1 KORINTUS 5 - Tanou Moonsoi Timugon

Pansasawaan ra pasimpungan ulun Kristian

¹ Sotopot no binalaan aku ra mokoondo' intor ramuyun mansawa', mokoondo' sangulun liminapau ra ina' nanukapu riso. Ginio malaat toojo intor ra kaindalaman ru ulun ondo' kalo makaulig ra Tuhan.

² Kabalu' pana koson raginio, lakat kau ayuk poyo masumbung. Sotopot no akau musiti' mangiluk guang, am ulun ondo' mansawa' no, pasuayo' min intor ra pasimpungan mino.

³ Am kabalu' pana maalur aku intor ramuyun, kaa' mamaar ak ra guang. Am ralalom inggalan ru Tuhan Jisus Kristus, mindagu aku ra ulun nansawa' no musiti' ukumin.

⁴ Amon matitimung kau, karaa' min ayuk koson ra soroi aku ramuyun mabaya' ra kuasa' ru Tuhan takau i Jisus.

⁵ Polosoo' min ak ulun no kuasaan ru Tingganai ru riwato koson mamuso ra inan nano, maa' raginio bayagon boo ambiluo nano paat ra Tuhan matong saguli'.

⁶ Kalo moonsoi kau masumbung koson raginio. Nakapandai kano lair ragu ragitio, “Ragi ra sanganu ayuk mampagayo ra ngaangai' ru ruti', ioginio tapung linatakan ra timug am umau.”

⁷ Patiri' galing ragi ra nakalair, ioginio tula, maa' raginio masauk kau ra ruti' ondo' nakabagu, mapasau intor ra ragi nakalair. Makapandai aku ra gagayaan min ginio. Sabap ra Pangiantakan ra Paska nasuku' noyo, am i Kristus ondo' nasauk ra anak domba ru Paska takau, sinimbalui noyo.

⁸ Ginio poyo, ibok iantako' takau bunsag ra Ruti' Kalo Linatakan ra Ragi no, ioginio kapasawan ru guang am ondo' kasagain ri Aki Kapuuno'. Pai' takau iantako' bunsag no ra ruti' ondo' linatakan ra ragi nakalair, ioginio makatula am kalaatan.

⁹ Ralalom ru surat kuli ragili, nambala' aku ramuyun koson kalo lumatok ra ulun mansawa'.

¹⁰ Kon kuli am sala' ka ulun kalo nakaulig ra Tuhan ondo' mansawa', makalit, mamparuung kapoam ondo' sumamba ra sinungkalalaing. Sala' ka ilo kon kuli; sabap ra amon ru minggalur kau intor risilo, moonsoi marayus iruanin min tana' ti.

¹¹ Kaa' ondo' kon kuli, pai' kano latok ra ulun ondo' migiangku ra io Kristian, kaa' mansawa', makalit, sumamba ra sinungkalalaing, manimbaal ra ragu ra ulun bokon, gagaukon, kapoam mantatakou. Gumulung riso mangakan pana am pai'!

^12-13 Sala' ka aku ra kandoi mangakim ra ulun ondo' sala' ka Kristian. I Aki Kapuuno' galama' ondo' mangakim risilo. Kaa' sotopot no sala' kia ka akau no galama' mangakim ra ulun Kristian intor ra pasimpungan mino? Koson tinulisan ra Buuk Kitab, “Pasuayo' noyo ulun malaat intor ra pasimpungan mino.”