1 KORINTUS 16 - Tanou Moonsoi Timugon

Ruit paindanganon ra ulun Kristian

¹ Raino, intor ra ruit paindanganon min ra ulun ri Aki Kapuuno' giu' ra Judia. Bayaa' min ayuk atan ondo' nanusuban kuno ra pasimpungan ulun Kristian giu' ra pagun Galatia.

² Koson ragitio: moonong orou Minggu', akau ngaangai' musiti' manimung ra ruit sumugut ra maalap ru sigagama'. Timungo' min kalalair ruit no saboi ra aku makaratong, maa' raginio, kalo pana timungon ra aku makasuku'.

³ Ginio ra paat ra aku mokoongoi ramuyun, poongoyon ku ulun ondo' kalansanin min ra bandar Jirusalim, mabaya' ra surat pangiawan am ruit paindanganon min.

⁴ Am amon ru karaan min ra aku ti maatang paayaan, maya' aku niayuk risilo.

Inatang ri Paulus

⁵ Mongoi aku niayuk pagilong ramuyun paat ra aku mansail ra pagun Makidonia, sabap ra makaguang aku mongoi ra giu'.

⁶ Ati lair mabubuoi aku sumoroi ramuyun, saboi mopongo musim masimu' no. Maa' raginio makapangindangan kau raki' manunggul ra pangkiralanan kutu.

⁷ Amon ru iowon aku ru Tuhan, masaga' aku sumoroi ramuyun mabuoi koborok, am sala' ka mapit ayuk.

⁸ Kaa' liliwa' raginio sumoroi aku poyo giti ra bandar Ipisus saboi orou Pentekosta.

⁹ Sabap ra masuang kaluagan moonsoi kuno mangandoi ra Tuhan ragiti, kabalu' pana masuang niayuk manggal raki'.

¹⁰ Amon ru mongoi i Timotius ramuyun, umaa' min io ra moonsoi, maa' raginio maansayan io mayan ramuyun, sabap ra io pana koson niayuk raki', ra mangandoi io ra Tuhan.

¹¹ Pai' kau pangkara' ra io sangulun kalo maatang, kaa' akau musiti' mangindangan riso manunggul ra pangkiralanan no mabaya' ra kaansayan. Maa' raginio makasaguli' io raki', sabap ra maginaa aku riso mabaya' ra pabukat Kristian ra bokon no.

¹² Koson ra pangkuatan min intor ri Apolos: ingkukula' aku no panunusub riso mongoi ramuyun mabaya' ra pabukat Kristian ra bokon, kaa' kolondo' poyo katasuan nano mongoi raino. Paat ra io makakatasuan, maaru' mongoi io.

Ragu pupus

¹³ Pagilalai' am pangintopot kano toojo, baani am mikang kau.

¹⁴ Ngaangai' ru baalon mino musiti' mabaya' ra togom.

¹⁵ Rondo' poyo bilin ku ramuyun: nakaulig kano ri Stipanus sambaloi. Ilo noyo ulun kasaa' ondo' nasauk ra Kristian giu' ra pagun Akaya, am mapirot ilo toojo mangindangan ra ulun ri Aki Kapuuno'.

¹⁶ Pabukat kau ngaangai', bayaa' min noyo ulun koson raginilo, am niayuk moonong ulun ondo' mangindangan mangandoi koson risilo.

¹⁷ Naringkuanang aku ra rinatangan ri Stipanus, Portunatus am i Akaikus. Sabap ra ilo ti noyo koson suali min minongoi ragiti.

¹⁸ Napakaansuk ilo raki', koson niayuk ilo napakaansuk ramuyun. Ulun koson ragitilo, tutuno' min toojo ilo.

¹⁹ Pasimpungan ulun Kristian intor ra pagun Asia ti mampasaboi ra ragu kaansayan nilo ramuyun. I Akwila am i Priskila am niayuk pasimpungan ulun Kristian ondo' tumimung ra baloi nilai pana, mampasaboi ra ragu kaansayan nilo ramuyun.

²⁰ Ngaangai' pabukat Kristian ragiti mampasaboi ra ragu kaansayan nilo ramuyun. Paat ra akau manguma' ra pabukat Kristian indagu kano ra kaansayan mabaya' ra guang mapasau.

²¹ Am gitio noyo tinulisan kutu ondo' tinatanduan kutu galama'; Kaansayan intor raki', i Paulus.

²² Osoi ayuk kalo motogom ri Tuhan Jisus, ukumin io ri Aki Kapuuno'! Maranata, arati' no ‘O Tuhan mai, ratong no!’

²³ Gama' ru Tuhan takau i Jisus Kristus mambarakat ramuyun.

²⁴ Togom kuno pana sumimpung ramuyun ngaangai' ralalom ri Jisus Kristus.