1 KORINTUS 4 - Tanou Moonsoi Timugon

Rasul-rasul ri Kristus

¹ Karaa' min noyo ra akai ti ulipon ri Kristus. Akai ti noyo inanian ra kandoi mampatanou ra katapatan ri Aki Kapuuno' ondo' kalo igondo' pinabala'.

² Rondo' ayuk maatang ra sangulun ulipon, ioginio gumagaya' io toojo ra tuan nano.

³ Kalo gagayaan ku panguwan mino raki', kapoam panguwan ru osoi ayuk pana. Kalo miguguu' aku galama'.

⁴ Kolondo' nai malimanan ku ra aku makasala, kabalu' pana ra mokoondo' lair. Kaa' Tuhan ayuk mangakim raki'.

⁵ Ginio ra pai' kau pangakim ra osoi ayuk pana ru kalo poyo masaboi paat ra orou inaru' no. Pangukuman ra pupus inaanin takau saboi Tuhan matong saguli'. Io noyo mambala' ra ngaangai' ondo' nakasibuni ra kalandaman, am mapaingkual ra ngaangai' suang ru guang ru ulun. Paat raginio bagu no moonong ulun mangapu ra ompor intor ri Aki Kapuuno' sumugut ra binaal nilono sigagama'.

⁶ Pabukat kau ngaangai', aku am i Apolos nampagagaya' noyo ra ngaangai' ni. Akai galama' alapon min ra tiluan, maa' raginio makaigigila' kau ra atan arati' ru ragu ragitio; “Gagayaa' min noyo aturan ra motopot.” Koson raginio noyo ra kolondo' sangulun pana ramuyun mongompor ra sasangulun kapoam magasab ra bokon.

⁷ Osoi kia nampasauk ramuyun maatang intor ra ulun bokon? Sala' ka kia i Aki Kapuuno' nangani' ramuyun ra ngaangai' ondo' naapu mino? Kua guat lumimbau kau, koson atan ondo' soroi ramuyun sala' ka tinaakan?

⁸ Indoson min kia ra mokoondo' kano ngaangai'? Langkaya' kano tupo. Mamarinta kano koson ra raja'. Kaa' akai ti kalo. Mapara' boo bonsoi no amon ru totopot niayuk nasauk kau ra raja', maa' raginio makapabaya' takau mamarinta.

⁹ Sumugut ra pamaguangan kuno, akai rasul pinatauli toojo ra ngaangai' ulun. Akai ti mogondo' ra ulun ondo' inukum potoyo' ra saang ru ngaangai' malaikat am ulun ru tana' ti.

¹⁰ Sabap ri Kristus, akai nasauk koson ayuk ra sasambungon, kaa' akau nasauk ra ulun Kristian ondo' mapintar. Akai malawo, kaa' akau maikang! Akai asabin, kaa' akau urumaton tupo.

¹¹ Saboi raino naitilan am pinaason akai; am lairon ngaangai' konoon maino; inimbolo' akai; kalo mokorondon akai ra rorondo' intok;

¹² mirot akai mangandoi maguyum ra balanja' mai galama'. Paat ra akai simbaalin ra ragu, ruliin mai ra barakat; paat ra akai imboloon, oroton mai ayuk;

¹³ paat ra akai uwin, ruliin mai ra ragu moonsoi. Saboi raino akai koson ra ginsamol ru tana' ti; akai noyo nasauk koson ra jamol ra pagilangan ru ulun.

¹⁴ Tinulisan ku gitio sala' ka koson mampakauyu' ramuyun, kaa' mangila' ramuyun koson ra anak kuno galama' ondo' tagamin kuno.

¹⁵ Sabap ra kabalu' pana akau mokoondo' lair mopor ngaribu ngaulun mangingila' ra Kristian, kaa' sangulun ayuk ama' min. Ginio ra ralalom kaayagan mino koson ra sangulun Kristian, aku noyo ama' min, sabap ra aku no nampabala' ramuyun ra Tanou Moonsoi ri Jisus Kristus.

¹⁶ Ginio nai ra kitaakon takamin toojo ra tilu kano raki'.

¹⁷ Ginio kuayan ra mompoongoi aku ri Timotius ramuyun. Koson sangulun Kristian, io ti anak kuno ondo' tagamin kuno am malansanan. Io mampakara' ramuyun ra ati kulaan kaayagan kuno koson ra sangulun ondo' mangintopot ri Kristus. Ginio noyo pangilaan kuno ra ngaangai' pasimpungan ulun Kristian ra ati ayuk intok.

¹⁸ Kaa' mokoondo' kukula' ngaulun intor ramuyun masumbung nai boo, sabap ra indos nilo kalo boo mongoi aku pagilong ramuyun.

¹⁹ Amon ru poongoyon aku ru Tuhan, ongoyon takamin ilai' ra mataki'. Maimumuyan ku boo galama' kuasa' ru ulun mangasumbung, kapoam raragu nilo ayuk kia ginio.

²⁰ Sabap ra amon ru i Aki Kapuuno' mamarinta ra kaayagan ru sasangulun no, makito ra makakuasa' kaayagan nano am sala' ka ragu ayuk.

²¹ Ati kia rondo' kasagaan min? Masaga' kau kia ra aku mongoi panangit ramuyun kapoam mongoi pangila' ra molomoi am makaasi'?