalabaan. Ungkuyon kolondo' andu' mampakaatang toojo ra kandoi ru Tuhan, sabap ra moogot io mampakatasu' ra Tuhan.

³³ Kaa' ungkuyon ra makaandu', mampakaatang ra kaayagan ru tana' ti, sabap ra masaga' io mampakatasu' ra guang ru andu' nano.

³⁴ Ginio mangkinibit ra guang nano matatayar boo. Kalo mogondo' ra sangulun ruandu' kolondo' ralaki, kapoam sangulun ralaa. Ilo mampakaatang toojo ra kandoi ru Tuhan, sabap ra ilo no mangandoi ayuk ri Aki Kapuuno' kapupupus ru bayag nilo. Kaa' ruandu' ra makaralaki mampakaatang ayuk ra kaayagan ru tana' ti, sabap ra masaga' io mampakatasu' ra guang ru ralaki nano.

³⁵ Ngaangai' ragitio tinulisan ku sabap ra masaga' aku mangindangan ramuyun, am sala' ka mantipagon ramuyun. Masaga' aku koson mambaal kau ra motopot am matanda', maa' raginio makapangandoi kau toojo ra Tuhan ra sotopot-topot ru guang min.

³⁶ Koson ra ilo santamung ayuk poyo: amon ru ungkuyon ti masaga' sumimpung ra tamung nano sabap ra kalo moorot no laai ru guang nano galama', ginio poyo moonsoi polosoon ilo ayuk maguot maya' ra kasagaan no. Pai' ru makatula ginio.

³⁷ Kaa' amon ru sangulun ungkuyon napatas noyo ra kalo manangandu', am kalo jinajalan ru osoi ayuk pana; am amon ru moorot no toojo laai ru guang nano galama', am poyo natutunan no toojo ra atan baalon nano, mulu' poyo bonsoi amon ru kalo manangandu' io.

³⁸ Amon ru maguot kau, ginio moonsoi toojo, kaa' mulu' poyo bonsoi no amon ru kalo pana maguot.

³⁹ Sangulun ruandu' ra makaralaki musiti' masimpung riso buoi ru ralaki no maayag. Kaa' malupus ralaki nano matoi, ruandu' no makapangindalaki poyo ra osoi ayuk kasagaan no; kaa' musiti' no ulun Kristian.

⁴⁰ Kaa' mulu' bonsoi ru kalo boo mangindalaki io. Ginio sumugut ra pangkaraan ku ayuk, kaa' guang kuno maaya' aku niayuk mindagu koson raginio, sabap ra aku pana kinuasa' ru Ambiluo ri Aki Kapuuno'.